ខេត្តតាកែវ ៖ នៅតាមដងផ្លូវជាតិលេខ២ បើធ្វើដំណើរចេញពីភ្នំពេញប្រមាណជិត៦០គីឡូម៉ែត្រ ដល់ចំណុចថ្នល់ទទឹង ត្រង់ខ្លោងទ្វារចូលប្រាសាទភ្នំជីសូរ ជាទីតាំងលក់សម្លម្ជូរគ្រឿងសាច់គោដ៏ពេញនិយមសម្រាប់អ្នកដំណើរ ។ ម្ជូរគ្រឿងសាច់គោនៅទីនោះល្បីមានរសជាតិឆ្ងាញ់ ហើយតម្លៃសមរម្យ អ្នកដំណើរមិនសូវរំលងទេតែងតែចូលទទួលទានពេលបាយថ្ងៃត្រង់ ។
លោកវ៉ាត់ វឿន នាយប៉ុស្កិ៍រដ្ឋបាលឃុំសំរោង ស្រុកសំរោងដែលមានទីតាំងនៅជិតកន្លែងលក់សម្លម្ជូរគ្រឿងនោះឱ្យកោះសន្តិភាពដឹងកាលពីពេល ថ្មីៗកន្លងមកថា អ្នកជួលរោងលក់សម្លម្ជូរគ្រឿងសាច់គោនៅថ្នល់ទទឹងមាន១៥រោង ។ រោងនៅពីខាងជើងថ្នល់មានចំនួន៦ ឯរោងនៅខាងត្បូងផ្លូវចូលទៅភ្នំេជីសូរមាន៥រោង ។ ចំណែកនៅខាងលិចផ្លូវជាតិលេខ២ មាន២រោង ។
ជារៀងរាល់ថ្ងែអ្នកដំណើរតាមដងផ្លូវជាតិលេខ២តែងតែចូលពិសាបាយសម្លម្ជូរគ្រឿងសាច់គោមុនបន្តដំណើរទៅមុខទៀត ។ អ្នកខ្លះមិននៅអង្គុយពិសាទេ តែងតែទិញសម្លម្ជូរគ្រឿងសាច់គោយកទៅទទួលទានជួបជុំក្រុមគ្រួសារនៅឯផ្ទះ ។ បើតាមអ្នកស្រីឈឿន ហុីម អាយុ៤២ឆ្នាំរស់នៅភូមិតាប៉ូនខាងកើត ឃុំសំរោងបាននិយាយរៀបរាប់ឲ្យដឹងថាគាត់បានជួលរោងដើម្បីលក់បាយ និងសម្លម្ជូរគ្រឿងសាច់គោនៅថ្នល់ទទឹងរយៈពេលជាង១០ឆ្នាំមកហើយ ។ រាល់ថ្ងែនេះគាត់ស្លម្ជូរគ្រឿងសាច់គោ៤ទៅ៥គីឡូក្រាម ជាទូទៅលក់អស់ តែមានពេលខ្លះក៏នៅសល់ដែរ ។ ភ្ញៀវខ្លះនៅអង្គុយហូបផ្ទាល់ ឯភ្ញៀវខ្លះបានទិញសម្លម្ជូរគ្រឿងសាច់គោយកទៅហូបជុំគ្រួសារនៅឯផ្ទះ ។
អ្នកស្រីឈឿន ហ៊ីម រំលឹកថា «បើតាម ចាស់ៗគាត់បាននិយាយ តៗគ្នាមកថា នៅថ្នល់ទទឹងនេះកាលពីជំនាន់សម្តេចតាមានយាយម្នាក់ឈ្មោះយាយអូន គាត់រស់នៅភូមិក្រាំងរអូត ឃុំសំរោងនេះ គាត់បានមកស្លសម្លម្ជូរសាច់គោលក់នៅទីនេះរាប់ឆ្នាំ ។ លុះក្រោយរបបប៉ុល ពត នៅឆ្នាំ១៩៨៥ ក៏មានប្រជាពលរដ្ឋយើងបានមកស្លសម្លម្ជូរសាច់គោតែ២ទៅ៣រោងប៉ុណ្ណោះលុះ ក្រោយៗមកក៏មានប្រជាពលរដ្ឋយើងរួមទាំងរូបគាត់ផងបាននាំគ្នាមកជួលរោងលក់សម្លម្ជូរសាច់គោរហូតមកដល់បច្ចុប្បន្ននេះ» ។
អ្នកលក់សម្លម្ជូរគ្រឿងសាច់គោនៅថ្នល់ទទឹងបានត្អូញត្អែរថា តម្លៃជួលរោងគឺខ្ពស់បន្តិចដោយនៅខាងត្បូងផ្លូវជួលពីប៉ូលិសស្រុក១រោងក្នុង១ខែ៨មុឺនរៀល ចំណែកខាងជើងផ្លូវជាដីឯកជន១រោងជួលក្នុង១ខែ៣០មុឺនរៀល ៕
ចែករំលែកព័តមាននេះ