រាជធានីភ្នំពេញ ៖ មន្ត្រីជាន់ខ្ពស់គណបក្សប្រជាជនកម្ពុជាបានអះអាងថា គណបក្សកាន់អំណាចគ្មានការជួបសន្ទនាជាលក្ខខណៈថ្នាក់ជាតិអ្វីនោះទេ ទោះបីជាមានការស្នើសុំជួបពិភាក្សាយ៉ាងណាក្តី ។ ការប្រកាសជំហររបស់មន្ត្រីជាន់ខ្ពស់គណបក្សកាន់អំណាចនេះបន្ទាប់ពីមានការលើកឡើងរបស់ពីភាគីអន្តរជាតិ និងមេធាវីការពារក្តីលោក កឹម សុខា អតីតប្រធានគណបក្សសង្គ្រោះជាតិដែលកំពុងជាប់ពន្ធនាគារ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី២៨ កុម្ភៈ យ៉ាងដូច្នេះថា «គ្មានទេការសន្ទនា ថ្នាក់ជាតិស្អីនោះ ។ អ្នកណាក៏ដឹងដែរថា ដើម្បីការស្រុះស្រួលជាតិគណបក្សប្រជាជនកម្ពុជាបានដាក់ចេញនូវនយោបាយបង្រួបបង្រួមជាតិដែលឈានដល់កិច្ចព្រមព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ បើកផ្លូវឲ្យមានការបោះឆ្នោតនាឆ្នាំ១៩៩៣» ។
លោកក៏បានលើកឡើងថា នៅពេលដែលមានសភាពការណ៍រាំងស្ទះផ្នែកនយោបាយគណបក្សប្រជាជនកម្ពុជាបានផ្តួចផ្តើមបង្កើតនូវវប្បធម៌សន្ទនា ដើម្បីរកដំណោះស្រាយបញ្ហាជាតិ ។ ប៉ុន្តែបំណងដ៏ល្អនេះត្រូវអតីតមេបក្សប្រឆាំងជាអ្នកបំផ្លាញចោលទៅវិញធ្វើឲ្យវប្បធម៌សន្ទនាត្រូវអន្តរាយ និងស្លាប់បាត់តែម្តង ។ ដូច្នេះទណ្ឌិតដែលឆ្លៀតឱកាសចង់ឲ្យមានការសន្ទនាថ្នាក់ជាតិស្អីនោះ មិនអាចកើតមានឡើងវិញជាដាច់ខាត ។
លោក សុខ ឥសាន ក៏បានលើកឡើងថា ការចង់ឲ្យមានរបស់ដែលហៅថា ការសន្ទនាថ្នាក់ជាតិនោះវាគ្រាន់តែបង្ហាញឲ្យឃើញថា ទណ្ឌិត និងពពួកឧទ្ទាមក្រៅច្បាប់កំពុងដល់ទីបញ្ចប់ហើយ ។ ឧបាយកលចង់ឲ្យមានរបស់ដែលហៅថា ការសន្ទនាថ្នាក់ជាតិស្អីនោះវាគ្រាន់តែចង់រស់ឡើងវិញតែប៉ុណ្ណោះ ។ តែមិនអាចទៅរួចទេខ្មោចដែលងាប់ហើយមិនអាចរស់ឡើងវិញឡើយ ។
សូមជម្រាបថា ការប្រកាសជំហររបស់មន្ត្រីជាន់ខ្ពស់បក្សកាន់អំណាចនេះបន្ទាប់ពីមានស្នើសុំពីមេធាវីរបស់លោក កឹម សុខា គឺលោក ផែង ហេង ស្នើឲ្យអ្នកនយោបាយងាកទៅរកការសន្ទនាដើម្បីកុំឲ្យមានការដាក់ទណ្ឌកម្មពីអន្តរជាតិមកកម្ពុជា ព្រោះប៉ះពាល់ដល់ជីវភាពរស់នៅរបស់ប្រជាពលរដ្ឋ ៕
ចែករំលែកព័តមាននេះ