ខេត្តព្រៃវែង ៖ យុវជនម្នាក់ត្រូវបានសមត្ថកិច្ចស្រុកពារាំងចាប់ឃាត់ខ្លួន ដោយសារតែធ្វើសកម្មភាពប៉ុនប៉ងចាប់រំលោភក្មេងស្រីអាយុ៨ឆ្នាំម្នាក់ដែលកំពុងដើរជីកក្តាមម្នាក់ឯងនៅក្នុងវាលស្រែ ប៉ុន្តែត្រូវម្តាយក្មេងស្រីមកទាន់ ហើយប្តឹងប៉ូលីសឱ្យចាប់ខ្លួន ។
យុវជនឈាមរាវម្នាក់នេះឈ្មោះ ជាប សុផល អាយុ១៨ឆ្នាំ មានទីលំនៅក្នុងភូមិកញ្ចំ ឃុំកញ្ចំ ស្រុកពារាំង ខេត្តព្រៃវែង និងបានស្រែកយំជាខ្លាំងក្រោយពេលត្រូវសមត្ថកិច្ចឃាត់ខ្លួនកាលពីព្រឹកថ្ងៃទី២៧ ខែកុម្ភៈ ឆ្នាំ២០១៨ នៅប៉ុស្តិ៍រដ្ឋបាលនគរបាលឃុំកញ្ចំ ។
ជុំវិញករណីនេះត្រូវបានលោក ស៊ឹម កុសល អធិការនគរបាលស្រុកពារាំងប្រាប់ឲ្យដឹងថា តាមចម្លើយរបស់កុមារីរងគ្រោះអាយុ៨ឆ្នាំបញ្ជាក់ថា កាលពីវេលាម៉ោង៥ល្ងាចថ្ងៃទី២២ កុម្ភៈ ខណៈពេលដែលរូបនាងកំពុងដើរដឹកគោទៅផ្ទះនៅចំណុចទួលអ្នកតាដូនស្តើងខាងជើងភូមិ ជនសង្ស័យបានស្ទាក់ចាប់នាងរំលោភរហូតសម្រេច លុះមកដល់ថ្ងៃទី២៥ខែឆ្នាំដដែលវេលាម៉ោង៥ល្ងាច ខណៈពេលរូបនាងកំពុងដើរជីកក្តាមម្នាក់ឯងនៅចំណុចខាងកើតត្រពាំងតាហុង ជនសង្ស័យចូលទៅចាប់នាងដោះអាវបំរ៉ុងរំលោភទៀត ប៉ុន្តែបានម្តាយរបស់នាងជិះម៉ូតូមកដល់ ទើបធ្វើឱ្យជនសង្ស័យភ័យរត់គេចខ្លួនទៅបាត់ ចំណែករូបនាងក៏ប្រាប់ដំណើររឿងដល់ម្តាយ ទើបព្រឹកឡើងថ្ងៃទី២៦ កុម្ភៈ ឳពុកម្តាយកុមារីរងគ្រោះនាំគ្នាទៅដាក់ពាក្យប្តឹងនៅប៉ុស្តិ៍រដ្ឋបាលឃុំកញ្ចំតែម្តង។
លោកអធិការស្រុកបានបញ្ជាក់ទៀតថា ក្រោយពីទទួលបានពាក្យបណ្តឹងពីក្រុមគ្រួសារកុមារីរងគ្រោះភ្លាម កម្លាំងប៉ុស្តិ៍រដ្ឋបាលបានហៅជនសង្ស័យមកសួរនាំ និងឃាត់ខ្លួនជនសង្ស័យតាមបញ្ជារបស់លោកព្រះរាជអាជ្ញាអមសាលាដំបូងខេត្ត ដើម្បីកសាងសំណុំរឿងចាត់ការទៅតាមនីតិវិធីនៅព្រឹកថ្ងៃទី២៧ ខែកុម្ភៈ ៕
ចែករំលែកព័តមាននេះ