លោក ផែង ហេង បានសរសេរលើបណ្តាញសង្គមនៅថ្ងៃទី២៧ កុម្ភៈ នេះថា នយោបាយកា របរទេសស្ទើរគ្រប់ប្រទេស គ្រប់ស្ថានទូត គឺចង់ឃើញរាជរដ្ឋាភិបាលខ្មែរ…
លោក ផែង ហេង បានសរសេរលើបណ្តាញសង្គមនៅថ្ងៃទី២៧ កុម្ភៈ នេះថា នយោបាយកា របរទេសស្ទើរគ្រប់ប្រទេស គ្រប់ស្ថានទូត គឺចង់ឃើញរាជរដ្ឋាភិបាលខ្មែរ ងាកមកសន្ទនាខ្មែរ និងខ្មែរ ដើម្បីវិលមកគោរពស្មាតីកិច្ចព្រមព្រៀងសន្តិភាព ២៣ តុលា ១៩៩១ នៅទីក្រុងប៉ារីស និង ស្មារតីរដ្ឋធម្មនុញ្ញ ឆ្នាំ១៩៩៣ ដើម្បីបោះឆ្នោតសាកលថ្ងៃទី២៩ កក្កដា ២០១៨ ខាងមុខ មានភាគីគណបក្សប្រឆាំងចូលរួម និងបោះឆ្នោតដោយប្រជាធិបតេយ្យ សេរីពហុបក្ស ត្រឹមត្រូវ យុត្តិធម៌ និងជឿទុកចិត្តបាន។ លោកបន្តថា បើអ្នកកាន់អំណាច និងអ្នកនយោបាយខ្មែរ មិនយល់ និង នៅតែធ្វើមិនយល់ មិនអើពើនឹងកិច្ចខិតខំរបស់នយោបាយការទូតបែបនេះទេ នោះទណ្ឌកម្ម គ្រប់បែបយ៉ាងនឹងធ្លាក់មកលើខ្មែរទាំងមូល រួមទាំងអ្នកក្រីក្រ កម្មករ កសិករ ផងដែរ ដូចលិខិតអ៊ីយូ អាឡឺម៉ង់ដ៍ និងយូអិន បានបញ្ជាក់រួចហើយ ពេលនោះកុំបន្ទោសគេ ADB, World Bank និង IMF នឹងបិទលុយទាំងអស់គ្រប់ប្រភេទ។
បើអ្នកនយោបាយខ្មែរស្នេហាជាតិ ពិតប្រាកដ និងមិនយកខ្មែរណាជាសត្រូវ ចាត់ទុក “ទុក្ខរបស់ប្រជារាស្ត្រជាទុក្ខរបស់ខ្លួន” នោះត្រូវយកទស្សនៈថា “ថោកអីនឹងដៃ ថ្លៃអីនឹងមាត់” ងាកមកចាប់ដៃសន្ទនាជាមួយគ្នា ដើម្បីកសាង និងអភិវឌ្ឍជាតិទាំងអស់គ្នា។ ចំណែកលោក គល់ បញ្ញា នាយកប្រតិបត្តិ នៃគណៈកម្មាធិការដើម្បីការបោះឆ្នោតដោយ សេរី និងយុត្តិធម៌ នៅកម្ពុជា ហៅកាត់ថា ខុមហ្វ្រែល បានលើកឡើងលើបណ្តាញសង្គមផ្ទាល់ខ្លួនថា មានការវិវត្តទៅមុខនឹងមិនអាចគេចផុត ពីវិធានការទណ្ឌកម្ម របស់សហភាពអឺរ៉ុប ដែលមានផលប៉ះពាល់ធ្ងន់ធ្ងរលើពាណិជ្ជកម្ម និងចំពោះការទទួលខុសត្រូវរបស់រដ្ឋាភិបាលកម្ពុជា។ សហភាពអឺរ៉ុប គឺជាទីផ្សារនាំចេញទំនិញដ៏ធំបំផុតរបស់កម្ពុជា។ ប្រទេសកម្ពុជាទទួលបានការអនុគ្រោះពន្ធ ក្រោមកិច្ចព្រមព្រៀងទំនិញគ្រប់មុខលើកលែងតែអាវុធ តែមានលក្ខខណ្ឌការគោរពសិទ្ធិមនុស្ស។
លទ្ធផលរបស់កិច្ចប្រជុំនោះ ក្រុមប្រឹក្សាសហភាពអឺរ៉ុប សង្កត់ធ្ងន់ថា ក្រុមប្រឹក្សា កិច្ចការបរទេសនៃសហភាពអឺរ៉ុប បានសម្រេច ថ្កោលទោសការវិវត្តនយោបាយដែលគួរឱ្យព្រួយបារម្ភ និងការធ្លាក់ចុះនៃលទ្ធិប្រជាធិបតេយ្យ នៅកម្ពុជា។ លោកបន្តថា សេចក្តីសន្និដ្ឋានដែលត្រូវបានអនុម័តដោយពួករដ្ឋមន្ត្រីការបរទេស សហភាពអឺរ៉ុបបានព្រមានរដ្ឋាភិបាលកម្ពុជាថា ក្រុមប្រឹក្សាអាចពិចារណា “វិធានការគោលដៅជាក់លាក់” ប្រសិនបើស្ថានការណ៍នយោបាយមិនមានភាពប្រសើរឡើង។ មានការទាមទារឱ្យមានការដោះលែងលោក កឹម សុខា មេដឹកនាំគណបក្សប្រឆាំង ដែលជាប់គុកក៏ដូចជាការស្តារឡើងវិញគណបក្សសង្គ្រោះជាតិ ដោយ ការរំលាយគណបក្សសង្គ្រោះជាតិដោយបង្ខំ៕
ចែករំលែកព័តមាននេះ