ខេត្តកំពង់ធំ ៖ មន្ត្រីសាខាកាំកុងត្រូលខេត្តកំពង់ធំ នៅថ្ងៃទី២៦ ខែកុម្ភៈ ឆ្នាំ២០១៨នេះ បានសហការជាមួយក្រុមរថយន្តរបស់អគ្គនាយកដ្ឋានកាំកុងត្រូល ចុះត្រួតពិនិត្យបរិមាណ និងគុណភាពប្រេងឥន្ធនៈចំនួន ៩កន្លែងនៅតាមស្ថានីយប្រេងឥន្ធនៈក្នុងក្រុងស្ទឹងសែន…
ខេត្តកំពង់ធំ ៖ មន្ត្រីសាខាកាំកុងត្រូលខេត្តកំពង់ធំ នៅថ្ងៃទី២៦ ខែកុម្ភៈ ឆ្នាំ២០១៨នេះ បានសហការជាមួយក្រុមរថយន្តរបស់អគ្គនាយកដ្ឋានកាំកុងត្រូល ចុះត្រួតពិនិត្យបរិមាណ និងគុណភាពប្រេងឥន្ធនៈចំនួន ៩កន្លែងនៅតាមស្ថានីយប្រេងឥន្ធនៈក្នុងក្រុងស្ទឹងសែន ខេត្តកំពង់ធំ រកឃើញដេប៉ូលក់ប្រេងចំនួន ៦កន្លែង លក់មិនគ្រប់លីត្រ ខុសស្តង់ដារ និងប្រេងគ្មានគុណភាព។ ពាក់ព័ន្ធករណីខាងលើ មន្ត្រីកាំកុងត្រូលខេត្តកំពង់ធំ បានឲ្យដឹងថា កាលពីថ្ងៃទី២៦ ខែកុម្ភៈ រថយន្តមន្ទីរពិសោធន៍ចល័តប្រេងឥន្ធនៈ របស់អគ្គនាយកដ្ឋានកាំកុងត្រូល និងសាខាកាំកុងត្រូលខេត្តកំពង់ធំ បានសហការគ្នាបានចុះត្រួតពិនិត្យបរិមាណ និងគុណភាពប្រេងឥន្ធនៈ តាមដេប៉ូ និងស្ថានីយប្រេងនានាក្នុងក្រុងស្ទឹងសែន ខេត្តកំពង់ធំបានចំនួន៩ស្ថានីយ បានរកឃើញមានចំនួន៦ស្ថានីយ និងដេប៉ូបានលក់ប្រេងមិនត្រឹមត្រូវជូនដល់អ្នកប្រើប្រាស់ ក្នុង៦កន្លែងខាងលើនេះមាន៤ស្ថានីយខុសបរិមាណលីត្រ និង២ស្ថានីយទៀតប្រេងខុសគុណភាព និងបរិមាណ។
លោក លៀង សុធា ប្រធានសាខាកាំកុងត្រូលខេត្តកំពង់ធំ បានឲ្យ កោះសន្តិភាព ដឹងតាមទូរស័ព្ទនៅរសៀលថ្ងៃទី២៧ ខែកុម្ភៈ ឆ្នាំ២០១៨ នេះថា បន្ទាប់ពីក្រុមការងារសហការ គ្នាចុះពិនិត្យរួចមក បានរកឃើញថា ពិតជាមានដេប៉ូប្រេងឥន្ធនៈមួយចំនួន បានបើកធ្វើអាជីវកម្មដោយមាន ភាពមិនប្រក្រតីពិតប្រាដកមែន ដោយដេប៉ូទាំង៦លក់ប្រេងជូនអតិថិជនមិនគ្រប់លីត្រមាន៤កន្លែង ចំណែក២កន្លែងទៀត លក់ប្រេងខុសគុណភាព ដោយបន្លំប្រេងធម្មតាថាជាប្រេងស៊ុបពែ ហើយលក់ថ្លៃ។ តែលោកសូមនៅមិនទាន់បង្ហាញ ទីតាំងដេប៉ូទាំងនោះទេ ដោយទុកឱកាសឲ្យម្ចាស់ដេប៉ូទាំងនោះកែខ្លួន និងធ្វើកិច្ចសន្យា រៀបចំឲ្យមានភាពត្រឹមត្រូវ ឡើងវិញ កាលណាប្រាប់ទីតាំងច្បាស់ទៅហាក់ដូចជាសម្លាប់គាត់ ពីព្រោះតែគ្មានអតិថិជនណាហ៊ានចូលចាក់ប្រេង កន្លែងគាត់ទៀតនោះទេ។ លោកបន្តថា លើកទី១.ឲ្យម្ចាស់ដេប៉ូទាំងអស់នោះធ្វើកិច្ចសន្យា ជាមួយនឹងមន្ទីរជំនាញធ្វើ ការកែប្រែគុណភាណ និងបរិមាណឲ្យបានត្រឹមត្រូវទៅតាមស្តង់ដា បើនៅតែប្រព្រឹត្តល្មើសទៀតលើកទៅ២ នឹងត្រូវទទួលការផាកពិន័យ លើកទី៣.ប្រសិនណាមិនរៀងចាលទេខាងជំនាញរកឃើញករណីល្មើសទៀត នឹងឈានទៅដល់ការដកអាជ្ញាប័ណ្ណ និងបិតដេប៉ូឬក៏ស្ថានីយប្រេងឥន្ធនៈដែលល្មើសនោះតែម្តង មិនឲ្យធ្វើអាជីវកម្ម តទៅទៀតនោះឡើយ។
ជុំវិញករណីនៃការចុះត្រួតពិនិត្យកន្លែងលក់ប្រេងឥន្ធនៈខាងលើនេះ មហាជនដែលបានឃើញហេតុការខាងលើនេះ បាននាំគ្នានិយាយរិះគន់ថា មន្ត្រីទាំងអស់នេះធ្វើឲ្យតែល្អមើលតែប៉ុណ្ណោះ នៅពីក្រោយខ្នងយកលុយគេហើយអង្អែលខ្នងគេទៀត រាប់ទាំងអ្នកកាសែតដែលទៅថតពេលនោះផងដែរ ដើម្បីលាក់បាំងការពិតអំពីអំពើដ៏លាមករបស់ម្ចាស់ស្ថានីយប្រេងឥន្ធនៈអស់នោះ ដែលខំគេងប្រវ័ញ្ច ជញ្ជក់ឈាមពីពលរដ្ឋតាមរយៈនៃការលក់ប្រេងមិនគ្រប់លីត្រ និងប្រេងខុសគុណភាពជូនប្រជាពលរដ្ឋ។ បច្ចុប្បន្ននេះមានស្ថានីយប្រេងឥន្ធនៈ និងដេប៉ូលក់ប្រេងកំពុងតែរីកដុះដាលគ្រប់ទីកន្លែងក្នុងខេត្តកំពង់ធំនេះ ដូចផ្សិតត្រូវទឹកសន្សើមអ៊ីចឹង ដោយសារតែមុខរបរមួយនេះរកស៊ីកាក់កប និងធ្វើមានបានណាស់ តាមរយៈនៃការបន្លំគុណភាព និងបរិមាណលីត្រមិនគ្រប់នេះលក់ឲ្យអ្នកទិញ និងចូលអ្នកចូលចាក់ប្រេង។ ពលរដ្ឋសំណូមពរដល់ប្រមុខរាជរដ្ឋាភិបាល សូមមេត្តមានវិធានការឲ្យបានតឹងរ៉ឹងបំផុត ចំពោះមន្ត្រីផ្លែល្វាថ្នាក់ក្រោម ទាំងអស់នេះផង ត្រូវតែចាត់វិធានការឲ្យបានតាមលក្ខណៈច្បាប់ចំពោះម្ចាស់ដេប៉ូប្រេងគ្រប់ប្រភេទ ដើម្បីកុំឲ្យម្ខាស់ដេប៉ូ ទាំងអស់នោះឈប់ជញ្ជក់ឈាមប្រជាពលរដ្ឋតទៀត ពួកគាត់ថាប្រេងថ្លៃ ឬថោកមិនចោទជាបញ្ហាប៉ុន្មាននោះទេ សំខាន់សុំឲ្យតែត្រឹមត្រូវគ្រប់លីត្រ បើសាំងស៊ុបពែឲ្យចំស៊ុបពែទៅបានហើយ កុំលេងបួនសន្លឹកអ៊ីចឹងទៀត៕
ចែករំលែកព័តមាននេះ