ខ្មែរយើងឲ្យតែនរណាមានអាការហើមត្របកភ្នែក គេតែងតែថាម្នាក់ហ្នឹងកើតពពែឆ្កែ ហើយតែងតែបន្ទោសថា មកពីមើលឆ្កែពាក់គ្នាច្រើនពេកទើបចេញជាបែបនេះ ។ ប៉ុន្តែវាគ្រាន់តែជាជំនឿមិនត្រឹមត្រូវប៉ុណ្ណោះ ។ វាមានមូលហេតុរបស់វាពិតប្រាកដ ហើយក៏មិនមានទាក់ទងនឹងការមើលឆ្កែពាក់គ្នាដែរ ។…
ខ្មែរយើងឲ្យតែនរណាមានអាការហើមត្របកភ្នែក គេតែងតែថាម្នាក់ហ្នឹងកើតពពែឆ្កែ ហើយតែងតែបន្ទោសថា មកពីមើលឆ្កែពាក់គ្នាច្រើនពេកទើបចេញជាបែបនេះ ។ ប៉ុន្តែវាគ្រាន់តែជាជំនឿមិនត្រឹមត្រូវប៉ុណ្ណោះ ។ វាមានមូលហេតុរបស់វាពិតប្រាកដ ហើយក៏មិនមានទាក់ទងនឹងការមើលឆ្កែពាក់គ្នាដែរ ។
ជាធម្មតាអាការហើមត្របកភ្នែកនេះ ឬហៅថា កើតពពែឆ្កែមានពីរប្រភេទគឺ Stye និង Chalazion ។ ដោយ Stye គឺជាដុំតូចមួយដែលកើតនៅក្នុងត្របកភ្នែកខាងក្នុង ឬខាងក្រៅរបស់មនុស្សយើង ។ វាមើលទៅស្រដៀងនឹងមុនដែរ ដែលស្ថិតនៅរោមភ្នែក ។
អាការពពែឆ្កែបែបនេះ មិនសូវគេសម្គាល់ឃើញនៅពេល ដំបូងៗទេ ប៉ុន្តែគេសម្គាល់ដឹងច្បាស់នៅពេលវាធ្វើឲ្យភ្នែកទៅជាហើម ក្រហម និងតឹងឈឺនៅពេលប៉ះពាល់ ។
ចំណែកឯ Chalazion វិញ គឺជាដុំពកមួយនៅលើត្របកភ្នែកដែលលូតលាស់ចេញនៅពេលក្រពេញើសនៅត្របកភ្នែកស្ទះ ។ វាមិនដូចគ្នានឹង Stye ទេ ដោយវាមិនធ្វើឲ្យឈឺចាប់ទេ តែធ្វើឲ្យមានអារម្មណ៍ ស្អិតៗក្នុងត្របកភ្នែកវិញ ។
ចំពោះមូលហេតុនៃការកើតពពែឆ្កែប្រភេទ Stye វិញគឺជាបាក់តេរី ដោយវាបង្ករោគនៅខាងក្នុងក្រពេញញើសនៅត្របកភ្នែក ឬគល់រោមនៅរោមភ្នែក ។ មេរោគទាំងនេះអាចកើតចេញពីការប៉ះពាល់ ឬញីភ្នែកជាដើម ។ អ្នកងាយនឹងមានអាការមួយនេះ នៅរដូវអាលែកហ្ស៊ីដោយសារតែរមាស់ភ្នែក ។ ចំណែកឯមូលហេតុនៃការកើតពពែឆ្កែប្រភេទ Chalazion វិញ គឺនៅពេលដែលក្រពេញញើសនៅជុំវិញត្របកភ្នែកទៅជាក្រាសពេក ឬរន្ធញើសនៅទីនោះស្ទះ ដែលធ្វើឲ្យជាតិប្រេងនៅខាងក្នុងកកកុញច្រើន និងបង្កជាការរលាក រហូតដល់ក្លាយទៅជាដុំមួយ ។ ជាធម្មតាគ្រូពេទ្យមិនអាចប្រាប់បានថាចំពោះមូលហេតុនៃជំងឺនេះនៅឡើយទេ ព្រោះវាមានលក្ខណៈដូចគ្នានឹងការរលាកត្របកភ្នែក ឬពពែឆ្កែ ធម្មតាៗដែរ ។ ពេលខ្លះប្រភេទ Styes ស្ថិតនៅក្នុងត្របកភ្នែកអាចក្លាយទៅជា Chalazia បានដែរ ។
តើមួយណាជាមួយណាទៅ?
វាអាចជារឿងមួយពិបាកដែរក្នុងការប្រាប់ថា ប្រភេទជំងឺពពែឆ្កែទាំងពីរនេះខុសគ្នាដូចម្តេច ។ ជាទូទៅ Stye គឺជាការបង្ករោគ តែ Chalazion មិនមែនទេ ។ ការបង្ករោគអាចធ្វើឲ្យមានកំណកខ្ទុះតូចមួយនៅចុងនៃដុំពពែឆ្កែបានដែលមានលក្ខណៈដូចជាមុន ។ វាអាចធ្វើឲ្យភ្នែកមានការឈឺចាប់ រមាស់ ហូរទឹកភ្នែក និងខ្លាចពន្លឺ ។ វាប្រហែលជាធ្វើឲ្យត្របកភ្នែកទាំងមូលហើមផង ។ ជាធម្មតាប្រភេទ Chalazion មិនបង្កការឈឺចាប់ទេ ហើយប្រហែលជាធ្វើឲ្យត្របកភ្នែកឆាប់ហើមផង ។
Stye អាចមើលទៅដូចគ្នាខ្លាំងនឹងមុនដែរ ដូច្នេះអ្នកអាចនឹងចង់ញេចវាចេញដូចជាមុន។ ប៉ុន្តែកុំធ្វើបែបនេះអីដើម្បីកុំឲ្យការបង្ករោគរាលដាលទៅក្នុងត្របកភ្នែកអ្នកបាន ។ ចូរទុកវាចោលទៅ ។ ទាំង Stye និង Chalazia ច្រើនតែបាត់ទៅវិញដោយខ្លួនឯងក្នុងរយៈពេលពីរបីថ្ងៃ ឬមួយសប្តាហ៍ ។
ចូរយកលក្រណាត់ស្អាតមួយជ្រលក់នឹងទឹកក្តៅ ហើយដាក់វានៅលើត្របកភ្នែករយៈពេល១០ទៅ១៥នាទីម្តងឲ្យបាន៣ទៅ៥ដងក្នុងមួយថ្ងៃ ។ រឿងនេះអាចជួយបន្ទន់ និងបំបាត់ភាពស្ទះនៅរន្ធញើសបាន ។ បើសិនជាវាគឺជា Chalazion អ្នកអាចម៉ាស្សា ថ្នមៗនៅកន្លែងនោះជាមួយនឹងម្រាមដៃបាន ។ អ្វីដែលគួរធ្វើគឺ ត្រូវលាងសម្អាតដៃឲ្យបានស្អាតល្អ ។
ភាគច្រើន Styes និង Chalazia នឹងបាត់ទៅវិញដោយខ្លួនឯង ហើយក៏មិនត្រូវការការព្យាបាលអ្វីដែរ ។ ប៉ុន្តែចូរឲ្យគ្រូពេទ្យពិនិត្យភ្នែកផង បើសិនជាវាមិនចាប់ផ្តើមស្រួលបួលជាងមុនទេក្នុងរយៈពេលពីរបីថ្ងៃក្រោយ ឬលូតលាស់លឿនពេក ឬចាប់ផ្តើមហូរឈាម និងប៉ះពាល់ដល់ការមើលឃើញ ។ ជាមួយគ្នានេះដែរ បើសិនជាវាចាប់ផ្តើមរាលដាលទៅលើភ្នែក ឬធ្វើឲ្យភ្នែកឡើងក្រហមហើយ ចូរឲ្យគ្រូពេទ្យពិនិត្យឲ្យបានលឿនបំផុត តាមតែអាចធ្វើទៅបាន ព្រោះវាអាចជាសញ្ញានៃការបង្ករោគរាលដាល ៕
ចែករំលែកព័តមាននេះ