ខេត្តបាត់ដំបង ៖ករណីចោរកម្មដែលសមត្ថកិច្ចអះអាងថា ជនប្រព្រឹត្ត គឺជាមុខសញ្ញាដដែលៗ ដែលបង្ក្រាបមិនបាន ពិសេសក្រុមចោរកាច់សោ.កលួចម៉ូតូពេលនេះហាក់កំពុងបង្កើនសកម្មភាពកាន់តែខ្លាំងឡើងៗ នៅក្នុងក្រុងបាត់ដំបង ដែលពលរដ្ឋកំពុងបង្ហាញក្ដីបារម្ភយ៉ាងខ្លាំង អំពីបញ្ហាអសន្តិសុខ នៅក្នុងមូលដ្ឋាន ខណៈកម្លាំងសមត្ថកិច្ច ទាំងកងរាជអាវុធហត្ថ ទាំងនគរបាល ហាក់បាត់បង់ម្ចាស់ការក្នុងការទប់ស្កាត់ ឬបង្ក្រាបជនទុច្ចរិតដែលប្រព្រឹត្តបទល្មើសទាំងនេះ ។
ជាក់ស្ដែងគ្រាន់តែរយៈពេល៣ថ្ងៃកន្លងទៅនេះ ជនទុច្ចរិតបានកាច់សោ.កលួចយកម៉ូតូរបស់ប្រជាពលរដ្ឋអស់ចំនួន៣គ្រឿង ជាបន្តបន្ទាប់ នៅក្នុងក្រុងបាត់ដំបង ។ ករណីខ្លះសកម្មភាពរបស់ជនប្រព្រឹត្តមានជាប់នៅក្នុងកាមេរ៉ាសុវត្ថិភាពទៀតផង តែសមត្ថកិច្ចជំនាញហាក់មិនអាចកំណត់ភិនភាគ នៃជនសង្ស័យនេះបានឡើង ។ ប៉ុន្តែបានអះអាងភូតកុហក់ប្រាប់ថ្នាក់ដឹកនាំថា «មានតម្រុយហើយ» ។
ជុំវិញអំពើចោរកម្មទាំង៣ លើកជាបន្តបន្ទាប់ខាងលើនេះ បើតាមរបាយការណរបស់សមត្ថកិច្ចបានឲ្យដឹងថា លើកទី១ ចោរបានដើរចូលទៅកាច់សោ.កលួចយកម៉ូតូមួយគ្រឿង នៅវេលាម៉ោង៦និង៣៤នាទីព្រលប់ ថ្ងៃទី២៧ ខែកុម្ភៈ ដែលទុកនៅខាងមុខហាងលក់សម្លៀកបំពាក់យីហោ «សុខ យុទ្ធ» នៅជាប់ផ្លូវលេខ១ ស្ថិតក្នុងភូមិ២០ឧសភា សង្កាត់ស្វាយប៉ោ ក្រុងបាត់ដំបង ។ ម៉ូតូនោះ ពណ៏៍ខ្មៅពាក់ស្លាកលេខ1W -9495 ដែលម្ចាស់ឈ្មោះ សូរ ប្រសិទ្ធិ ភេទប្រុស អាយុ៣១ឆ្នាំ នៅភូមិព្រែកស្នោរ ឃុំព្រែកខ្ពប ស្រុកឯកភ្នំ ខណៈជនរងគ្រោះចូលទិញទំនិញ ។
សមត្ថកិច្ចបានបញ្ជាក់ថា សកម្មភាពជនសង្ស័យបានជាប់នៅក្នុងកាមេរ៉ាសុវត្ថិភាពរបស់ម្ចាស់ហាង ។
ដោយឡែកករណីលើកទី២ ខណៈដែលសមត្ថកិច្ចជំនាញទាំង២ស្ថាប័ន កំពុងពិនិត្យរូបជនសង្ស័យលើកាមេរ៉ាសុវត្ថិភាព និងកំពុងធ្វើការស្រាវជ្រាវ ស្រាប់នៅតែនៅវេលាម៉ោង៧និង៣នាទីព្រឹកថ្ងៃទី២៨ ខែកុម្ភៈ មានការផ្អើលឆោឡោថា ចោរបានកាច់សោ.កលួចយកម៉ូតូមួយគ្រឿងទៀត នៅក្បែរសាលាបឋមសិក្សា២ធ្នូ ស្ថិតក្នុងភូមិកំពង់ក្របី សង្កាត់ស្វាយប៉ោ ក្រុងបាត់ដំបង ។ ម៉ូតូនោះ សេ១២៥ ពណ៍ខ្មៅ ស៊េរីឆ្នាំ២០១៧ ពាក់ស្លាកលេខ1Y-2728 ដែលមានម្ចាស់ឈ្មោះ ប៉ោ ងួន ភេទស្រី អាយុ៤៥ឆ្នាំ នៅភូមិរំចេក៤ សង្កាត់រតនៈ ក្រុងបាត់ដំបង ដែលគាត់ដឹកកូនទៅសាលាហើយ ទុកម៉ូតូនៅខាងក្រៅរបង ។
ខណៈសមត្ថកិច្ចកំពុងវិល និងអំពើចោរកម្ម២ករណីខាងលើនេះ ដែលមិនទាន់មានតម្រុយអំពីមុខសញ្ញាផង ស្រាប់តែករណីទី៣ បានផ្ទុះឡើងមួយលើកទៀតនៅម៉ោង៦និង៣០នាទីព្រឹក ថ្ងៃទី០១ ខែមិនានេះ នៅក្នុងវត្តដំរីស ដែលលើកទី៣នេះ បានកើតឡើងនៅទល់មុខទីបញ្ញាការកងរាជអាវុធហត្ថខេត្តតែម្ដង ។ ម៉ូតូដែលចោរលួចនោះពណ៍ស្មៅ ស៊េរីឆ្នាំ២០១៦ ពាក់ស្លាកលេខ បាត់ដំបង 1V-2336 ដែលម្ចាស់ឈ្មោះ ទូច ភ័ណ្ឌ ភេទស្រី អាយុជាង៥០ឆ្នាំ នៅភូមិកម្មករ សង្កាត់ស្វាយប៉ោ ក្រុងបាត់ដំបង ។
ជនរងគ្រោះបាននិយាយថា ថ្ងៃបាត់ម៉ូតូនោះ គឺជាថ្ងៃសីលដែលគាត់បានយកចង្ហាន់ទៅវត្ត។ គាត់បានបញ្ជាក់ថា ពេលនោះគាត់ទុកម៉ូតូនៅក្បែរសាលាឆាន់ក្នុងវត្តដំរីស ។ លុះប្រគេនចង្ហាន់លោករួច ចេញមកវិញក៏បាត់ម៉ូតូតែម្ដង ហើយគាត់បានប្ដឹងទៅកងរាជអាវុធហត្ថនៅទល់មុខវត្តនោះភ្លាមៗដែរ ។
ជុំវិញករណីនេះ បើតាមមន្ត្រីកងរាជអាវុធហត្ថមួយរូបបានឲ្យដឹងថា ក្រុមជនទុច្ចរិតហាក់កំពុងបង្កើនសកម្មភាពយ៉ាងខ្លាំងក្នុងរយៈពេលប៉ុន្មានខែចុងក្រោយនេះ រីឯវិធានការទប់ស្កាត់ ឬការបង្ក្រាបរបស់សមត្ថកិច្ច ហាក់នៅមានកម្រិតទាបបំផុត ។ មន្ត្រីរូបនេះបានលើកឡើងថា របាយការណ៍របស់មន្ត្រីជំនាញសុទ្ធតែបានរាយការណ៍អំពីភាពវិជ្ជមាន ក្នុងការកំណត់មុខសញ្ញា ។ ប៉ុន្តែរហូតមកដល់ពេលនេះ មុខសញ្ញាចាស់ក៏គ្មានតម្រុយ រីឯមុខសញ្ញាថ្មីក៏កាន់តែបង្កើនសកម្មភាពស្ទើររាល់ថ្ងៃរាល់យប់ ។
ជាមួយនឹងបទល្មើសដែលកើតឡើងជាបន្តបន្ទាប់ ហើយបង្ក្រាបមិនបាននេះ លោកប៉ាង ហៀង អធិការក្រុងបាត់ដំបងបានអះអាងដដែលៗដែរថា បើតាមការស្រាវជ្រាវ ជនប្រព្រឹត្ត គឺជាមុខសញ្ញាដដែលៗ ។ ប៉ុន្តែលោកអធិការមិនបានបញ្ជាក់ប្រាប់អំពីវិធានការទប់ស្កាត់ ឬវិធានការតាមបង្ក្រាបជនប្រព្រឹត្តនោះទេ ដោយលោកបានបញ្ចប់ត្រឹមពាក្យថា «មន្ត្រីជំនាញកំពុងធ្វើការស្រាវជ្រាវបន្ត » ៕
ចែករំលែកព័តមាននេះ