រាជធានីភ្នំពេញ ៖ ការប្រកួតប្រដាល់ដែលបានធ្វើឡើងនៅលើសង្វៀនទូរទស្សន៍អាស៊ីអាគ្នេយ៍ កាលពីថ្ងៃទី២៥ កុម្ភៈ កីឡាករកម្ពុជា រឿង សោភ័ណ្ឌ ដែលត្រូវគេស្គាល់ថា ជាម្ចាស់ខ្សែក្រវាត់មួយរូបបានបញ្ចេញថ្វីដៃគួរឱ្យកត់សម្គាល់ ប៉ុន្តែមិនអាចយកឈ្នះកីឡាករថៃឈ្មោះ Chai Suo បានទេ ដោយសារតែកីឡាករថៃក៏ជាម្ចាស់ខ្សែក្រវាត់ក្នុងប្រភេទទម្ងន់៦៩គីឡូក្រាមដែលទើបទទួលបាននៅក្នុងប្រទេសថៃនាពេលថ្មីៗផងដែរ ។
យ៉ាងណាមិញ រឿង សោភ័ណ្ឌ បានអះអាងថា មិនខ្លាចប៉ះជាមួយជើងខ្លាំងរូបនេះសម្រាប់លើកក្រោយនោះទេ បើទោះជាលទ្ធផលស្មើគ្នាលើកនេះ ត្រូវគេមើលឃើញថាដោយសារតែគណៈកម្មការផ្ដល់ពិន្ទុលើកមុខឱ្យបន្តិចក្តី។
កីឡាករ រឿង សោភ័ណ្ឌ បានអះអាងនៅខាងក្រោយសង្វៀនថា កីឡាករ Chai Suo ពិតជាមានជំហររឹងមាំ និងខ្លាំងមិនធម្មតាមែន ធ្វើឱ្យលោកពិបាកទប់ទល់គួរសម ។ លោកប្រឹងវាយបំបុកខ្លាំងណាស់ដែរតែមិនចូល ទើបក្នុងទឹកខ្លះធ្វើឱ្យលោកទ័លទី ហើយប្រើយុទ្ធសាស្ត្រវាយឆ្មក់ទៅវិញ ដោយសារតែជើង និងដៃ របស់កីឡាករថៃ គឺល្អពិបាកបំបែក ។ ប៉ុន្តែលោកថា អត់ខ្លាចសម្រាប់ការប៉ះគ្នាម្ដងទៀតនោះទេ ដោយអះអាងថា បើប៉ុស្ដិ៍អាស៊ីអាគ្នេយ៍រៀបចំឱ្យលោកប៉ះគ្នាបានឆាប់ក៏លោកសប្បាយចិត្ត ថ្វីដ្បិតតែលោកមិនទាន់ច្បាស់ថា ការជួបគ្នាជាថ្មីតើពិបាកដូចលើកនេះ ឬអាចពិបាកជាង ឬអាចល្អជាង។
លោកបានថ្លែងនៅពេលជជែកជាមួយអ្នកឱ្យទឹក និងអ្នកគាំទ្រឈរមើលថា បំណាច់បានស្មើម្ដងហើយ បើប៉ះគ្នាម្ដងទៀតក៏នឹងល្អមើលដែរ ដើម្បីដឹងថាទៅរួចឬទៅមិនរួច ។ មកទល់ពេលនេះ គេបានដឹងថា កីឡាករ រឿង សោភ័ណ្ឌ មានការត្រៀមខ្លួនច្រើនដើម្បីស្វាគមន៍គូប្រកួតនៅលើសង្វៀន ដោយតាំងពីបានល្បីឈ្មោះលោកត្រូវគេឃើញប៉ះជាមួយកីឡាករថៃច្រើននាក់ ដោយរួមមានទាំងកីឡាករជើងខ្លាំង និងកីឡាករជាម្ចាស់ខ្សែក្រវាត់ដូចកីឡាករ Chai Sou នៅក្នុងពេលនេះជាដើម ។ រឿង សោភ័ណ្ឌ ពេលខ្លះត្រូវគេឱ្យប៉ះជាមួយកីឡាករដដែលរហូតទាល់តែលោកប្រកែកលែងប៉ះប្រកួតក៏មាន ដោយសារតែកីឡាករថៃខ្លះមានសមត្ថភាពលើសលប់ខ្លាំងពេក ដែលលោកមិនអាចនឹងស្ដារជ័យជម្នះ។
អ៊ីចឹងហើយទើបការប៉ះប្រកួតជាមួយកីឡាករថៃដែលជាម្ចាស់ខ្សែក្រវាត់២តង់ ដែលទើបទទួលបានរូបនេះ មិនមែនជារឿងព្រឺរោមរបស់ រឿង សោភ័ណ្ឌ នោះទេ ដោយសារតែលោកប៉ះជាមួយលើកទី១ កាលពីថ្ងៃអាទិត្យក៏បានលទ្ធផលស្មើបើកឆាក ថ្វីដ្បិតថាអ្នកទស្សនាខ្លះយល់ថាកីឡាករថៃមានប្រៀបជាង និងថាការឱ្យស្មើគឺដើម្បីកុំឱ្យលោកបាក់ទឹកចិត្តដែលខំប្រឹងប្រែងប៉ុណ្ណោះ ។ រឿង សោភ័ណ្ឌ ត្រូវគេដឹងថា មិនមែនជាលើកទី១នោះទេ ដែលលោកបានប៉ះជាមួយម្ចាស់ខ្សែក្រវាត់មកពីប្រទេសថៃ ហើយទទួលបានលទ្ធផលស្មើទាំងលំបាក ប៉ុន្តែលោកក៏ត្រូវគេមើលឃើញថាមានសមត្ថភាពគួរឱ្យសរសើរផងដែរ មុនពេលមានការប្រកាសឱ្យស្មើក្រោយបញ្ចប់ការប្រកួត។
លោក ថៃ អ៊ូ អ្នកដឹកនាំកីឡាករថៃឱ្យមកប្រកួតនៅសង្វៀនទូរទស្សន៍បានសរសើរពីសមត្ថភាពរបស់រឿង សោភ័ណ្ឌ ប៉ុន្តែលោកថា បើការប្រកួតមួយនេះធ្វើឡើងនៅក្នុងប្រទេសថៃ វាយដូចរឿង សោភ័ណ្ឌ ប៉ុនហ្នឹងគឺគេនឹងឱ្យកីឡាករថៃឈ្នះ ។ លោកថា នេះជាការប៉ះគ្នារវាងម្ចាស់ខ្សែក្រវាត់២រូបមកពីកម្ពុជា និងថៃ ដោយលោកបានចាត់ទុកការប្រកួតគូនេះល្អមើល ប៉ុន្តែក៏មានចំណុចស្ទក់ៗមួយសាផងដែរ ដោយសារតែកីឡាករថៃក៏មិនហ៊ានសម្រុក ហើយរឿង សោភ័ណ្ឌ ក្រោយពេលសម្រុកមិនចុះក៏បន្ថយកម្លាំងដៃវិញ ។ បើសិនគូនេះវាយគ្នាពេញទំហឹង លោកថាប្រហែលជាមានអ្នកគ្រោះថ្នាក់ ហើយក៏នឹងល្អមើលជាងហ្នឹងទៅទៀត ប៉ុន្តែលោកក៏មិនចង់ឱ្យការប្រកួតល្អខ្លាំង ហើយលទ្ធផលចុងក្រោយ កីឡាករកម្ពុជា និងថៃ ប៊ិះស្លាប់ប៊ិះរស់នោះទេ ។
លោកនៅតែអះអាងថា កីឡាកររបស់លោកប្រកួតមិនអស់សមត្ថភាព ដោយថាបើកុំតែមានបញ្ហារឿងធ្វើដំណើរផ្លូវឆ្លាយ និងរបបអាហារមិនសូវត្រូវនៅក្នុងប្រទេសកម្ពុជា គឺកីឡាកររបស់លោកប្រកួតល្អជាងហ្នឹងឆ្ងាយណាស់ ។ លោកថាកីឡាកររបស់លោកអត់មានបញ្ហាសុខភាពនោះទេ ប៉ុន្តែគេហាក់មិនទាន់ស៊ាំនឹងបរិយាកាសនៅកម្ពុជា ទើបធ្វើឱ្យការប្រកួតរបស់គេថយចុះគុណភាព បើធៀបនឹងពេលគេឡើងរេញ ហើយទើបតែទទួលបានខ្សែក្រវាត់ជើងឯកដល់ទៅ២ក្នុងពេលថ្មីៗ ។ លោកប្រកាសថា នឹងឱ្យកីឡាកររបស់ខ្លួនឡើងប្រកួតប៉ះគ្នាជាមួយរឿង សោភ័ណ្ឌជាថ្មីក្នុងពេលដ៏ខ្លី ដោយលោករំពឹងថាបើគ្មានរឿងភ្លាត់ស្នៀត និងគ្មានបញ្ហាសុខភាព គឺនឹងល្អមើលជាងនេះ ហើយកីឡាកររឿង សោភ័ណ្ឌ ពិតជាពិបាកតាមស្មើជាថ្មីនោះផង ។
លោកក៏បានបញ្ជាក់ថា កីឡាករកម្ពុជា រឿង សោភ័ណ្ឌ ក៏ជាកីឡាករល្អម្នាក់ដែលពិបាកមើលស្រាលផងដែរ ជាពិសេសបន្ទាប់ពីអាចយកស្មើជាមួយកីឡាកររបស់លោកដែលជាម្ចាស់ខ្សែក្រវាត់២នៅក្នុងប្រទេសថៃ មុនពេលលោកជ្រើសរើសមកប្រកួត ។ លោកមិនទាន់កំណត់ពេលវេលាដើម្បីឱ្យការប្រកួតរបស់គូនេះកើតឡើងជាថ្មីនោះទេ ដោយរង់ចាំឱ្យកីឡាករម្ខាងៗមានពេលត្រូវគ្នា និងទទួលយកការប្រកួតដូចគ្នាសិន ដើម្បីកុំឱ្យមានបញ្ហារឿងអ្នកនេះមានបញ្ហាសុខភាព ឬអត់ពេលហ្វឹកហាត់ នាំឱ្យមានការប្រកាសថាមិនសុខចិត្តទៀត ។
លោកថា កីឡាកររបស់លោកបើកុំមានរឿងធ្វើដំណើរផ្លូវឆ្ងាយ និងមិនសូវបានសម្រាកពេលមកដល់កម្ពុជា ស្ថានភាពប្រកួតពិតជាកក្រើក ហើយស្រួលមិនស្រួលកីឡាករជើងខ្លាំងរឿង សោភ័ណ្ឌអាចទប់មិនជាប់ ឬភ្លាត់ស្នៀតក៏ថាបាន ។ ការប្រកួតនៅក្នុងថ្ងៃនោះ លោកដឹងតាំងពីបើកឆាកការប្រកួតថា កីឡាករទាំងពីរនឹងមិនស៊ីសងគ្នាទេ ដោយសារតែកីឡាកររបស់លោកដ្បិតថារឹងជំហរជាង ប៉ុន្តែបច្ចេកទេសរបស់គេពេលប៉ះជាមួយរឿង សោភ័ណ្ឌ គឺនៅមានកម្រិត ហើយលោកដឹងទៀតថា គេពិតជាមិនវាយខ្លាំងក្លាដូចនៅប្រទេសថៃនោះទេ ទើបលទ្ធផលស្មើគឺជារឿងល្អមួយដែលលោកយល់ថាសមស្របសម្រាប់ជើងខ្លាំងទាំង២៕
ចែករំលែកព័តមាននេះ