ខេត្តក្រចេះ ៖ ប្រធានមន្ទីរសុខាភិបាលខេត្តលោក ឈ្នាង សុវត្ថា បានអះអាងប្រាប់ថា មន្ទីរជំនាញកំពុងតែសុំគោលការណ៍ទៅក្រសួង ដើម្បីបង្កើតគណៈកម្មការចុះត្រួតពិនិត្យលើទីតាំងមន្ទីរសម្រាកព្យាបាលឆ្នាំង២ បន្ទាប់ពីគ្លីនិកបម្រើរសេវាព្យាបាលឯកជនបានរងការចោទថា បានព្យាបាលបង្កឲ្យមានមនុស្សស្លាប់ដល់ទៅ២នាក់…
ខេត្តក្រចេះ ៖ ប្រធានមន្ទីរសុខាភិបាលខេត្តលោក ឈ្នាង សុវត្ថា បានអះអាងប្រាប់ថា មន្ទីរជំនាញកំពុងតែសុំគោលការណ៍ទៅក្រសួង ដើម្បីបង្កើតគណៈកម្មការចុះត្រួតពិនិត្យលើទីតាំងមន្ទីរសម្រាកព្យាបាលឆ្នាំង២ បន្ទាប់ពីគ្លីនិកបម្រើរសេវាព្យាបាលឯកជនបានរងការចោទថា បានព្យាបាលបង្កឲ្យមានមនុស្សស្លាប់ដល់ទៅ២នាក់ កាលពីពេលកន្លងទៅ ។
ការលើកឡើងបញ្ជាក់ពីជំហររបស់លោកប្រធានមន្ទីរសុខាភិបាលខេត្ត បានឲ្យដឹងនៅថ្ងៃទី០១ ខែមីនា បែបនេះ គឺបានធ្វើឡើងទៅតាមការបញ្ជាពី លោក កែវ សុជាតិ ព្រះរាជអាជ្ញាអមសាលាដំបូងខេត្ត ដែលលោកបានចេញបញ្ជាឲ្យមន្ទីរសុខាភិបាលក៏ដូចជាស្ថាប័នពាក់ព័ន្ធផ្សេងទៀត ត្រូវបង្កើតគណកម្មការបន្ទាន់មួយ ដើម្បីចុះស្រាវជ្រាវរកឲ្យឃើញនូវមរណភាព នៃជនរងគ្រោះបានស្លាប់ចំនួន២នាក់ នៅក្នុងមន្ទីរសម្រាកព្យាបាលនេះកាលពីពេលកន្លងមក ។
ថ្លែងនៅក្នុងពិធីសន្និបាតបូកសរុបការងារប្រចាំឆ្នាំរបស់ស្ថាបនតុលារ និងអយ្យការអមសាលាដំបូងខេត្ត ដែលបានធ្វើឡើងកាលពីថ្ងៃចុងខែកុម្ភៈ កន្លងទៅ ដោយពិធីនោះក៏មានវត្តមានមន្ត្រីនគរបាលយុត្តិធម៌ មកពីតាមបណ្តាស្ថាប័នអង្គភាពពាក់ព័ន្ធក្នុងខេត្តជាច្រើនចូលរួមផងដែរនោះ លោក កែវ សុជាតិ ព្រះរាជអាជ្ញាអសាលដំបូងខេត្តបានរំឭកថា មន្ទីរសម្រាកព្យាបាលឆ្នាំង២ អាចនឹងមានក្រុមគ្រូពេទ្យខ្វះបច្ចេកទេសវិជ្ជាជីវៈ ឬធ្វេសប្រហែសនឹងការងារ ទើបបណ្តាលឲ្យយ៉ាងតិចមានជនរងគ្រោះ២នាក់បានស្លាប់ ក្នុងនោះមានប្រុសម្នាក់ និងស្ត្រីម្នាក់ឈ្មោះ ហូ សុផល្លីន កាលអំឡុងឆ្នាំ២០១៧ ប៉ុន្តែខាងជំនាញរបស់មន្ទីរមិនទាន់រកឃើញពីមូលហេតុ នៃការស្លាប់របស់ជនរងគ្រោះនៅឡើយទេ ទោះជាករណីនេះគ្រួសារជនរងគ្រោះបានប្តឹងក៏ដោយ ។
គ្លីនិកឯកជនដែលមានយីហោ (មន្ទីរសម្រាកព្យាបាលឆ្នាំង២) មានទីតាំងស្ថិតក្នុងក្រុងក្រចេះ បានបើកបម្រើសេវាព្យាបាលជំងឺទូទៅ មានរយៈពេលជាច្រើនឆ្នាំមកហើយ ។ ហើយគ្លីនិកឯកព្យាបាលឯកជនមួយនេះ ក៏ត្រូវបានអ្នកទៅព្យាបាលបង្ហើបប្រាប់ថា បុគ្គលិកពេទ្យដែល បម្រើការងារក្នុងគ្លីនិកនេះ ភាគច្រើនជាជនជាតិវៀតណាមទៀតផង ៕
ចែករំលែកព័តមាននេះ