ធី សុវណ្ណថា ជាប់ទៅប្រកួតសម្រស់នៅកូរ៉េដោយស្វ័យប្រវត្តិ
រាជធានីភ្នំពេញ ៖ កាលពីរាត្រីថ្ងៃទី២៦ កុម្ភៈ ឆ្នាំ២០១៨ កម្មវិធីប្រឡងសម្រស់អន្តរជាតិ«Queen of the Spa» រៀបចំឡើងនៅ«សោនក្លឹប»។…
រាជធានីភ្នំពេញ ៖ កាលពីរាត្រីថ្ងៃទី២៦ កុម្ភៈ ឆ្នាំ២០១៨ កម្មវិធីប្រឡងសម្រស់អន្តរជាតិ«Queen of the Spa» រៀបចំឡើងនៅ«សោនក្លឹប»។ វាជាព្រឹត្តិការណ៍ដ៏ធំត្រៀមទៅប្រកួតនៅប្រទេសកូរ៉េ ដោយខាងកម្ពុជា រៀបចំចម្រាញ់បេក្ខនារីសម្រាប់ទៅចូលរួម ។ អ្វីដែលគួរឱ្យចាប់អារម្មណ៍ គឺកញ្ញាធី សុវណ្ណថា ដែលតែងតែចូលរួមសកម្មភាពនយោបាយនាពេលកន្លងមក ក៏បានចូលរួមប្រកួតដែរ ។
ការប្រកួតនេះ មានជំនួយ និងការបង្ហាញឱ្យដឹងថា Queen of the Spa បង្កើតរឿងភ្ញាក់ផ្អើលមួយក្នុងពិភពសម្រស់។ លើសពីនេះបេក្ខនារីនឹងក្លាយជាតារាក្នុងវិស័យសិល្បៈភាពយន្តកូរ៉េ ។វត្តមានគណៈកម្មការចូលរួម មានMs. Giant Yen បរវរកញ្ញាពិភពលោកឆ្នាំ២០០៩ MrMARTIN Nielsen Mr PARK Jae Hong និងលោកស្រីហង្ស បូរី មន្ត្រីជាន់ខ្ពស់កម្ពុជា ។ ការប្រឡងដ៏ធំគ្រោងធ្វើឡើងនៅប្រទេសកូរ៉េដែលកញ្ញាឯកចូលរួមភាគច្រើនពីប្រទេសតំបន់អាស៊ាន ។
សម្រាប់បេក្ខនារីដែលចូលរួមការប្រកួតចំនួន៤៥នាក់នោះគណៈកម្មការជ្រើសរើសយកតែ១៥នាក់ទេ ។ ទោះជាយ៉ាងណាក្តីបេក្ខនារីទាំង១៥នាក់នោះ គណៈកម្មការនៅមិនទាន់សម្រេចជ្រើសរើសនៅឡើយទេ គឺរង់ចាំការបោះត្នោតតាមអនឡាញបន្ថែមទៀត ។ ដោយឡែកតែកញ្ញាធី សុវណ្ណថា ត្រូវគណៈកម្មការសម្រេចជ្រើសរើសយកទៅប្រកួតនៅប្រទេសកូរ៉េដោយស្វ័យប្រវត្តិតែម្ដង ។ ក្នុងការប្រឡងនារាត្រីនោះកញ្ញា ធី សុវណ្ណថា បានឈរបង្ហាញរាងឱ្យអ្នកសារព័ត៌មានថតរូបទាំងញញឹមរួសរាយ ។ នៅលើវេទិកានាងដើរបង្ហាញរាង និងសម្រស់យ៉ាងយកចិត្តទុកដាក់ ។ ធី សុវណ្ណថា មិនបានផ្តល់បទសម្ភាសន៍ទេ ដោយសាររវល់ផ្ចង់ការប្រឡង ហើយសន្យាថា ពេលទំនេរនឹងឆ្លើយប្រាប់មូលហេតុដែលនាងចូលរួមប្រឡងសម្រស់នេះ ។
លោកជំទាវហង្ស បូរី ដែលជាគណៈកម្មការដាក់ពិន្ទុ ហើយក៏ត្រៀមទៅចូលរួមកម្មវិធីធំនៅប្រទេសកូរ៉េដែរនោះបានថ្លែងថា លោកជំទាវចាប់អារម្មណ៍ការប្រឡងនេះ ព្រោះខុសពីការប្រកួតកន្លងទៅ ដោយសារតែមិនថានារីក្រមុំ មានស្វាមី មេម៉ាយនោះទេ ឲ្យតែស្អាត អាចចូលរួមប្រឡងបាន ។ រឹតតែពិសេសអ្នកប្រឡងមិនប្រកាន់ទាល់តែមានសម្រស់ពីធម្មជាតិទេ ទោះជាកែទម្រង់មុខក៏ចូលរួមបានដែរ ។
លោកជំទាវបញ្ជាក់ថា មានការផ្ចិតផ្ទង់ដាក់ពិន្ទុ និងវិនិច្ឆ័យយ៉ាងល្អ មិនទទួលការសូកប៉ាន់ ឬអ្វីខុសគោលការណ៍ឡើយ ។ ចំពោះជ័យលាភីចំណាត់ថ្នាក់លេខ១ ទទួលបានមកុដពេជ្រតម្លៃ៣មុឺនដុល្លារ និងប្រាក់អម៦មុឺនដុល្លារ ។ ចំណាត់ថ្នាក់លេខ២ ទឹកប្រាក់៣ម៉ឺនដុល្លារ ។ ចំណាត់ថ្នាក់លេខ៣ទឹកប្រាក់១៥០០០ដុល្លារ ។ លើសពីនេះជ័យលាភីនឹងក្លាយជាតួសម្តែងប្រចាំផលិតកម្មនៅប្រទេសកូរ៉េ ៕
ចែករំលែកព័តមាននេះ