ខេត្តព្រៃវែង ៖ ជនពាលមួយក្រុមមានគ្នា៣នាក់ ត្រូវបានកម្លាំងនគរបាលប៉ុស្តិ៍រដ្ឋបាលឃុំច្រេស ក្របួចចាប់បាន បន្ទាប់ពីពួកគេនាំគ្នាពួនស្ទាក់ចាំវាយអ្នកដំណើរតាមផ្លូវ តែអស់លក្ខណ៍ប៉ះចំកម្លាំងប៉ូលិសកំពុងចេញដើរល្បាត ។ ហេតុការណ៍នេះបានកើតឡើងកាលពីវេលាម៉ោង៨និង៣៥នាទីយប់ថ្ងៃទី២៧ ខែកុម្ភៈ នៅតាមដងផ្លូវលំមួយកន្លែងខាងកើត ភូមិអង្គព្រះ ឃុំច្រេស ស្រុកមេសាង ខេត្តព្រៃវែង ។
ក្រុមជនពាលដែលត្រូវបានចាប់ខ្លួនទាំង៣នាក់នេះទី១- ឈ្មោះ ជ័យ ញា ភេទប្រុស អាយុ២៨ឆ្នាំ មានទីលំនៅក្នុងភូមិចំការកោះ ឃុំសម្បត្តិមានជ័យ ស្រុករមាសហែក ខេត្តស្វាយរៀង ។ ទី២- ឈ្មោះ លាង យុទ្ធ ភេទប្រុស អាយុ២៧ឆ្នាំ មានទីលំនៅក្នុងភូមិកើតហេតុ និងទី៣- ឈ្មោះ យ៉យ យោង ភេទប្រុស អាយុ២៧ឆ្នាំ មានទីលំនៅក្នុងភូមិបឹងអន្ទង់ ឃុំច្រេស ស្រុកមេសាង ខេត្តព្រៃវែង ។
ប្រភពព័ត៌មានពីមន្ត្រីនគរបាលប៉ូស្តិ៍រដ្ឋបាលឃុំច្រេសបានឲ្យដឹងថា មុនពេលកើតហេតុកម្លាំងប៉ុស្តិ៍នគរបាលឃុំច្រេសចំនួន៤នាក់ ដឹកនាំដោយលោកនាយប៉ុស្តិ៍ ជិះម៉ូតូ២គ្រឿង បាននាំគ្នាចេញដើរល្បាតដូចសព្វមួយដង ដោយម៉ូតូមួយនៅមុខ ជិះគ្នា២នាក់ ម៉ូតូមួយទៀតនៅក្រោយ ជិះគ្នា២នាក់ដែរ ប៉ុន្តែពេលទៅដល់ចំណុចកើតហេតុ ស្រាប់តែលេចចេញក្រុមជនពាលទាំង៣នាក់ ជិះម៉ូតូមួយគ្រឿងពណ៌ទឹកក្រូច ពាក់ស្លាកលេខភព១AFQ- ២៧០៥ ប្រដាប់ដោយដែកបំពង់ទីប ប្រវែង១ម៉ែត្រ៣តឹក បានដេញស្ទាក់វាយកម្លាំងសមត្ថកិច្ច ដែលកំពុងជិះម៉ូតូដើរល្បាត តែត្រូវបានកម្លាំងសមត្ថកិច្ចដឹងទាន់ ហើយក៏បង្ក្រាបបានភ្លាមៗ ទាំងជនសង្ស័យ និងវត្ថុតាង ហើយក៏នាំទៅកាន់ប៉ុស្តិ៍រដ្ឋបាលឃុំច្រេស ដើម្បីកសាងសំណុំរឿងចាត់ការទៅតាមនីតិវិធី ។
ដោយឡែកខាងប្រជាពលរដ្ឋវិញ បានសម្តែងនូវការគាំទ្រយ៉ាងខ្លាំង ចំពោះសកម្មភាពចុះបំពេញការងាររបស់មន្ត្រីប៉ុស្តិ៍រដ្ឋបាលឃុំច្រេស ហើយពួកគាត់ក៏សប្បាយចិត្តខ្លាំងណាស់ដែរ នៅពេលឃើញសមត្ថកិច្ច ចាប់បានក្រុមជនពាលទាំងនោះ ដោយអ្នកខ្លះបានលើកឡើងថា នេះពិតជាសំណាងណាស់ ដែលក្រុមជនពាលចេញធ្វើសកម្មភាពប៉ះចំសមត្ថកិច្ច តែបើមានអ្នកស្រុកណាម្នាក់ ធ្វើដំណើរទៅមុន សមត្ថកិច្ចតែបន្តិច ច្បាស់ជាវេទនាធំហើយ បើលេងសុទ្ធតែដែកបំពង់ទីបបែបនេះនោះ ៕
ចែករំលែកព័តមាននេះ