រាជធានីភ្នំពេញ ៖ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងលោកអគ្គរដ្ឋទូតសាធារណរដ្ឋសឹង្ហបូរី មីឃែល តាន ប្រធានគណៈកម្មាធិការអចិន្ត្រៃយ៍មជ្ឈមណ្ឌលសកម្មភាពតំបន់អាស៊ាន លោក លី បញ្ញារិទ្ឋ នាយកប្រតិបត្តិ នៃមជ្ឈមណ្ឌលសកម្មភាពមីនតំបន់អាស៊ាន ។ ពិធីនេះធ្វើឡើងនៅមជ្ឈមណ្ឌលសកម្មភាពមីនតំបន់អាស៊ាន| នៅសង្កាត់បឹងព្រលិត ខណ្ឌ៧មករា រាជធានីភ្នំពេញ ។
លោកទេសរដ្ឋមន្ត្រីលើកឡើងថា ចាប់តាំងពីយើងបានប្រារព្ធពីធីបើកសម្ភោធទីស្នាក់ការនៃមជ្ឈមណ្ឌលសកម្មភាពមីនតំបន់អាស៊ាន នៅថ្ងៃទី២៥ ខែឧសភា ឆ្នាំ២០១៦ ថ្ងៃនេះគឺជាថ្ងៃប្រវត្តិសាស្ត្រមួយទៀតសម្រាប់មជ្ឈមណ្ឌលសកម្មភាពមីនតំបន់អាស៊ានដែលលោកអគ្គរដ្ឋទូត មីឃែល តាន និងរូបខ្ញុំបានចុះហត្ថលេខាលើកិច្ចព្រមព្រៀងស្តីពីការរឿបចំ និងការផ្តល់បុព្វសិទ្ធិ និងអភ័យឯកសិទ្ធិដល់មជ្ឈមណ្ឌលសកម្មភាពមីនតំបន់អាស៊ាន ។
លោកទេសរដ្ឋមន្ត្រីបន្តថា សូមកោតសរសើរចំពោះកិច្ចខិតខំប្រឹងប្រែងដ៏ខ្លាំងក្លារបស់ប្រទេសជាសមាជិកអាស៊ានទាំងអស់ ដូចជាសមាជិកគណកម្មាធិការមជ្ឈមណ្ឌលសកម្មភាពមីនតំបន់អាស៊ាន ក្រសួងពាក់ព័ន្ធនិងភ្នាក់ងាររបស់កម្ពុជាទាំងឡាយ បានបញ្ចប់នូកិច្ចព្រមព្រៀងក្នុងនាមជាប្រទេសប្រធាន ។ លោកទេសរដ្ឋមន្ត្រីបានលើកឡើងថា សូមកោតសរសើរផងដែរ ដល់កិច្ចប្រឹងប្រែងរបស់លោក លី បញ្ញារិទ្ធ នាយកប្រតិបត្តិរបស់ ARMAC និងបុគ្គលិកទាំងអស់ ចំពោះការរៀបចំដ៏ល្អ និងការសម្រេចបាននានា ចាប់តាំងពីលោកទទួលតួនាទីនៅខែតុលា ឆ្នាំ២០១៧ ។
លោកទេសរដ្ឋមន្ត្រីបានថ្លែងរំឭកសារឡើងវិញដោយសង្ខេបពីប្រវត្តិនៃមជ្ឈមណ្ឌលសកម្មភាពមីនតំបន់អាស៊ាន ។ កម្ពុជាជាប្រទេសចាត់ទុកចូលក្នុងចំណោមប្រទេសល្អបំផុត ចំពោះប្រតិបត្តិការការបណ្តុះបណ្តាល ការស្រាវជ្រាវ និងការអភិវឌ្ឍក្នុងសកម្មភាពកំចាត់មីន និងអាវុធមិនទាន់ផ្ទុះនៃសង្គ្រាម ។ ក្នុងក្របខណ្ឌអង្គការសហប្រជាជាតិកម្ពុជាបានបញ្ជូនកងកម្លាំងរក្សាសន្តិភាពច្រើនជាង៤,០០០នាក់ចាប់តាំងពីឆ្នាំ២០០៦ ដើម្បីចូលរួមបេសកកម្មរក្សាសន្តិភាពរបស់អង្គការសហប្រជាជាតិ ជាពិសេសក្នុងវិស័យមនុស្សធម៌ក្នុងការបោសសម្អាតមីន និងគ្រាប់មិនទាន់ផ្ទុះ ។
ហេតុនេះហើយបានជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តួចផ្តើមក្នុងការបង្កើតមជ្ឈមណ្ឌលសកម្មភាពមីនតំបន់អាស៊ាននេះឡើង ក្នុងអំឡុងពេលដែលកម្ពុជាធ្វើជាប្រធានអាស៊ានក្នុងឆ្នាំ២០១២ ។ លោកទេសរដ្ឋមន្ត្រីលើកឡើងថា ក្នុងជំហានទៅមុខ កម្ពុជាបានត្រៀមរួចរាល់ក្នុងការបន្តជួយមជ្ឈមណ្ឌលសកម្មភាពមីនតំបន់អាស៊ាន ហើយខ្ញុំមានជំនឿជាក់យ៉ាងមុតមាំថា សមាជិកនៃប្រទេសអាស៊ានទាំងអស់ក៏មានជំហរដូចគ្នាដែរ ។ ធ្វើដូច្នេះមជ្ឈមណ្ឌលសកម្មភាពមីនតំបន់អាស៊ាន អាចអនុវត្តអាណត្តិរបស់ខ្លួនពេញលេញនៅក្នុងកិច្ចប្រឹងប្រែងដោះស្រាយបញ្ហាគ្រាប់មិនទាន់ផ្ទុះសល់ពីសង្គ្រាម ផ្សព្វផ្សាយចំណេះដឹងអំពីគ្រោះថ្នាក់គ្រាប់មិនទាន់ផ្ទុះ និងកាកសំណល់មិនទាន់ផ្ទុះសល់ពីសង្គ្រាមនៅក្នុងតំបន់ដែលប្រជាជនរបស់យើងអាចទទូលបានផលប្រយោជន៍ និងរស់នៅក្នុងសន្តិភាព ស្ថិរភាព សន្តិសុខ និងវិបុលភាព ។
លោកទេសរដ្ឋមន្ត្រីបន្ទាប់ពីចុះហត្ថលេខាលើកិច្ចព្រមព្រៀងនេះ ខ្ញុំពិតជាមានសេចក្តីសង្ឃឹមថា មជ្ឈមណ្ឌលសកម្មភាពមីនតំបន់អាស៊ាន នឹងដើរតួនាទីកាន់តែសំខាន់ថែមទៀត ក្នុងការសម្របសម្រួលជាមួយភាគីពាក់ព័ន្ធទាំងអស់ក្នុងប្រទេសកម្ពុជា និងប្រតិបត្តិករបោសសម្អាតមីនផ្សេងទៀត ព្រមទាំងជាមួយស្ថាប័នតំបន់ និងអន្តរជាតិ រួមមានសេវាសកម្មភាពមីនរបស់អង្គការសហប្រជាជាតិ និងមជ្ឈមណ្ឌលបោសសម្អាតមីនអន្តរជាតិទីក្រុងហ្សឺណែវ ក្នុងការត្រៀមធនធាន និងការអនុវត្តសកម្មភាពក្នុងការជួយសង្គ្រោះជីវិតប្រជាជននៅក្នុងតំបន់របស់យើងនិងប្រទេសផ្សងៗទៀត ។
ជាការពិត កិច្ចព្រមព្រៀងនេះពិតជាផ្តល់កិច្ចសហប្រតិបត្តិការផ្លូវការកាន់ច្រើនថែមទៀតដល់មជ្ឈមណ្ឌលសកម្មភាពមីនតំបន់អាស៊ាន ជាពិសេសរវាងមជ្ឈមណ្ឌលសកម្មភាពមីនតំបន់អាស៊ាន និងរាជរដ្ឋាភិបាលកម្ពុជា នៅក្នុងប្រតិបត្តិការប្រកបដោយប្រសិទ្ឋិភាពពេញលេញ ។ ទោះបីជាយ៉ាងណាក៏ដោយ នៅមានកិច្ចការជាច្រើនត្រូវតែសម្រេចឲ្យបាន ។ យើងត្រូវតែបញ្ជូនសារនេះដល់ប្រជាជនអាស៊ានថា យើងមានការយកចិត្តទុក្ខដាក់យ៉ាងខ្លាំងដល់សុខមាលភាពប្រជាជនរបស់យើង ។ លោកទេសរដ្ឋមន្ត្រី ៖ ចំពោះរដ្ឋជាសមាជិកអាស៊ានទាំងអស់ ជាពិសេសប្រទេសហ្វីលីពីនអតីតប្រធានអាណត្តិមុន ចំពោះការគាំទ្រ និងការប្តេជ្ញាចិត្តចំពោះមជ្ឈមណ្ឌលសកម្មភាពមីនតំបន់អាស៊ាន ។
លោកទេសរដ្ឋមន្ត្រីបន្តថា លោកមានការជឿជាក់យ៉ាងមុតមាំថា ក្រោមការដឹកនាំរបស់ប្រទេសសឹង្ហបូរី តួនាទីរបស់មជ្ឈមណ្ឌលសកម្មភាពមីនតំបន់អាស៊ាន នឹងត្រូវបានពង្រឹងថែមទៀត និងអាចធានាបាននូវប្រភពធនធានហិរញ្ញវត្ថុគ្រប់គ្រាន់សំរាប់ចេរភាពរយៈពេលវែងរបស់ខ្លួន ។
លោក លី បញ្ញារិទ្ធ នាយកប្រតិបត្តិនៃមជ្ឈមណ្ឌលតំបន់អាស៊ានសម្រាប់សកម្មភាពមីនបានថ្លែងថា មជ្ឈមណ្ឌលនេះមានការបង្កើតនៅឆ្នោ២០១២នៅពេលកម្ពុជាជាប្រធានអាស៊ាន ។ វាមានកម្មវិធីសំខាន់ចំនួនបីគឺ ១.ពន្យល់ពីគ្រោះថ្នាក់ដោយសារគ្រាប់មីន ។ ២.ជួយសម្របសម្រួលដល់ជនរងគ្រោះដោយសារគ្រាប់មីន និង៣.ជួយដល់ប្រទេសក្នុងតំបន់អាស៊ានដែលចាប់អារម្មណ៍ពីផលប៉ះពាល់ដោយសារមីន កាកសំណល់ជាតិផ្ទុះបន្សល់ពីសង្គ្រាម ។
លោកបានលើកឡើងថា នៅក្នុងតំបន់អាស៊ានមានប្រទេសចំនួន៦ ដែលនៅមានបញ្ហាគ្រាប់មីនមាន កម្ពុជា ឡាវ ថៃ វៀតណាម ភូមា និងហ្វីលីពីន ។ សម្រាប់ប្រទេសកម្ពុជា បានទទួលផលប្រយោជន៍នោះកម្ពុជាជាម្ចាស់ផ្ទះ ហើយប្រទេសអាស៊ានទាំង១០យល់ព្រមក្នុងការបង្កមជ្ឈមណ្ឌលនេះ ។ កម្ពុជាមានបទពិសោធន៍ផ្នែកគ្រាប់មីន និងមានការបញ្ជូនកម្លាំងមួកខៀវទៅចូលជាមួយ UN រាប់ពាន់នាក់ ៕
ចែករំលែកព័តមាននេះ