រាជធានីភ្នំពេញ ៖ នៅប៉ុន្មានឆ្នាំចុងក្រោយនេះ គេសង្កេតឃើញថា ពលរដ្ឋកម្ពុជាបានប្រើប្រាស់បណ្តាញទំនាក់ទំនងសង្គមជាច្រើនប្រភេទដូចជា Facebook, Telegram, WhatsApp, Line និង Instagram ជាដើម ។ ការមកដល់នៃបច្ចេកវិទ្យាបណ្ដាញទំនាក់ទំនងសង្គមនេះ បានផ្ដល់ឱកាសដល់ពលរដ្ឋកម្ពុជា ទទួលបានការងារពីក្រុមហ៊ុនបរទេសដែលចូលមកពង្រីកទីផ្សារនៅកម្ពុជា ។
បើតាមតំណាងក្រុមហ៊ុន Viber បានឱ្យដឹងថា ការចាប់ផ្តើមនៅកម្ពុជា រាល់ការបង្កើតគំនិតថ្មីដូចជា រូបស្ទិកឃើ (Stickers) ដែលមាននៅក្នុងApp របស់Viber ផ្ញើទៅឱ្យគ្នាទៅវិញទៅមកនេះ គឺបង្កើតឡើងដោយអ្នកឌីហ្សាញកម្ពុជា ។
លោក Anubhav Nayyar តំណាងក្រុមហ៊ុននេះ បានមានប្រសាសន៍កាលថ្ងៃទី២៦ កុម្ភៈ ថា ៖« ការបង្កើតថ្មីមួយជារូបស្ទិកឃើនៅក្នុងApp ដែលផ្ញើឱ្យគ្នាទៅវិញទៅមកនេះ ត្រូវបានដោនឡូតចំនួន២០ម៉ឺនដោនឡូត ។ ចំណុចពិសេសរបស់ស្ទិកឃើនេះ គឺបង្កើតឡើងដោយអ្នកឌីហ្សាញកម្ពុជា ។ នេះគឺជាឱកាសមួយដែលក្រុមហ៊ុនផ្តល់ឱកាសការងារដល់ពលរដ្ឋក្នុងស្រុក » ។
លោកបញ្ជាក់ថា ៖« មូលហេតុដែលធ្វើឱ្យក្រុមហ៊ុន Viber ចូលមកកម្ពុជា គឺផ្អែកលើកត្តាសំខាន់ៗចំនួន៣ ៖ ១-កម្ពុជាមានប្រជាពលរដ្ឋវ័យក្មេងច្រើន នៅពេលអនាគត ពួកគាត់មានចំណូលនឹងចាប់ផ្តើមប្រើប្រាស់Viberច្រើន ។ ២-ទូរស័ព្ទស្មាតហ្វូន និងសេវាអ៊ីនធើរណេតនៅកម្ពុជាមានតម្លៃថោក ហើយមានអ្នកប្រើប្រាស់គ្រប់កម្រិត និង៣-ប្រទេសកម្ពុជាមានការអភិវឌ្ឍជាលំដាប់ ប្រជាពលរដ្ឋចាប់ផ្តើមមានចំណូលកើនឡើង និងធ្វើដំណើរទៅក្រៅប្រទេសច្រើន ខណៈនៅពេលបច្ចុប្បន្ន App មានពលរដ្ឋកម្ពុជាដោនឡូតចំនួនប្រមាណ២លាននាក់ » ។
លោកបន្តថា ផ្អែកលើចំណុចសំខាន់ខាងលើនេះ ពេលក្រុមហ៊ុនចូលមកផ្សព្វផ្សាយនៅកម្ពុជានោះ នឹងមានអ្នកដោនឡូតប្រើប្រាស់កើនឡើងបន្ថែមទៀត ។
លោកបណ្ឌិត ខូវ មករា មន្ត្រីអ្នកនាំពាក្យ ក្រសួងប្រៃសណីយ៍ និងទូរគមនាគមន៍ បានស្វាគមន៍ចំពោះក្រុមហ៊ុនបរទេសចូលមកវិនិយោគនៅកម្ពុជា ហើយសង្ឃឹមថា ការចូលមកវិនិយោគ និងធ្វើអាជីវកម្ម នឹងជំរុញការប្រើប្រាស់បច្ចេកវិទ្យាដែលមានស្រាប់ ដើម្បីលើកកម្ពស់ប្រព័ន្ធទំនាក់ទំនងដល់ប្រជាជនទូទៅ» ។
លោកបានថ្លែងតាមទូរស័ព្ទកាលពីថ្ងៃទី២៨ កុម្ភៈ ថា ៖« ក្រុមហ៊ុនបច្ចេកវិទ្យាចូលមកកម្ពុជា វាជាសញ្ញាល្អ មានន័យថា អ្នកវិនិយោគឬក្រុមហ៊ុនបរទេសគាត់ចាប់អារម្មណ៍ ជឿជាក់លើទីផ្សារ និងភាពនឹងនររបស់ប្រទេសយើង។ សម្រាប់យើងនេះជាការល្អ ហើយយើងសូមស្វាគមន៍ និងសង្ឃឹមថា ការរកស៊ីរបស់ពួកគាត់នៅស្រុកខ្មែរទទួលបានជោគជ័យ » ។
ទន្ទឹមនឹងការប្រើប្រាស់បណ្តាញទំនាក់ទំនងសង្គមនៅកម្ពុជាមានការរីកចម្រើន តាមមន្ត្រីអ្នកនាំពាក្យក្រសួងប្រៃសណីយ៍ថា ជាធម្មតា ការប្រកួតប្រជែងតែងតែមាន ។ ទោះជាយ៉ាងណាក៏ដោយ វាអាស្រ័យទៅលើចំណុចខ្លាំង និងចំណុចល្អរបស់ក្រុមហ៊ុន ដើម្បីទាក់ទាញឱ្យប្រជាពលរដ្ឋប្រើប្រាស់នូវផលិតផលទៅតាមអ្វីដែលអាចធ្វើទៅបាន។
លោកលើកឡើងថា តាមស្ថិតិ និងព័ត៌មានបឋមកាលពីឆ្នាំ២០១៧ អ្នកប្រើប្រាស់ទូរស័ព្ទមានប្រមាណ១៣៥%នៃចំនួនប្រជាពលរដ្ឋសរុប ហើយនៅក្នុងចំណោមនោះដែរ អ្នកដែលប្រើប្រាស់ទូរស័ព្ទដៃចល័តមានប្រមាណ៦៧%នៃចំនួនប្រជាពលរដ្ឋកម្ពុជាសរុប៕
ចែករំលែកព័តមាននេះ