ខេត្តកោះកុង ៖ ប្រៀបដូចវាយព្រៃវាយស្មៅបង្អើលពស់វែកមែន ! បើមិនវាយ…ពស់មិនចេញទេ ។
បន្ទាប់ពីសម្តេចតេជោប្រមុខរាជរដ្ឋាភិបាល បានមានប្រតិកម្មខ្លាំងៗ ចំពោះករណីលួចបូមខ្សាច់លុបសមុទ្រ រំលោភយកដីក្នុងតំបន់សហគមន៍ ស្ថិតក្នុងក្រុងខេមរភូមិន្ទ ខេត្តកោះកុង កាលពីថ្ងៃទី២២ ខែកុម្ភៈភ្លាម នៅថ្ងៃទី២៣ លោកស្រី មិថុនា ភូថង អភិបាលខេត្ត បានក្រោកពីព្រលឹម ២នាក់លោកស្នងការរួមនឹងអង្គរក្ស២ទៅ៣នាក់ ជិះអូប័របោះពួយរញ្ជួយសមុទ្រទៅឈរពិនិត្យមើលទីតាំងបង្កបទល្មើសបានមួយសន្ទុះដែរ ។
ពេលលោកស្រីអភិបាលខេត្តក្រឡេកឃើញ អូប័រអ្នកកាសែតទៅដល់ ទំនងបម្រុងដើរត្រឡប់មកវិញ មិនស្វាគមន៍អ្នកកាសែតទេ ប៉ុន្តែកោះសន្តិភាពឆ្លៀតសួរបានមួយសំណួរថា «តើលោកស្រីមានចំណាត់ការបែបណា ចំពោះករណីលួចបូមខ្សាច់រំលោភយកដីសហគមន៍បែបនេះ?» លោកស្រីអភិបាលបានឆ្លើយផងដើរសំដៅទៅឡើងអូប័រផងថា «មិនទាន់ដឹងទេ រង់ចាំក្រុមការងារចម្រុះចុះមកសិន» ហើយឡើងជិះអូប័រត្រឡប់មកវិញបាត់ឈឹងតែម្តង ប្រៀបដូចខឹងអ្នកកាសែតដែលពូកែនាំភ្លើង ។
រយៈពេលជិតមួយម៉ោងក្រោយមកទើបឃើញអូប័រ២គ្រឿងទៀតដឹកក្រុមការងារចម្រុះទៅដល់ ដឹកនាំដោយលោក អន ភារះ អភិបាលរងខេត្ត លោកអភិបាលក្រុង លោកប្រធានមន្ទីរបរិស្ថាន ប្រធានសុរិយោដី ប្រធានមន្ទីររ៉ែ និងថាមពល និងស្ថាប័នពាក់ព័ន្ធជាច្រើនទៀត ជាពិសេសលោកប្រធានភូមិស្ទឹងវែងនិងចៅសង្កាត់ស្ទឹងវែង ដែលជាអ្នកសុីញ៉េលក់ដីខាងលើនេះ មានទឹកមុខស្ងួតគួរឱ្យអាណិតក៏បានមកចូលរួមដែរ ។ ស្ថិតនៅលើទីតាំងលួចបូមខ្សាច់រាបស្មើរំលោភយកដីខាងលើ លោក អន ភារះ បានបញ្ជាឱ្យក្រុមការងារចម្រុះប្រើ GPS ចុចរកទំហំដីដែលបានរំលោភ ដោយប្រើរូបភាពលក់ទិញ និងរកទំហំផ្ទៃដីព្រៃកោងកាង ដែលកាប់ដើមអស់រួច បានលួចបូមខ្សាច់លុប និងរកបរិមាណខ្សាច់ ដែលបានលួចបូមកន្លងមកដើម្បីបង់សួយសារចូលរដ្ឋ ។ ប៉ុន្តែនៅខណៈនោះក្រុមការងារចម្រុះមិនបានបង្ហាញតួលេខ ពីចំណុចរុករកទាំងអស់ខាងលើ ឱ្យអ្នកកាសែតបានដឹងឡើយ ដោយលើកហេតុផលថា ចាំកោះហៅម្ចាស់ដី (អ្នកទិញ)ដែលគេចខ្លួន មកប្រជុំនៅសាលាខេត្តសិន។ ទោះបីនៅខណៈនោះក្រុមចម្រុះបានប្រទះឃើញសម្ភារបង្កបទល្មើស ដូចជាទុយោ និងម៉ាសុីនបូមខ្សាច់ ដែលជនបង្កបទល្មើសបានអូសយកទៅលាក់ទុកក្បែរកន្លែងកើតហេតុ ក៏ក្រុមការងារចម្រុះនេះមិនបានបង្ក្រាប និងរឹបអូសយកមកដែរ ។
នៅរសៀលថ្ងៃទី២៤ ខែកុម្ភៈ ឆ្នាំ២០១៨ លោកអភិបាលរង អន ភារះ បានប្រាប់កោះសន្តិភាពតាមទូរស័ព្ទថា កន្លងមកអាជ្ញាធរមានសមត្ថកិច្ចបានចុះហាមឃាត់៣លើករួចមកហើយ ក្រោយពេលកាសែតកោះសន្តិភាពបានចុះផ្សាយលើកដំបូងគឺនៅថ្ងៃទី១៥ ធ្នូ ២០១៧ ។ លោកថា សាលាក្រុងបានចុះហាមឃាត់ម្តង នៅថ្ងៃទី២ ខែមករា ២០១៨ខាងឧទ្យានដែនជម្រកសត្វព្រៃចុះហាមឃាត់ជាលើកទី២ ហើយនៅថ្ងៃទី៦ ខែកុម្ភៈ ឆ្នាំ២០១៨ បានហៅជំនាញពាក់ព័ន្ធមកប្រជុំរួចប្រកាសហាមធ្វើសកម្មភាពបូមខ្សាច់នេះជាលើកទី៣ ។
លោកថា ប៉ុន្តែជនបង្កធ្វើសកម្មភាពលួចបូមនៅពេលយប់ ហើយនៅពេលនេះអាជ្ញាធរខេត្តបានដាក់វិធានការយ៉ាងតឹងរុឹងជាលើកចុងក្រោយ គឺបញ្ឈប់ទាំងស្រុងនូវសកម្មភាពបូមខ្សាច់នៅទីតាំងល្មើសច្បាប់នេះ ។ លោកថា ក្នុងករណីមិនបញ្ឈប់សកម្មភាពល្មើស អាជ្ញាធរខេត្តនឹងដាក់ពាក្យបណ្តឹងទៅតុលាការឃាត់ខ្លួនតែម្តង ។ បញ្ជាក់បានថា ខេត្តដឹង ប៉ុន្តែគ្មានអំណាចទប់ស្កាត់ទេ ដែលសមណាស់ឱ្យអ្នកបូមរំលោភនេះធ្វើមន្ត្រីវិញទំនងខ្លាំងជាង ។
ក្នុងរឿងមិនប្រក្រតីនៃការបូមខ្សាច់លុបឆ្នេរសមុទ្រដោយកាប់ឆ្ការព្រៃកោងកាងចោលនេះ មន្ត្រីរដ្ឋបាលសាលាខេត្តមួយរូប ទំនងមានជាប់ពាក់ព័ន្ធជាមួយដែរ ប៉ុន្តែគាត់មិនហ៊ានចេញមុខទេពេលនេះ ។
ចំពោះឧកញ៉ានៅភ្នំពេញម្នាក់ឈ្មោះ ជា លាងហុង ដែលទិញដី និងបូមខ្សាច់លុបព្រៃកោងកាងនេះ មិនហ៊ានចេញមុខមកតតាំងទេ ទុកឱ្យគណៈកម្មការចម្រុះដោះស្រាយទៅចុះ ព្រោះស្គាល់គ្នាយូរហើយមុនទិញ ។
ពេលណាមានព័ត៌មានប្លែកនឹងផ្សាយជូនបន្តទៀត ជាពិសេសសេចក្តីបំភ្លឺពីឧកញ៉ា ជា លាងហុង ដែលរំលោភព្រៃកោងកាង ព្រោះមិនទាន់អាចទាក់ទងបាន ៕
ចែករំលែកព័តមាននេះ