ខេត្តកោះកុង ៖ មានរឿងដ៏ចម្លែកមួយបានកើតឡើងនៅទល់មុខខាងកើតផ្សារដងទង់ ស្ថិតក្នុងភូមិ៣ សង្កាត់ដងទង់ ក្រុងខេមរៈភូមិន្ទ ខេត្តកោះកុង ដោយម្ចាស់ផ្ទះម្នាក់ឈ្មោះ ចៅ ប៊ុនហួន…
ខេត្តកោះកុង ៖ មានរឿងដ៏ចម្លែកមួយបានកើតឡើងនៅទល់មុខខាងកើតផ្សារដងទង់ ស្ថិតក្នុងភូមិ៣ សង្កាត់ដងទង់ ក្រុងខេមរៈភូមិន្ទ ខេត្តកោះកុង ដោយម្ចាស់ផ្ទះម្នាក់ឈ្មោះ ចៅ ប៊ុនហួន អាយុ៤៩ឆ្នាំ បានដាក់ពាក្យបណ្តឹងចូលទៅមន្ទីររៀបចំដែនដីនគរូបនីយ៍កម្ម និងសំណង់ខេត្តរារាំងភាគីម្ខាងទៀតឈ្មោះ អ៊ឹង ហ៊ុយតុង អាយុ៥៨ឆ្នាំ មិនឱ្យបន្តការសាងសង់ផ្ទះដែលមានជញ្ជាំងរួមគ្នាថែម២ជាន់ទៀតទេ ដែលបន្តសុពលភាពតាមប្លង់ចាស់ដែលត្រូវសាងសង់៣ជាន់ ។ ការសុំបន្តនេះត្រូវបានទទួលការអនុញ្ញាតិពីអាជ្ញាធរខេត្តរួចហើយកាលពីថ្ងៃទី០៤ ខែមករា ឆ្នាំ២០១៨ កន្លងមក ។
រឿងចម្លែកដ៏គួរឱ្យអៀនខ្មាស់ និងមិនអាចទទួលយកបានហើយត្រូវបានមជ្ឈដ្ឋានអ្នកច្បាប់ជាច្រើនរិះគន់យ៉ាងខ្លាំងដោយសារតែលោក ចៅ ប៊ុនហួន បានដាក់បណ្តឹងទាំងបំពានច្បាប់ ព្រោះនៅក្នុងឯកសារបុរសម្ចាស់ផ្ទះទាំង២រូបខាងលើបានឯកភាពសង់ផ្ទះយកជញ្ជាំងរួមគ្នា(ជញ្ជាំងអដិ្ឋសិទ្ឋ)ដោយសង់លើព្រំដីរួមគ្នា ហើយបានធ្វើកិច្ចសន្យាថា នឹងមិនបង្កទំនាស់នឹងគ្នាទៅអនាគតទេ តែពេលនេះម្ចាស់ផ្ទះឈ្មោះ ចៅ ប៊ុនហួន បែរជាបំពានច្បាប់ខ្លួនឯងទៅវិញ ។
លោក រស់ វីរ៉ាវុធ ប្រធានមន្ទីររៀបចំដែនដីនគរូបនីយ៍កម្ម និងសំណង់បានបញ្ជាក់ប្រាប់ កោះសន្តិភាព នៅម៉ោង១១នឹង៣០នាទីព្រឹក ថ្ងៃទី២៨ ខែកុម្ភៈ នេះថា លោកបានទទួលពាក្យបណ្តឹងនេះហើយលោករិះគន់ថាលោក ចៅ ប៊ុនហួន មិនគួរដាក់ពាក្យប្តឹងរំលោភលើកិច្ចសន្យារបស់ខ្លួនឯងឡើយ ។ លោកបានបន្ថែមទៀតថា កិច្ចសន្យាគឺជាច្បាប់ហេតុអីក៏លោកបង្កើតច្បាប់ហើយបំពានច្បាប់ដែលបង្កើតដោយខ្លួនឯងទៅវិញ ។
លោកប្រធានមន្ទីរបានអះអាងថា មន្ទីររបស់លោកបានកោះអញ្ជើញលោក អ៊ឹង ហ៊ុយតុង មកធ្វើការសាកសួររួចហើយព្រមទាំងបានផ្តល់ឯកសារគ្រប់គ្រាន់សំរាប់បន្តសុពលភាពសាងសង់ដែលអភិបាលខេត្តបានសំរេចរួចហើយ ។ ចំពោះលោក ចៅ ប៊ុនហួន ដែលជាដើមបណ្តឹងមន្ទីរនឹងធ្វើការអញ្ជើញគាត់មកសាកសួរនៅរសៀលថ្ងៃទី២៨ កុម្ភៈ នេះហើយនឹងផ្តល់ពីលទ្ធផលដំណោះស្រាយឱ្យ កោះសន្តិភាព បានដឹងក្នុងពេលឆាប់អំពីមូលហេតុនៃការដាក់ពាក្យបណ្តឹងនេះ ៕
សូមបញ្ជាក់ថា ផ្ទះល្វែងខ្ពស់សង់រួចហើយបានទុកដែកបន្តសម្រាប់អ្នកសង់ជាប់គ្នា ។ ពេលនេះអ្នកសង់សំណង់ទាបមានបំណងរុះដំបូលចេញដើម្បីសង់បន្តឱ្យស្មើផ្ទះខ្ពស់ ដោយយកជញ្ជាំងរួមគ្នាតាមកិច្ចសន្យា ។ ប៉ុន្តែភាគីផ្ទះខ្ពស់រារាំងមិនឱ្យយកជញ្ជាំងរួមគ្នាទេ ដែលអ្នកច្បាប់និយាយថា ដូចជាខិតលើគេពេកហើយ ។ បើមិនព្រមទេ មានតែវ៉ៃជញ្ជាំងព្រំដីនេះចេញទើបត្រូវ មិនថាអីចឹង?
ចែករំលែកព័តមាននេះ