រាជធានភ្នំពេញ ៖ ទោះបីជាអតីតបក្សប្រឆាំងធ្លាប់ប្រកាន់ជំហរមិនបង្កើតគណបក្សថ្មីសម្រាប់ប្រកួតយ៉ាងសន្លឹកឆ្នោតយ៉ាងណាក្តី នេះជាសញ្ញាណមួយល្អសម្រាប់បក្សប្រឆាំងហើយ គឺគណបក្សកាន់អំណាចបានប្រកាសបើកភ្លើងខៀវឲ្យអតីតបក្សនេះបង្កើតគណបក្សនយោបាយថ្មីមួយ ដើម្បីប្រជែងសន្លឹកសម្រាប់ការបោះឆ្នោតថា្នក់ជាតិឆ្នាំ២០១៨ខាងមុខនេះ ។
ការប្រកាសបើភ្លើងខៀវនេះ ខណៈដែលការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដោយអវត្តមានអតីតគណបក្សសង្គ្រោះជាតិ ដែលបក្សប្រឆាំងត្រូវបាន តុលាការកំពូលរំលាយចោលកាលពីចុងឆ្នាំ២០១៧កន្លងមក ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថា មានមធ្យោបាយតែមួយ ដែលអាចមានលទ្ធភាព ក្នុងការចូលប្រកួតប្រជែងការបោះឆ្នោតជ្រើសតាំងតំណាងរាស្ដ្រឆ្នាំ២០១៨ខាងមុខបាន អតីតគណបក្សសង្គ្រោះជាតិ ទៅបង្កើតគណបក្សថ្មី ឲ្យត្រឹមត្រូវតាមគោលការណ៍ច្បាប់ ស្តីពីគណបក្សនយោបាយ បំពេញបែបបទឲ្យបានគ្រប់គ្រាន់ជាការស្រេច ។
អ្នកនាំពាក្យបក្សកាន់អំណាចបានឲ្យដឹងតាមសារតេឡេក្រោម នៅថ្ងៃទី០១ ខែមីនា ឆ្នាំ២០១៨ ថា គោលដៅរបស់ពួកប្រឆាំង ចង់បានការចូលរួមបោះឆ្នោតជ្រើសតាំងតំណាងរាស្ត្រនីតិកាលទី៦ នាខែកក្កដាខាងមុខ ដើម្បីសម្រេចមហិច្ឆតានេះ ពួកប្រឆាំងបានជ្រើសរើសយកមធ្យោបាយមួយ គឺស្នើឲ្យចៅហ្វាយនាយពួកគេ ដាក់គំនាបកៀបសង្កត់ មកលើរាជរដ្ឋាភិបាលកម្ពុជា តាមរយៈការរឹតបន្តឹងទិដ្ឋាការ ការគំរាមរឹបអូសទ្រព្យសម្បត្តិ លុយកាក់ នៅក្រៅប្រទេសរបស់មន្ត្រីជាន់ខ្ពស់របស់រាជរដ្ឋាភិបាល ការដាក់ទណ្ឌកម្មសេដ្ឋកិច្ចលើកម្ពុជាជាដើម ។ លោកបន្ដថា មធ្យោបាយបែបនេះ មិនអាចសម្រេចលទ្ធផល បានជាដាច់ខាត ដែលអាចហៅថា មធ្យោបាយខុសឆ្គងមួយយ៉ាងធំ ទោះបីខិតខំយ៉ាងណាក៏ដោយក៏មិនបានការដែរ ។
លោក សុខ ឥសាន បញ្ជាក់ថា «ដោយពិនិត្យឃើញមានមធ្យោបាយតែមួយគត់ ដែលអាចមានលទ្ធភាពក្នុងការចូលប្រកួតប្រជែងការបោះឆ្នោតជាតិនាពេលខាងមុខបាននោះ គឺបង្កើតគណបក្សថ្មីឲ្យត្រឹមត្រូវតាមគោលការណ៍ច្បាប់ ស្តីពីគណបក្សនយោបាយ បំពេញបែបបទឲ្យបានគ្រប់គ្រាន់ទៅជាការស្រេច» ។
លោកបន្តថា នេះគឺជាមធ្យោបាយផ្លូវច្បាប់ ដែលមន្ត្រីអតីតបក្សប្រឆាំង ក្រៅពី១១៨នាក់នោះ អាចធ្វើបានស្របតាមសិទ្ធិនយោបាយរបស់ពលរដ្ឋ ដែលមានចែងក្នុងរដ្ឋធម្មនុញ្ញ ។ លោកអះអាងថា បើប្រាប់ប៉ុណ្ណឹងហើយមិនជឿ ក៏ទៅតាមដំណើរទៅ បើចង់នៅរង់ចាំមើលលទ្ធផលដាក់ទណ្ឌកម្ម និងគំនាបមកលើរាជរដ្ឋាភិបាល ក៏ស្រេចនឹងចិត្តចុះ តែកុំយល់សុបិន្ដឲ្យសោះ គ្មានរឿងបែបនេះកើតឡើងទេ ។
យ៉ាងណាក្តី គេមិនទាន់ឃើញមានការលើកឡើងរបស់ក្រុមអតីតប្រឆាំងយ៉ាងណានោះទេ ក្នុងការសម្រេចរបស់ខ្លូនសម្រាប់ការបង្កើតគណបក្សថ្មី ដូចអ្វីបក្សកាន់អំណាចប្រកាសបើកផ្លូវ ដើម្បីអាចូលរួមប្រកួប្រជែងសន្លឹកឆ្នោតនៅពេលខាងមុខនេះនៅឡើយទេ ។
ទាក់ទិននឹងការបើកភ្លើងខៀវនេះដែរ បើតាមអ្នកតាមដានស្ថានការណ៍សង្គមនាំគ្នាលើកឡើងថា ជាសញ្ញាមួយល្អសម្រាប់អតីតបក្សប្រឆាំងហើយក្នុងការទាមទារយុត្តិធម៌ពីសម្ចាស់ឆ្នោត ជាជាងដើរស្រែកពីខាងក្រៅ ដែលខុសនឹងច្បាប់ប្រទេស ។ ព្រោះថាប្រទេសនីមួយៗសុទ្ធតែមានអធិបតីភាពរាងៗខ្លួន ដោយគ្មានប្រទេសណាមួយគាប់សង្កត់ជ្រាលជ្រែកកិច្ចការផ្ទៃក្នុងបាននោះទេ ។
អ្នកទាំងនោះបានលើកឡើងទៀតថា ប្រសិនបើអតីតបក្សប្រឆាំងបង្កើតគណបក្សថ្មីមែននោះគួរយកកម្មវិធី និងគំនិតអតីតបក្សសង្គ្រោះជាតិ ព្រោះថាគោលនយោបាយក៏ដូចជាគំនិតរបស់គណបក្សនេះត្រូវបានប្រជាពលរដ្ឋចូលចិត្ត និងគាំទ្រ ។ យ៉ាងណាក្តីអ្នកវិភាគប្រកាន់ជំហរកណ្តាលលើកឡើងថា ក្រុមអតីតបក្សប្រឆាំងគួរចៀសវាងយកបរទេសមកដាក់គំនាមមកកម្ពុជា ព្រោះថាអ្នកដែលពិបាកនោះគឺប្រជាពលរដ្ឋ ។ ហើយគួរប្រើប្រាស់យុទ្ធសាស្ត្រណាដែលធ្វើ ឲ្យប្រទេសរីកចម្រើនជាមួយគ្នា ដោយកំគិតតែពីចង់បានអំណាចដឹកនាំប្រទេសនោះវាមិនល្អឡើ យ ។
សូមបញ្ជាក់ថា ក្រោយមានការកៀរគពីក្រុមអតីតបក្សសង្គ្រោះជាតិ សហភាពអឺរ៉ុប (EU) បានព្រមានដាក់ទណ្ឌកម្មផ្នែកពាណិជ្ជកម្ម ដោយពិនិត្យឡើងវិញ ពីការទិញទំនិញពីប្រទេសកម្ពុជា បើរាជរដ្ឋាភិបាលកម្ពុជាមិនព្រមដោះលែង លោក កឹម សុខា មិនឲ្យគណបក្សសង្គ្រោះជាតិ ដំណើការឡើងវិញ មិនព្រមរៀបចំការបោះឆ្នោតត្រឹមត្រូវ ដោយមានគណបក្សសង្គ្រោះជាតិចូលរួម ។ ក្នុងនោះក៏មានសហរដ្ឋអាមេរិកផងដែរ ក៏បានប្រកាសផ្ដាច់ជំនួយមកកម្ពុជាមួយចំនូនផងដែរ ៕
ចែករំលែកព័តមាននេះ