រាជធានីភ្នំពេញ ៖ កាលពីឆ្នាំ២០១៧កន្លងមក វិស័យកាត់ដេរ និងសំណង់បានជំរុញឲ្យឧស្សាហកម្មកម្ពុជាមានភាពល្អប្រសើរ និងសម្រេចបានកំណើន២ខ្ទង់ ។ បើតាមរបាយការណ៍របស់ធនាគារជាតិនៃកម្ពុជា ចេញផ្សាយកាលពីដើមខែមុននេះ បានបង្ហាញថា…
រាជធានីភ្នំពេញ ៖ កាលពីឆ្នាំ២០១៧កន្លងមក វិស័យកាត់ដេរ និងសំណង់បានជំរុញឲ្យឧស្សាហកម្មកម្ពុជាមានភាពល្អប្រសើរ និងសម្រេចបានកំណើន២ខ្ទង់ ។
បើតាមរបាយការណ៍របស់ធនាគារជាតិនៃកម្ពុជា ចេញផ្សាយកាលពីដើមខែមុននេះ បានបង្ហាញថា វិស័យឧស្សាហកម្មក្នុងឆ្នាំ២០១៧កន្លងទៅ សម្រេចបានកំណើនប្រមាណ១០,៥%ដែលគាំទ្រយ៉ាងសំខាន់ដោយវិស័យកាត់ដេរ និងសំណង់ ។ ក្នុងនោះដែរ វិស័យកាត់ដេរបានរួមចំណែកប្រមាណ១,៤%នៃផលិតផលក្នុងស្រុកសរុប និងវិស័យសំណង់បានរួមចំណែកប្រមាណ១,៥%នៃផលិតផលក្នុងស្រុកសរុប ។
របាយការណ៍បន្ដថា នៅក្នុងវិស័យកាត់ដេរ កាលពីឆ្នាំ២០១៧ ការនាំចេញសម្លៀកបំពាក់សម្រេចបានរហូតដល់៦៤%នៃការនាំចេញសរុប ដែលមានទឹកប្រាក់រហូតដល់៦ពាន់លានដុល្លារអាមេរិក មានកំណើន៨% ។ ក្នុងវិស័យកាត់ដេរនេះ ការនាំចេញស្បែកជើងក្នុងឆ្នាំ២០១៧ មានសមាមាត្រប្រមាណ៨%នៃការនាំចេញសរុប និងមានទឹកប្រាក់ប្រមាណ៧០០លានដុល្លារអាមេរិក ។
បើតាមលោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម បានឲ្យដឹងថា គិតត្រឹមឆ្នាំ២០១៧ រោងចក្រធុនធំនៅក្នុងព្រះរាជាណាចក្រកម្ពុជា មានចំនួនសរុប១.៧០៧ ក្នុងនោះរោងចក្រកាត់ដេរសម្លៀកបំពាក់ និងស្បែកជើង មានចំនួន១.១៤៣រោងចក្រ និងបានផ្ដល់ការងារសរុបដល់កម្មករ-កម្មការិនីកម្ពុជា ប្រមាណជាង៩៧ម៉ឺននាក់ ។
រាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការ ក៏បានស្វះស្វែងរកទីផ្សារសម្រាប់ផលិតផលវាយនភ័ណ្ឌ និងឧស្សាហកម្មកាត់ដេរនេះដែរ ។ ជាក់ស្ដែង នៅចុងឆ្នាំ២០១៧កន្លងទៅនេះ កម្ពុជាបានរៀបចំឲ្យមានជំនួបធំមួយរវាងវិនិយោគិន និងអ្នកបញ្ជាទិញ ដើម្បីបង្កើនការបណ្ដាក់ទុនលើវិស័យនេះនៅក្នុងប្រទេសកម្ពុជា ហើយកម្ពុជានឹងបានចរចាជាមួយបណ្ដាប្រទេសធំៗនៅលើពិភពលោក ដើម្បីបើកច្រករកទីផ្សារថ្មីសម្រាប់ផលិតផលវាយនភ័ណ្ឌ និងស្បែកជើង ជាដើម ។
ដោយឡែក វិស័យសំណង់វិញ ក្នុងរបាយការណ៍ដដែលបានបង្ហាញផងដែរថា ការហូរចូលនៃការវិនិយោគ និងកំណើនតម្រូវការពីប្រជាពលរដ្ឋដែលមានចំណូលមធ្យម បានជំរុញឲ្យវិស័យសំណង់នៅតែមានកំណើនខ្ពស់ ក៏ប៉ុន្តែបើធៀបនឹងឆ្នាំ២០១៦ កំណើននេះហាក់មានការថមថយបន្តិចដូចគ្នា ក្នុងនោះការនាំចូលសម្ភារសំណង់ក៏មានកំណើនថមថយ ពីព្រោះឆ្នាំ២០១៧កន្លងទៅនេះ គម្រោងសាងសង់មួយចំនួនដល់ដំណាក់កាលបញ្ចប់ ប៉ុន្តែត្រូវការសម្ភារបំពាក់អគារវិញ ដូចជា សម្ភារអគ្គិសនី និងអេឡិចត្រូនិក ជាដើម ដែលបានធ្វើឲ្យការនាំចូលសម្ភារទាំងនោះកើនឡើងខ្ពស់ ។
បច្ចុប្បន្ន គេសង្កេតឃើញមានវិនិយោគិនក្រៅនិងក្នុងប្រទេស បានបណ្ដាក់ទុនជាហូរហែ ក្នុងនោះវិនិយោគបរទេសបានបណ្ដាក់ទុនវិនិយោគទៅលើអគារខ្ពស់ៗនិងទំនើប ខណៈវិនិយោគិនក្នុងស្រុកភាគច្រើនបណ្ដាក់ទុនទៅលើសំណង់លំនៅឋានសម្រាប់ផ្គត់ផ្គង់ដល់ពលរដ្ឋដែលមានកំណើនកាន់តែខ្ពស់ ។
ផ្អែកតាមអ្នកវាយតម្លៃ នៅឆ្នាំខាងមុខ តម្រូវការលំនៅឋាននៅរាជធានីភ្នំពេញ នឹងកើនដល់១ម៉ឺនខ្នងក្នុង១ឆ្នាំ ដូចនេះ ត្រូវឲ្យមានការអភិវឌ្ឍជាបន្តបន្ទាប់ទៀតដើម្បីឆ្លើយតបនឹងតម្រូវការ ៕
ចែករំលែកព័តមាននេះ