រាជធានីភ្នំពេញ ៖ បច្ចុប្បន្ន នៅប្រទេសកម្ពុជា មានក្រុមហ៊ុនផ្គត់ផ្គង់សេវាទូរស័ព្ទទាំងចល័ត និងអចល័តប្រមាណជិត២០ដែលកំពុងផ្ដល់សេវាដល់ប្រជាពលរដ្ឋទូទាំងប្រទេស ។ យ៉ាងនេះក្ដី មានក្រុមហ៊ុនធំៗតែ៣ប៉ុណ្ណោះដែលឈានមុខគេ ។…
រាជធានីភ្នំពេញ ៖ បច្ចុប្បន្ន នៅប្រទេសកម្ពុជា មានក្រុមហ៊ុនផ្គត់ផ្គង់សេវាទូរស័ព្ទទាំងចល័ត និងអចល័តប្រមាណជិត២០ដែលកំពុងផ្ដល់សេវាដល់ប្រជាពលរដ្ឋទូទាំងប្រទេស ។ យ៉ាងនេះក្ដី មានក្រុមហ៊ុនធំៗតែ៣ប៉ុណ្ណោះដែលឈានមុខគេ ។
ថ្មីៗនេះ យោងតាមរបាយការណ៍របស់ក្រុមហ៊ុនOpenSignal ជាស្ថាប័នអន្តរជាតិដែលមានឯកទេសក្នុងបណ្ដាញទូរស័ព្ទចល័ត មានមូលដ្ឋាននៅទីក្រុងឡុងដ៍ ចក្រភពអង់គ្លេស បានចេញរបាយការណ៍មួយដោយរកឃើញថា នៅកម្ពុជា មានប្រតិបត្តិករតែមួយគត់ គឺក្រុមហ៊ុន Cellcard ដែលបានដាក់ចេញនូវការប្រើប្រាស់ប្រព័ន្ធអ៊ីនធើរណេតល្បឿនលឿន4G នាំមុខគេ ។
របាយការណ៍ដែលបានចេញផ្សាយកាលពីថ្ងៃទី២៣ កុម្ភៈ បានបញ្ជាក់ថា ៖« បន្ទាប់ពីបានពិនិត្យទៅលើទីផ្សារទូរស័ព្ទចល័តនៅកម្ពុជាឡើងវិញនារយៈពេល៦ខែចុងក្រោយនេះ យើងបានរកឃើញថាCellcard នៅតែជាក្រុមហ៊ុនឈានមុខគេ មិនត្រឹមតែល្បឿននៃការប្រើប្រាស់ប្រព័ន្ធ 4Gប៉ុណ្ណោះទេ ថែមទាំងមានប្រតិបត្តិការជាច្រើនទៀត » ។
ការធ្វើតេស្ដបានរកឃើញថា ក្រុមហ៊ុន Cellcard បានហក់ឡើងកំពូលតារាងចំណាត់ថ្នាក់នៃការដាក់ឱ្យប្រើប្រាស់ប្រព័ន្ធ 4G របស់OpenSignal ដោយការទាញយកឯកសារ ឬអ្វីផ្សេងៗពីប្រព័ន្ធអុីនធើរណេតLTE មានល្បឿនរហូតដល់១៩,៤មេហ្គាប៉ៃ ។
យ៉ាងណាមិញ របាយការណ៍ក៏បានរកឃើញថា ក្រុមហ៊ុន Smart Axiata បាននិងកំពុងតែវិវត្តន៍នៃការដំណើរល្បឿនអុីនធើរណេតរបស់ខ្លួន ស្ទើរតែដូចក្រុមហ៊ុនCellcardដែរនារយៈពេល៦ខែចុងក្រោយនេះ ខណៈដែលប្រតិបត្តិការប្រព័ន្ធ4G របស់ក្រុមហ៊ុន Metfone បានកើនឡើងគួរឱ្យកត់សម្គាល់ក្នុងរយៈពេល៦ខែដូចគ្នា ដោយបានកើនឡើងពី៥៥,៩% ទៅ៦៩,៨% ។ កំណើននេះ គឺគ្រប់គ្រាន់សម្រាប់ក្រុមហ៊ុន Metfone ក្នុងការប្រៀបធៀបខ្លួនទៅនឹងក្រុមហ៊ុន Cellcard និងក្រុមហ៊ុន Smart ។ បើទោះជាក្រុមហ៊ុន Metfone កំពុងដាក់ឱ្យមានដំណើរការសេវា 4G ជាមួយគូប្រជែងរបស់ខ្លួនក្តី ប៉ុន្តែល្បឿន LTE របស់ក្រុមហ៊ុននេះនៅតែយឺតដដែល ។
ក្រុមហ៊ុន OpenSignal និយាយថា ៖«យើងបានរកឃើញថា ការទាញយកឯកសារឬអ្វីផ្សេងៗពីប្រព័ន្ធអុីនធើរណេតរបស់ក្រុមហ៊ុន Metfone ដោយការប្រើប្រាស់ប្រព័ន្ធ4G គឺមានទំហំ៣,៥មេហ្គាប៉ៃ ដែលនេះគ្រាន់តែជាមួយភាគនៃល្បឿនអីុនធើរណេតគូប្រជែងរបស់ខ្លួនប៉ុណ្ណោះ » ។
« ថ្វីដ្បិតតែក្រុមហ៊ុន Smart និងក្រុមហ៊ុន Metfone មានការរីកចម្រើនគួរឱ្យកត់សម្គាល់ក្នុងអំឡុងពេលធ្វើតេស្តចុងក្រោយបំផុតរបស់យើងក្តី ប៉ុន្តែក្រុមហ៊ុន Cellcard នៅតែឈានមុខដដែលតាមការវាស់ស្ទង់របស់យើង ។ ចំពោះប្រតិបត្តិករគ្រប់គ្រងដោយក្រុមហ៊ុន CamGSM មិនត្រឹមតែស្ថិតក្នុងចំណោមក្រុមហ៊ុនផ្តល់សេវាល្បឿនលឿន4G របស់យើងប៉ុណ្ណោះទេ ថែមទាំងទទួលបានការកោតសរសើរលើប្រតិបត្តិការប្រព័ន្ធ3G និងរង្វាស់ល្បឿនសរុបផ្សេងៗទៀត»។ នេះជាការបញ្ជាក់របស់ក្រុមហ៊ុន ។
គួរបញ្ជាក់ថា ក្រុមហ៊ុន OpenSignal បានធ្វើការវាស់ស្ទង់បទពិសោធន៍ជាក់ស្តែងរបស់អ្នកប្រើប្រាស់លើបណ្តាញទូរស័ព្ទចល័ត ប្រដូចទៅនឹងជីវភាពរស់នៅប្រចាំថ្ងៃរបស់ពួកគេ។ ក្រុមហ៊ុនប្រមូលបាន២ប៊ីលានទិន្នន័យពីការវាស់ស្ទង់ប្រចាំថ្ងៃពីអ្នកប្រើប្រាស់ទូរស័ព្ទចល័តលើពិភពលោក រាប់លានគ្រឿង ។
ការវាស់ស្ទង់របស់ក្រុមហ៊ុនធ្វើឡើងគ្រប់ម៉ោងក្នុង១ថ្ងៃ រាល់ថ្ងៃក្នុង១ឆ្នាំ ស្ថិតក្រោមលក្ខខណ្ឌនៃការប្រើប្រាស់ធម្មតា រួមទាំងការប្រើប្រាស់នៅក្នុង-ក្រៅអគារ ទីក្រុង-ជនបទ និងគ្រប់ទីកន្លែង ។ ដោយការវិភាគទៅលើឧបករណ៍វាស់ស្ទង់ដែលបានកំណត់នៅតាមកន្លែងនៃអ្នកប្រើប្រាស់រស់នៅ ធ្វើការ និងធ្វើដំណើរ ក្រុមហ៊ុនបានធ្វើការរាយការណ៍អំពីសេវាបណ្តាញទូរស័ព្ទចល័តនូវរបៀបនៃអ្នកប្រើប្រាស់កំពុងជួបប្រទះ។
ជាក់ស្ដែង ទិន្នន័យដែលប្រមូលបានចំនួន១០១.៤៥២.៦១៨ ត្រូវបានប្រមូលពីអ្នកប្រើប្រាស់ចំនួន១១.៩១២នាក់ ក្នុងអំឡុងពីថ្ងៃទី២ តុលា ដល់ថ្ងៃទី៣១ ខែធ្នូ ឆ្នាំ២០១៧ ហើយក្រុមហ៊ុនកំពុងបន្តសម្របសម្រួល និងកែប្រែវិធីសាស្ត្រដើម្បីឱ្យបានល្អបំផុតទៅតាមបម្លាស់ប្តូរនៃអតិថិជនលើការប្រើប្រាស់បណ្តាញទូរស័ព្ទចល័ត និងការប្រៀបធៀបនៃរបាយការណ៍លទ្ធផលមុនៗ ។
តាមរបាយការណ៍ក្រសួងប្រៃសណីយ៍ និងទូរគមនាគមន៍កម្ពុជា នៅឆ្នាំ២០១៦ មានក្រុមហ៊ុនទូរស័ព្ទចល័តចំនួន៩ និងអចល័តចំនួន៩ដែលបានចុះបញ្ជីផ្គត់ផ្គង់សេវាទូរស័ព្ទនៅកម្ពុជា។ ចំណែកក្រុមហ៊ុនផ្គត់ផ្គង់សេវាអ៊ីនធើរណេតអចល័តនៅកម្ពុជាមានចំនួន៣៣ក្រុមហ៊ុន និងចល័តមានចំនួន៦ក្រុមហ៊ុន ៕
ចែករំលែកព័តមាននេះ