ខេត្តព្រៃវែង ៖ ដើម្បីផ្តល់នូវចំណេះ និងសមត្ថភាពផ្ទាល់ខ្លួន ដែលអាចយកទៅប្រកបមុខរបរចិញ្ចឹមជីវិតបាន ក្រោយពេលចេញពីមណ្ឌលកែប្រែ-ពន្ធនាគារខេត្តព្រៃវែង បានសហការជាមួយមន្ទីរការងារខេត្តព្រៃវែង រៀបចំបើកវគ្គបណ្តុះបណ្តាលមួយ លើជំនាញជួសជុលម៉ូតូ និងដាំបន្លែតាមបែបធម្មជាតិ…
ខេត្តព្រៃវែង ៖ ដើម្បីផ្តល់នូវចំណេះ និងសមត្ថភាពផ្ទាល់ខ្លួន ដែលអាចយកទៅប្រកបមុខរបរចិញ្ចឹមជីវិតបាន ក្រោយពេលចេញពីមណ្ឌលកែប្រែ-ពន្ធនាគារខេត្តព្រៃវែង បានសហការជាមួយមន្ទីរការងារខេត្តព្រៃវែង រៀបចំបើកវគ្គបណ្តុះបណ្តាលមួយ លើជំនាញជួសជុលម៉ូតូ និងដាំបន្លែតាមបែបធម្មជាតិ ជូនដល់ទណ្ឌិតចំនួន៣៥នាក់ នៅក្នុងពន្ធនាគារខេត្តព្រៃវែង ។
វគ្គបណ្តុះបណ្តាលនេះ បានធ្វើឡើងកាលពីព្រឹកថ្ងៃទី០១ ខែមីនា នៅក្នុងពន្ធនាគារខេត្តព្រៃវែង ដែលមានគ្រូបច្ចេកទេសជំនាញជួសជុលម៉ូតូ និងមន្ត្រីជំនាញខាងផ្នែកកសិកម្មជាច្រើននាក់ បានចូលរួមបណ្តុះបណ្តាលផងដែរ ។
លោកឧត្តមសេនីយ៍ ជួប សារីម ប្រធានពន្ធនាគារខេត្តព្រៃវែង បានមានប្រសាសន៍ថា សម្រាប់ជំនាញដាំបន្លែតាមបែបធម្មជាតិក្នុងវគ្គបណ្តុះបណ្តាលនេះ គឺមានរយៈពេលមួយសប្តាហ៍ ចំណែកជំនាញជួសជុលម៉ូតូគឺមានរយៈពេល៤ខែ ហើយក្រោយពីបញ្ចប់វគ្គ មន្ទីរការងារក៏មានចេញនូវវិញ្ញាបណ្ណ័បត្រ័បញ្ជាក់ការសិក្សាជូនដល់ទណ្ឌិត ដែលអាចយកទៅប្រើប្រាស់តាមតម្រូវការ ក្រោយពេលចេញពីពន្ធនាគារផងដែរ ។
ថ្លែងនៅក្នុងឱកាសនោះដែរ លោកឧត្តមអាគារនុរក្សថ្នាក់លេខ៣ ប្រធានពន្ធនាគារខេត្តព្រៃវែង ក៏បានផ្តាំផ្ញើដល់ទណ្ឌិតទាំងអស់ ត្រូវខិតខំយកចិត្តទុកដាក់សិក្សារៀនសូត្រ ព្រោះចំណេះដឹងក្នុងវគ្គបណ្តុះបណ្ដាលនេះមានសារៈសំខាន់ណាស់សម្រាប់អ្នកគ្រប់គ្នាក្រោយពេលចេញពីពន្ធនាគារទៅ គឺអាចយកទៅប្រកបរបរចិញ្ចឹមជីវិតបាន ដោយមិនចាំបាច់ទៅប្រព្រឹត្តការងារទុច្ចរិតដែលសង្គមស្អប់ខ្ពើម ដើម្បីរកប្រាក់នោះទេ ។
ជាមួយគ្នានោះដែរ លោកប្រធានពន្ធនាគារ ក៏បានអំពាវនាវដល់បងប្អូនប្រជាពលរដ្ឋ អាជីវករ ឬភោជនីយដ្ឋានជាដើម បើត្រូវការចង់ទិញបន្លែដូចជា ស្ពៃ ខាត់ណា ត្រកួន ននោង ជាដើមសូមមកជួយទិញពីមន្ត្រីពន្ធនាគារផង គឺមានលក់ជូនក្នុងតម្លៃសមរម្យ និងសុទ្ធតែជាបន្លែគ្មានសារធាតុគីមី ហើយការជួយរបស់បងប្អូន និងរួមចំណែកលើកទឹកចិត្តដល់ទណ្ឌិតទាំងអស់ ឲ្យមានកម្លាំងចិត្តតស៊ូរៀនសូត្រតទៅទៀត ៕
ចែករំលែកព័តមាននេះ