តោះមកស្តាប់នាងនិយាយ «ស្រឡាញ់នាយចយ»ព្រោះអ្វី?
- ភ្នំពេញ
រាជធានីភ្នំពេញ ៖ ជម្នះនឹងពាក្យចំអករិះគន់មួយចំនួនថា មិនសមគ្នានោះ តារាកំប្លែងនាយចយ និងគូស្នេហ៍បានចូលរោងការហើយ នៅថ្ងៃទី២៧ កុម្ភៈ ២០១៨ ។…
រាជធានីភ្នំពេញ ៖ ជម្នះនឹងពាក្យចំអករិះគន់មួយចំនួនថា មិនសមគ្នានោះ តារាកំប្លែងនាយចយ និងគូស្នេហ៍បានចូលរោងការហើយ នៅថ្ងៃទី២៧ កុម្ភៈ ២០១៨ ។ អាពាហ៍ពិពាហ៍នេះ បន្ទាប់ពីអ្នកទាំង២បានសាងស្នេហ៍យ៉ាងផ្អែមល្ហែម ជាទីចាប់អារម្មណ៍របស់មហាជននាពេលកន្លងមក ។
សំឡេងភ្លេងការបានបន្លឺឡើងជាមួយកម្មវិធីជាបន្តបន្ទាប់ តាមគន្លងទំនៀមប្រពៃណី នៅកន្លែងទទួលរៀបចំពិធីមង្គលការ «បុរីវិមានពិភពថ្មី» ក្នុងខណ្ឌសែនសុខ ។ ចំណែកពិធីពិសាភោជនាហារនាពេលល្ងាចរៀបចំនៅទីនោះដែរ ។ បើទោះបីជាពិធីមង្គលការរបស់នាយចយ នាពេលព្រឹកមិនសូវមានអ្នកសិល្បៈចូលរួមក្តី ប៉ុន្តែទាំងនាយចយ និងភរិយា កញ្ញាក្វាន់ ឌី ញញឹមស្រស់ស្រាយ ខណៈមានវត្តមានចូលរួមអបអរពីមិត្តភក្តិ និងបងប្អូន សាច់ញាតិទាំងសងខាង ។
នាយចយ ជាតារាកំប្លែងក្នុងក្រុមនាយក្រឹម ។ ជាអ្នកខេត្តកំពង់ចាម នាយចយមានភ័ព្វវាសនាអណ្តែតឡើងក្នុងពិភពសិល្បៈកំប្លែងតាមរយៈការផ្តល់ឱកាស និងបណ្តុះបណ្តាលពីនាយក្រឹម ។ កាលពីនាយចយនៅវ័យកុមារ នាយក្រឹមចាប់អារម្មណ៍ចំពោះមុខមាត់របស់នាយសក្តិសមជាអ្នកកំប្លែង ក៏បណ្តុះបណ្តាលឱ្យចូលរួមសម្តែងជាមួយនាយតាំងពីពេលនោះមក ។
ចំណែកនាងក្វាន់ ឌី ជាអ្នកខេត្តពោធិ៍សាត់ មានអាជីពជាអ្នកអ៊ុតសក់ ។ នាងត្រូវបានមហាជនសរសើររូបសម្រស់ស្រស់សោភា បើប្រៀបធៀបជាមួយនាយចយដែលមិនសូវសង្ហានោះ ។ ទោះជាយ៉ាងណាក្តី បើប្រៀបធៀបពីកេរ្តិ៍ឈ្មោះក្នុងសង្គម គឺនាយចយ ជាតារាកំប្លែងល្បី ឯនាងក្វាន់ ឌី គ្រាន់តែជាជនសាមញ្ញប៉ុណ្ណោះ ។ មុនពេលឈានដល់រៀបមង្គលការនេះឡើង នាយចយ ត្រូវមហាជនរិះគន់ផង និងអបអរផង ក្នុងពេលដែលនាយបានគូស្នេហ៍ស្រស់ស្អាតមិនសមនឹងខ្លួន ។
មានការលើកឡើងថា ស្នេហាមួយនេះ ទំនងជាមិនមែនកើតចេញពីចិត្ត និងបេះដូងឡើយ ពោលអាចមកពីភាគីខាងស្រីសម្លឹងឃើញទ្រព្យសម្បត្តិ និងកេរ្តិ៍ឈ្មោះរបស់នាយចយប៉ុណ្ណោះ ។ បើទោះជាមានការលើកឡើងបែបនោះក្តី ទាំងនាយចយ និងគូស្នេហ៍ មិនទោមនស្សឡើយ ដោយអ្នកទាំងពីរតែងតែបង្ហាញភាពផ្អែមល្ហែមជាមួយគ្នា ដូចជាដើរកម្សាន្ត និងនាយចយ រៀបចំខួបកំណើតឱ្យគូស្នេហ៍ជាដើម ។
រហូតឈានមកដល់ពិធីរៀបមង្គលការនាពេលនេះ នាយចយ មិនធ្លាប់បានបញ្ចេញប្រតិកម្មតបមហាជន ប៉ុន្តែសម្រាប់នាងក្វាន់ ឌី ធ្លាប់អះអាងថា «នាងស្រឡាញ់នាយចយ ដោយចិត្តស្មោះ និងអាណិត ដោយមិនបានគិតពីរូបរាង និងទ្រព្យសម្បត្តិអ្វីឡើយ ព្រោះនាយចយក៏គ្មានទ្រព្យ លុយឡានដូចគេដែរ» ។
មុននឹងសម្រេចចិត្តរៀបមង្គលការ នាយចយ និងភរិយាបានសាងស្នេហ៍ និងឈ្វេងយល់ចិត្តគ្នាទៅវិញទៅមករយៈពេលជាង១ឆ្នាំ ។ អ្នកណាសើចយំអីមិនសំខាន់ តែសំខាន់នាយចយ និងគូស្នេហ៍ស្រឡាញ់គ្នា និងចូលរោងការជាមួយគ្នាហើយ ។
ចែករំលែកព័តមាននេះ