ខេត្តបន្ទាយមានជ័យ ៖ បុរសម្នាក់ដែលគេស្គាល់ថា ជាមន្ត្រីការិយាល័យកសិកម្មស្រុកថ្មពួក បានរងគ្រោះថ្នាក់ចរាចរណ៍ រវាងគោយន្តកន្ត្រៃបុកជាមួយម៉ូតូ បណ្តាលឲ្យរងរបួសធ្ងន់ បន្ទាប់មកក៏បានស្លាប់នៅតាមផ្លូវ ខណៈពេលដឹកយកទៅសង្គ្រោះ ។…
ខេត្តបន្ទាយមានជ័យ ៖ បុរសម្នាក់ដែលគេស្គាល់ថា ជាមន្ត្រីការិយាល័យកសិកម្មស្រុកថ្មពួក បានរងគ្រោះថ្នាក់ចរាចរណ៍ រវាងគោយន្តកន្ត្រៃបុកជាមួយម៉ូតូ បណ្តាលឲ្យរងរបួសធ្ងន់ បន្ទាប់មកក៏បានស្លាប់នៅតាមផ្លូវ ខណៈពេលដឹកយកទៅសង្គ្រោះ ។ ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៦និង៣០នាទីល្ងាច ថ្ងៃទី២៧ ខែកុម្ភៈ២០១៨ នៅចំណុចលើដងផ្លូវជាតិលេខ2563 ពីថ្មពួកទៅបឹងត្រកួនក្នុងភូមិសាស្ត្រភូមិប្រាំមិនា ឃុំគោករមៀត ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ត្រី អ៊ុយ ផល្លី អធិការរងទទួលផែនសណ្តាប់ធ្នាប់ចរាចរណ៍បានឲ្យដឹងថា ជនរងគ្រោះឈ្មោះ សួន សំអា៑ន ភេទប្រុស អាយុ៥០ឆ្នាំ រស់នៅភូមិគោកភ្នូវ ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ដែលបើកបរម៉ូតូ ពណ៌ខ្មៅ ស៊េរី២០១៦ ពាក់ស្លាកលេខរដ្ឋ 171.4972 ជាមន្ត្រីការិយាល័យកសិកម្ម ស្រុកថ្មពួក ។ លោកអធិការរងបានបញ្ជាក់ថា ៖ មុនពេលកើតហេតុជនរងគ្រោះបានបើកម៉ូតូពីលិចទៅកើត ពេលមកដល់ចំណុចកើតហេតុត្រូវបានគោយន្តកន្ត្រៃបុក បណ្តាលឲ្យម៉ូតូដួលរងរបួសអ្នកបើកបរធ្ងន់ ត្រូវបានរថយន្តសង្គ្រោះរបស់មន្ទីរពេទ្យ បង្អែកស្រុកថ្មពួក ដឹកយកទៅសង្គ្រោះ តែជាអកុសលត្រូវបានស្លាប់នៅតាមផ្លូវ ។
ចំណែកអ្នកបើកគោយន្តកន្ត្រៃ ក្រោយពីកើតហេតុបានរត់គេចខ្ឡួនបាត់ ហើយបានបន្សល់ទុកតែ គោយន្ត នៅនឹងកន្លែងកើតហេតុ ។ លោកអធិការរងរូបនោះ ក៏បានបញ្ជាក់ទៀតថា ៖ មូលហេតុដែលបង្កឲ្យមានគ្រោះថ្នាក់ប្រភេទធ្ងន់នេះ គឺសមត្ថកិច្ចនិយាយថា បណ្តាលមកពីអ្នកបើកម៉ូតូសង្ស័យមានជាតិស្រវឹង ហើយបើកបរម៉ូតូមិនពាក់មួកសុវត្ថិភាព ទើបពេលមានគ្រោះថ្នាក់ដួលបោកក្បាលនឹងផ្លូវ រងរបួសធ្ងន់ ក្រោយមកក៏បានស្លាប់ ចំពោះសពត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ។
ចំណែកវត្ថុតាងម៉ូតូ និងគោយន្តនគរបាលប៉ុស្តិ៍យកទៅរក្សាទុកបណ្តោះអាសន្នរៀបចំសំណុំរឿងបញ្ជូនមកអធិការដ្ឋាននគរបាលស្រុក ដើម្បីធ្វើការដោះស្រាយបន្ត ៕
ចែករំលែកព័តមាននេះ