ប្រទេសអារ៉ាប៊ី សាអ៊ូឌីត ៖ បណ្តាសារព័ត៌មានរដ្ឋរាយការណ៍នាថ្ងៃទី២៦ តុលា ថា ព្រះមហាក្សត្រសាលម៉ាននៃប្រទេសអារ៉ាប៊ី សាអ៊ូឌីត បានធ្វើការរុះរើដ៏ចម្បងមួយក្នុងជួរប្រមុខយោធាដោយផ្លាស់ប្តូរមេបញ្ជាការយោធាសំខាន់ៗ ក្នុងនោះរួមមាននាយសេនាធិការកងទ័ពផងដែរ…
ប្រទេសអារ៉ាប៊ី សាអ៊ូឌីត ៖ បណ្តាសារព័ត៌មានរដ្ឋរាយការណ៍នាថ្ងៃទី២៦ តុលា ថា ព្រះមហាក្សត្រសាលម៉ាននៃប្រទេសអារ៉ាប៊ី សាអ៊ូឌីត បានធ្វើការរុះរើដ៏ចម្បងមួយក្នុងជួរប្រមុខយោធាដោយផ្លាស់ប្តូរមេបញ្ជាការយោធាសំខាន់ៗ ក្នុងនោះរួមមាននាយសេនាធិការកងទ័ពផងដែរ ។
តាមរយៈរាជក្រិត្យព្រះមហាក្សត្របានប្តូរប្រមុខកងទ័ពអាកាស និងប្រមុខកងទ័ពជើងគោក ព្រមទាំងបណ្តាមន្ត្រីស៊ីវិល ក្នុងនោះមានអនុរដ្ឋមន្ត្រីជាច្រើនរូប ។
ទីភ្នាក់ងារសារព័ត៌មានរដ្ឋ SPA រាយការណ៍ថា តំណែងរបស់ឧត្តមសេនីយ៍ ABDEL RAHMANE BEN SALEH AL BUNYAN ជានាយសេនាធិការកងទ័ពត្រូវបានបញ្ចប់រួចត្រូវជំនួសដោយឧត្តមសេនីយ៍ FAYYAD AL RUWAILI ។
ពុំមានការពន្យល់ផ្លូវការណាមួយចំពោះការផ្លាស់ប្តូរក្បាលម៉ាស៊ីនកងទ័ពឡើយ ដោយការផ្លាស់ប្តូរនោះធ្វើឡើង ខណៈប្រទេសកំពុងជាប់ដៃធ្វើអន្តរាគមន៍យោធានៅយេម៉ែនចាប់តាំងពីជិត៣ឆ្នាំមកហើយជួយទ្រទ្រង់ដល់កងទ័ពរដ្ឋាភិបាលប្រទេសនេះប្រឆាំងពួកឧទ្ទាមហ៊ូធី ។
លោក THEODORE KARASIK អ្នកវិភាគម្នាក់របស់ក្រុម GULF STATES ANALYTICS ថ្លែងទៅកាន់ AFP ថា ការផ្លាស់ប្តូរក្នុងផ្ទៃយោធាកំពុងតែធ្វើនៅអារ៉ាប៊ី សាអ៊ូឌីត ។
ឧត្តមសេនីយ៍ AL BUNYAN ត្រូវដកចេញពីតំណែងក្រោយពីលោកចូលរួមបើកសម្ពោធពិព័រណ៍យោធា SAMI នៅទីក្រុងរីយ៉ាដ ដែលពិព័រណ៍នេះរៀបចំឡើងដោយបណ្តាឧស្សាហកម្មយោធាអារ៉ាប៊ី សាអ៊ូឌីត SAMI ជាក្រុមហ៊ុនការពារជាតិដែលទាក់ទាញសហគ្រាសការពារជាច្រើននៃពិភពលោក ។
អ្នកវិភាគរូបនេះបន្តថា ការផ្លាស់ប្តូរទាំងនេះធ្វើឡើងពេលមានពិព័រណ៍ SAMI ដែលជាចំណុចពិសេសមួយនៃផែនការកែទម្រង់របស់ព្រះអង្គម្ចាស់រជ្ជទាយាទ MOHAMMED BEN SALMANE សំដៅបង្កើតកម្មវិធីការពារជាតិមួយ ។
ម្យ៉ាងទៀត បើតាមប្រភពយោធាថា ការផ្លាស់ប្តូរនេះក៏កើតមានដែរក្រោយការប្រកាសនៅក្រុងសាណាពីការទម្លាក់គ្រាប់បែកច្រឡំរបស់អារ៉ាប៊ី សាអ៊ូឌីត ត្រូវចំមូលដ្ឋានយោធាមួយរបស់កងទ័ពយេម៉ែនជាសម្ព័ន្ធមិត្តបណ្តាលឱ្យមនុស្សស្លាប់រវាងពី៦ទៅ២០នាក់ និងរបួស១៥នាក់ ៕
ចែករំលែកព័តមាននេះ