រាជធានីភ្នំពេញ ៖ ដោយសារតែកំណើនសេដ្ឋកិច្ច និងកម្រិតជីវភាពរបស់ប្រជាពលរដ្ឋខ្មែរកើនឡើង កាលពីឆ្នាំ២០១៧កន្លងទៅ ប្រជាពលរដ្ឋកម្ពុជាប្រមាណ១,៧លាននាក់បានធ្វើដំណើរទៅក្រៅប្រទេស កើនឡើង២២% បើធៀបនឹងឆ្នាំ២០១៦ ក្នុងនោះធ្វើដំណើរទៅប្រទេសថៃ មានប្រមាណជាង៥០ម៉ឺននាក់ ។ នេះបើយោងតាមរដ្ឋលេខាធិការក្រសួងទេសចរណ៍ ។
កាលពីថ្ងៃទី២៧ កុម្ភៈ នៅសណ្ឋាគារសុខា ភ្នំពេញ លោក ទិត ចន្ថា រដ្ឋលេខាធិការក្រសួងទេសចរណ៍ បានលើកឡើងថា ដោយសារកត្តាសេដ្ឋកិច្ច និងកម្រិតជីវភាពរបស់ពលរដ្ឋមានការលើកកម្ពស់ កាលពីឆ្នាំ២០១៧ ទេសចរកម្ពុជាបានចេញទៅក្រៅប្រទេសមានជាង១,៧លាននាក់ កើនឡើង២២% បើប្រៀបធៀបនឹងឆ្នាំ២០១៦ ក្នុងនោះទៅកម្សាន្តនៅប្រទេសថៃ មានជាង៥០ម៉ឺននាក់ ។
លំហូរពលរដ្ឋខ្មែរធ្វើដំណើរទៅប្រទេសថៃច្រើនបែបនេះ បើតាមប្រធានសមាគមទេសចរណ៍កម្ពុជា មើលឃើញថា មានកត្តាមួយចំនួនដូចជា ទៅដើរកម្សាន្ត ធ្វើជំនួញ និងពិនិត្យសុខភាព ។
លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា ថ្លែងថា ៖« តាមទស្សនៈរបស់ខ្ញុំ លំហូរភ្ញៀវទេសចរកម្ពុជាទៅកាន់ប្រទេសថៃ មានដូចជា ទៅទស្សនាលំហែកាយ មួយចំនួនទៅធ្វើជំនួញច្រើនគួរសម និងមួយចំនួនធំទៀតទៅពិនិត្យសុខភាព ។ យើងឃើញនៅផ្នែកធ្វើជំនួញ និងពិនិត្យសុខភាព គឺមានច្រើន » ។
លោកស្រីបន្ដថា ៖« យើងនៅតែមើលឃើញថា ប្រទេសថៃ នៅមានចំណុចទាក់ទាញ ដោយសារមុខម្ហូបគេ ភាពស៊ីវីល័យ និងផលិតផលក្នុងស្រុកគេមានច្រើន អាចឆ្លើយតបគ្រប់តម្រូវការរបស់ពលរដ្ឋកម្ពុជា ពិសេសសេវាពិនិត្យសុខភាព និងផលិតផលរបស់គេ យើងនៅតែត្រូវការរាប់ពីលើដល់ក្រោម ។ អីចឹង យើងមើលឃើញថា លំហូរភ្ញៀវទេសចរកម្ពុជាទៅកាន់ប្រទេសថៃនៅតែមាន ព្រោះយើងត្រូវការនាំចូលផលិតផលគេយកមកលក់នៅកម្ពុជា » ។
លោកស្រីបន្តទៀតថា ៖« ដើម្បីទាក់ទាញភ្ញៀវទេសចរថៃចូលមកកម្ពុជាវិញ យើងត្រូវការបង្កើនផលិតផលទេសចរណ៍បន្ថែមទៀត ព្រោះគេមិនអាចមកទស្សនាវត្ថុដដែលៗនោះទេ គេត្រូវការអ្វីដែលថ្មីប្លែកៗ ។ អីចឹង បើយើងចង់បានការទាក់ទាញចំនួនភ្ញៀវទេសចរឲ្យកាន់តែច្រើន ទាល់តែយើងបន្ថែមទៅលើផលិតផលទេសចរណ៍ ដូចជា កន្លែងកម្សាន្ត រមណីយដ្ឋានកែច្នៃ ផលិតផលក្នុងស្រុក និងអនាម័យ ជាដើម » ។
យោងតាមរបាយការណ៍ប្រចាំឆ្នាំរបស់ក្រសួងទេសចរណ៍បង្ហាញថា កម្ពុជាមានរមណីយដ្ឋានទេសចរណ៍នៅទូទាំងប្រទេស ចំនួនសរុប៣៩៤កន្លែង បែងចែកទៅតាមប្រភេទដូចជា រមណីយដ្ឋានទេសចរណ៍វប្បធម៌ប្រវត្តិសាស្ត្រ១១៤កន្លែង, រមណីយដ្ឋានទេសចរណ៍វប្បធម៌ប្រវត្តិសាស្ត្រធម្មជាតិ២១កន្លែង, រមណីយដ្ឋានធម្មជាតិកែច្នៃ២៤កន្លែង, រមណីយដ្ឋានទេសចរណ៍ប្រវត្តិសាស្ត្រ៦កន្លែង, រមណីយដ្ឋានកែច្នៃ៣៣កន្លែង, រមណីយដ្ឋានទេសចរណ៍វប្បធម៌ធម្មជាតិ២៧កន្លែង និងរមណីយដ្ឋានទេសចរណ៍ជាតិ១៦៩កន្លែង ៕
ចែករំលែកព័តមាននេះ