ខេត្តប៉ៃលិន ៖ រហូតមកដល់ចុងខែកុម្ភៈនេះ គេសង្កេតឃើញប្រជាកសិករនៅក្នុងខេត្តប៉ៃលិន នាំគ្នាសម្រុកដាំដំឡូងមីច្រើនជាងឆ្នាំមុនៗ ខណ:តម្លៃទីផ្សារក៏កើនឡើងជាងឆ្នាំមុនដែរ ។ ចំណែកអ្នកខ្លះទៀត កំពុងតែមមាញឹកសម្រុកគាស់ដកដឹកតាមរថយន្តច្នៃ យកទៅលក់នៅតាមស្តង់នានាក្នុងក្រុង…
ខេត្តប៉ៃលិន ៖ រហូតមកដល់ចុងខែកុម្ភៈនេះ គេសង្កេតឃើញប្រជាកសិករនៅក្នុងខេត្តប៉ៃលិន នាំគ្នាសម្រុកដាំដំឡូងមីច្រើនជាងឆ្នាំមុនៗ ខណ:តម្លៃទីផ្សារក៏កើនឡើងជាងឆ្នាំមុនដែរ ។ ចំណែកអ្នកខ្លះទៀត កំពុងតែមមាញឹកសម្រុកគាស់ដកដឹកតាមរថយន្តច្នៃ យកទៅលក់នៅតាមស្តង់នានាក្នុងក្រុង ។
ប្រភពព័ត៌មានពីបុរសម្នាក់ឈ្មោះ ម៉ាន អាយុ៦២ឆ្នាំ រស់នៅក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន បានឱ្យដឹងថា នៅឆ្នាំ២០១៨នេះ បន្ទាប់ពីដកមើមដំឡូងមីលក់រួច គេសង្កេតឃើញថា ផលមានការធ្លាក់ចុះជាងឆ្នាំ២០១៧ ដោយឆ្នាំមុនការដាំដំឡូងមីក្នុងចម្ការរបស់គាត់ជាង៣ហិកតាដកលក់បាន៨០តោន ប៉ុន្តែមើមដំឡូងមីស្រស់១គីឡូក្រាមលក់បានតែ០,៨ទៅ០,៩បាត(ប្រាក់ថៃ)ប៉ុណ្ណោះ ។
គាត់បន្តទៀតថា ឯនៅដើមឆ្នាំ២០១៨នេះ ក្នុងចម្ការដដែលដកលក់បានត្រឹមតែ៥០តោន ប៉ុន្តែលក់ឱ្យឈ្មួញ មើមដំឡូងមីស្រស់បាន២បាតទៅ២,០៥បាត(ប្រាក់ថៃ) ពោលគឺបានថ្លៃជាងឆ្នាំមុនៗ ។ ដូច្នេះ បន្ទាប់ពីមានភ្លៀងធ្លាក់១មេធំកាលពីពេលថ្មីៗនេះ គាត់ក៏បានជួលត្រាក់ទ័រគេឱ្យភ្ជួរ រួចនាំប្រពន្ធកូនដាក់ដាំបន្តទៀត ។
ទោះជាយ៉ាងណា ការដាំដំឡូងមីនេះធ្វើឡើងដោយការផ្សងព្រេង បើសិនជាមានភ្លៀងធ្លាក់ជោកជាំនឹងមិនងាប់ឡើយ តែបើរាំងយូររហូតដល់ជាង១ខែ អាចនឹងងាប់ ហើយត្រូវទៅរកទិញដើមពីអ្នកដាំនៅក្បែរគ្នា ហើយនៅឆ្នាំនេះ ដើមដំឡូងមីក៏ឡើងថ្លៃខ្លាំងជាងឆ្នាំមុនដែរ ។
គាត់បញ្ជាក់ថា បើសិនជាតម្លៃទីផ្សារនៅឋិតថេរដដែល សង្ឃឹមថានឹងអាចដាំដំឡូងមីលក់បានប្រាក់សងជំពាក់បំណុលគេរួច តែបើសិនជាធ្លាក់ចុះនោះមានតែលក់ដីចម្ការសងធនាគារប៉ុណ្ណោះ ។ ចំណែកពលរដ្ឋម្នាក់ទៀតឈ្មោះ នាង នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន និយាយដែរថា គាត់ពិតជាសប្បាយចិត្ត បន្ទាប់ពីទីផ្សារដំឡូងមីកើនឡើងជាងឆ្នាំមុនៗ ។ គាត់បានដកដំឡូងក្នុងចម្ការជាង៥ហិកតា លក់បានជាង១០០តោន សងជំពាក់បំណុលគេរួចរាល់អស់ហើយ និងសល់លុយតិចតួចដើម្បីធ្វើដើមទុនដាំបន្តទៀត ។ គាត់ក៏សូមថ្លែងអំណរគុណដល់អាជ្ញាធរខេត្ត និងរាជរដ្ឋាភិបាល ដែលបានយកចិត្តទុកដាក់រកទីផ្សារឱ្យរក្សាតម្លៃនៅដដែល ហើយគាត់ជឿជាក់ថា នៅឆ្នាំក្រោយក៏មិនអនុញ្ញាតឱ្យឈ្មួញបញ្ចុះតម្លៃជាងនេះដែរ ៕
ចែករំលែកព័តមាននេះ