ខេត្តត្បូងឃ្មុំ ៖ លំនៅឋានរបស់ប្រជាពលរដ្ឋចំនួន៣ខ្នង ស្មើនឹង៣គ្រួសារ រស់នៅភូមិទី៤ ឃុំរកាខ្នុរ ស្រុកក្រូចឆ្មារ ត្រូវបានអគ្គិភ័យឆាបឆេះខ្ទេចនៅវេលាម៉ោង០៩និង៣០នាទីយប់ ថ្ងៃទី២៦ ខែកុម្ភៈ…
ខេត្តត្បូងឃ្មុំ ៖ លំនៅឋានរបស់ប្រជាពលរដ្ឋចំនួន៣ខ្នង ស្មើនឹង៣គ្រួសារ រស់នៅភូមិទី៤ ឃុំរកាខ្នុរ
ស្រុកក្រូចឆ្មារ ត្រូវបានអគ្គិភ័យឆាបឆេះខ្ទេចនៅវេលាម៉ោង០៩និង៣០នាទីយប់ ថ្ងៃទី២៦ ខែកុម្ភៈ ឆ្នាំ២០១៨ ។ ក្នុងពេលនោះត្រូវបានលោកឧត្តមសេនីយ៍ទោ បែន រ័ត្ន ស្នងការនគរបាលខេត្តបានបញ្ជារឲ្យរថយន្តពន្លត់អគ្គិភ័យចំនួន៤គ្រឿង ចេញមកអន្តរាគមន៍បាញ់ទឹកពន្លត់ កុំឲ្យឆេះរាលដាលបន្តទៅផ្ទះផ្សេង ។
លោកវរសេនីយ៍ទោ សាំ ហេង អធិការនគរបាលស្រុកក្រូចឆ្មារ ប្រាប់ឲ្យដឹងថា លំនៅឋានដែលបានឆាបឆេះខ្ទេចប្រភេទផ្ទះឈើមាន ១.ឈ្មោះ ឈីម ស្រ៊ីន អាយុ៨១ឆ្នាំ ទំហំ៥.៦០ម៉ែត្រ គុណនឹង១០ម៉ែត្រ ប្រក់ស័ង្កសី ២.ឈ្មោះ ឈឿង សេងហ៊ា អាយុ៥០ឆ្នាំ ទំហំ៧ម៉ែត្រ គុណនឹង១៥ម៉ែត្រ ប្រក់ក្បឿង ៣.ឈ្មោះ ហុង ឈាងខ្វាន់ ទំហំ៧ម៉ែត្រ គុណនឹង៨ម៉ែត្រ ប្រក់ក្បឿង ។
លោកអធិការនគរបាលស្រុកក្រូចឆ្មារបន្តថា ក្នុងពេលដែលភ្លើងបានឆាបឆេះចេញពីផ្ទះទី១នោះពលរដ្ឋបានទូរស័ព្ទមកសុំរថយន្តពន្លត់អគ្គិភ័យ ដើម្បីឲ្យចេញទៅអន្តរាគមន៍បាញ់ទឹកពន្លត់ ។ គ្រាន់តែទទួលបាននូវសេចក្តីរាយការណ៍នេះភ្លាម រូបលោកបានឲ្យរថយន្តពន្លត់អគ្គិភ័យរបស់អធិការដ្ឋាននគរបាលស្រុកក្រូចឆ្មារចេញទៅអន្តរាគមន៍បាញទឹក និងបានស្នើសុំទៅលោកស្នងការនគរបាលខេត្តឲ្យរថយន្តនៅក្រុងសួង ស្រុកត្បូងឃ្មុំ និងស្រុកតំបែរ ចេញមកអន្តរាគមន៍ជួយបាញ់ទឹកទប់ស្កាត់ដើម្បីការពារកុំឲ្យឆេះរាលដាលទៅផ្ទះរបស់អ្នកផ្សេងៗទៀត បានចេញមកបន្តបន្ទាប់ផងដែរ ។
ក្នុងពេលនោះ រូបលោកបានចុះបញ្ជាដោយផ្ទាល់តែម្តង ហើយប្រជាពលរដ្ឋបាននាំគ្នាបូមទឹកដោយប្រើម៉ូទ័រទុយយោរបាញ់ទឹកលើផ្ទះដែលកំពុងតែឆេះសន្ធោសន្ធៅមានផ្សែងហុយខ្មួលខ្មាញ់ទៅលើអាកាស ។ ភ្លើងបានឆេះចេញពីផ្ទះទី១ រាលដាលមកផ្ទះអ្នកជិតខាងចំនួនពីរទៀត ឆេះឡើងខ្ទេចតែម្តងមិនបណ្ដាលឲ្យសមាជិកម្ចាស់ផ្ទះណាម្នាក់បានរងគ្រោះ ឬបាត់បង់អាយុជីវិតទេ ។ ចំពោះមូលហេតុដែលបង្កឲ្យមានភ្លើងឆេះ គឺផ្តើមចេញពីភ្លើងទុស្សេចេញពីផ្ទះទី១ ដែលបាត់បង់មានលុយ៧,០០ដុល្លារ និងគ្រឿងអលង្ការមួយចំនួនទៀត ។
នៅព្រឹកថ្ងៃទី២៧ ខែកុម្ភៈ ម្សិលមិញ លោក លី ឡេង ប្រធានគណៈកម្មាធិការសាខាកាកបាទក្រហមខេត្ត និងលោកស្រី, អភិបាលរងខេត្ត បានដឹកនាំមន្ត្រីក្រោមឱវាទចុះទៅចែកអំណោយដោយក្នុង១គ្រួសារៗខាងលើ ទទួលបានមានអង្ករ៥០គីឡូក្រាម ត្រីខ១០កំប៉ុង ទឹកត្រី១យួរ ទឹកស៊ីអ៊ីវ១យួរ ទឹកបរិសុទ្ធ១កេស កៅស៊ូតង់១ផ្ទាំង សម្ភារផ្ទះបាយ សម្ភារដំណេក និងថវិកា២០ម៉ឺនរៀល លំនៅឋាន២ខ្នងដែលធាក់ជញ្ជាំងការពារមិនឲ្យឆេះក្នុង១គ្រួសារឧបត្ថម្ភ១០ម៉ឺនរៀល ។ ដោយឡែកក្រុមការងាររបស់លោក ជា សុផារ៉ា វិញបានឧបត្ថម្ភដល់៣គ្រួសារ ក្នុង១គ្រួសារៗទទួលបានស៍ង្កសី២០សន្លឹក ប្រេងឆា៥លីត្រ អង្ករ៥០គីឡូក្រាម ទឹកត្រី ទឹកស៊ីអ៊ីវ រួមនឹងសម្ភារផ្សេងៗទៀត អមដោយថវិកា៥០ម៉ឺនរៀលផងដែរ ៕
ចែករំលែកព័តមាននេះ