រាជធានីភ្នំពេញ ៖ ថ្នាក់ដឹកនាំជាន់ខ្ពស់របស់គណបក្សប្រជាជនកម្ពុជា (CPP) បានលើកឡើងថា កម្ពុជាមិនមានការព្រួយបារម្មណ៍ចំពោះការគម្រាមគំហែងណាមួយ លើសេដ្ឋកិច្ចកម្ពុជាពីប្រទេសមហាអំណាចនោះទេ ព្រោះកម្ពុជាធ្លាប់បានហែលឆ្លងរួចអស់ហើយ នូវហ៊ុំព័ទ្ធសេដ្ឋកិច្ចពីប្រទេសមហាអំណាចមួយចំនួនកាលពីអតីតកាល ។…
រាជធានីភ្នំពេញ ៖ ថ្នាក់ដឹកនាំជាន់ខ្ពស់របស់គណបក្សប្រជាជនកម្ពុជា (CPP) បានលើកឡើងថា កម្ពុជាមិនមានការព្រួយបារម្មណ៍ចំពោះការគម្រាមគំហែងណាមួយ លើសេដ្ឋកិច្ចកម្ពុជាពីប្រទេសមហាអំណាចនោះទេ ព្រោះកម្ពុជាធ្លាប់បានហែលឆ្លងរួចអស់ហើយ នូវហ៊ុំព័ទ្ធសេដ្ឋកិច្ចពីប្រទេសមហាអំណាចមួយចំនួនកាលពីអតីតកាល ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី១ ខែមិនា ឆ្នាំ២០១៨ថា ៖ «សូមទាញអារម្មណ៍ថា បច្ចុប្បន្ននេះនៅលើពិភពលោកនេះមិនមែនមានតែប៉ូលមួយផ្តាច់មុខនោះទេ មិនមែនដូចនៅក្នុងទស្សរត្សរ៍ទី១៩៧៩ ទេ ។ ចំណែកប្រជាជនកម្ពុជាក៏ធ្លាប់ភ្លក្សរសជាតិការហ៊ុមព័ទ្ធ និងការគាបសង្កត់សេដ្ឋកិច្ចដ៏ជូរចត់ពីមហាអំណាចលោកខាងលិចរួចហើយ ដោយសារតែកាន់ជើងពួកខ្មែរក្រហមប៉ុលពត តែកម្ពុជានៅតែអាចរស់បាន រហូតដល់សព្វថ្ងៃ មានការអភិវឌ្ឈន៍រីកចម្រើនលើគ្រប់វិស័យ កម្ពុជាមិនញញើតចំពោះការគាបសង្កត់ដោយអយុត្តិធម៌ណាមួយ ជាដាច់ខាត» ។
អ្នកនាំពាក្យរូបនេះមានប្រសាសន៍បន្តថា កម្ពុជានៅតែប្តេជ្ញាដើរតាមគន្លងលទ្ធិប្រជាធិបតេយ្យ និងនីតិរដ្ឋជានិច្ច ដែលជាស្មារតីនៃកិច្ចព្រមព្រៀងទីក្រុងប៉ារីសថ្ងៃទី២៣ តុលា ១៩៩១ ។ ដូច្នេះក្តីសង្ឃឹមថា យកការគាបសង្កត់ និងវិធានការណ៍ដាក់ទណ្ឌកម្មសេដ្ឋកិច្ចបែបណា មកអនុវត្តលើរាជរដ្ឋាភិបាលកម្ពុជា ដើម្បីចាប់បង្ខំឲ្យមានការចរចាជាមួយពួកល្មើសច្បាប់ និងពួកឧទ្ទាមក្រៅច្បាប់នោះ មិនយកបាន និងក្លាយជាការពិតដែរ ។
ហេតុនេះក្តីសង្ឃឹមរបស់ពួកជនក្រៅច្បាប់នោះ មិនអាចចេញជារូបរាងបានជាដាច់ខាត ។ ការលើកឡើងរបស់មន្ត្រីជាន់ខ្ពស់នៃបក្សកាន់អំណាចដែលដឹកនាំរដ្ឋាភិបាលជាង៣០ឆ្នាំមកនេះ ដោយសារតែកម្ពុជាមានបង្អែកដ៏ធំ និងរឹងមាំ គឺប្រទេសចិនដែលជាមហាមិត្តកម្ពុជា និងប្រទេសមួយចំនួនទៀតដែលគាំទ្រជំហរកម្ពុជា ។ លើសនេះការបង្ហាញជំហរមន្ត្រីអ្នកនាំពាក្យខាងលើ ក្រោយអតីតមន្ត្រីបក្សប្រឆាំងដែលបានប្រព្រឹត្តបទល្មើសធ្ងន់ធ្ងរ ហើយដែលត្រូវតុលាការកំពូលកាត់សេចក្តីរំលាយចោល និងផ្អាកសកម្មភាពនយោបាយរយៈពេល៥ឆ្នាំ ពួកគេមិនទទួលស្គាល់ការពិតនៃអំពើល្មើសច្បាប់របស់ខ្លួន ក្នុងសកម្មភាពអនុវត្តផែនការផ្តួលរំលំរាជរដ្ឋាភិបាលកម្ពុជាស្របច្បាប់ តាមរូបភាពបដិវត្តន៍ពណ៌ រំលងលទ្ធិប្រជាធិបតេយ្យដែលជាស្មារតីនៃកិច្ចព្រមព្រៀងទីក្រុងប៉ារីសថ្ងៃទី២៣ តុលា ១៩៩១ ។
លោកបន្តថា ដើម្បីឲ្យរស់ឡើងវិញ ពួកអាយ៉ងធ្វើបដិវត្តន៍ពណ៌ត្រូវបរាជ័យ បានខិតខំកៀរគចៅហ្វាយនាយរបស់ខ្លួនឲ្យដាក់ទណ្ឌកម្ម លើរាជរដ្ឋាភិបាលកម្ពុជា ក្នុងគោលបំណងគាបសង្កត់ឲ្យមានការចរចាជាមួយពួកគេ បានរស់ឡើងវិញ និងបានចូលរួមក្នុងការបោះឆ្នោតតំណាងរាស្ត្រនាថ្ងៃទី២៩ ខែកក្កដា ឆ្នាំ២០១៨ នេះ ៕
ចែករំលែកព័តមាននេះ