ការដេកមិនលក់ ឬដេកលក់មិនស្កប់គឺជាបញ្ហាមួយដែលកើតលើមនុស្សស្ទើរតែគ្រប់គ្នា ជាពិសេសមនុស្សមានវ័យកណ្តាលឡើងទៅ ។ បើទោះបី វាមិនមែនជាជំងឺដែលអាចគម្រាមកំហែងដល់ជីវិតក្តី ប៉ុន្តែការដេកមិនលក់ ឬទទួលទានដំណេកមិនគ្រប់គ្រាន់ពិតជាប៉ះពាល់ខានពុំបានទៅលើមុខងារយល់ដឹង និងមុខងារចងចាំរបស់ខួរក្បាល ។ បើជាអ្នកសិក្សានឹងធ្វើឱ្យប៉ះពាល់ដល់ការគិត
ការដេកមិនលក់ ឬដេកលក់មិនស្កប់គឺជាបញ្ហាមួយដែលកើតលើមនុស្សស្ទើរតែគ្រប់គ្នា ជាពិសេសមនុស្សមានវ័យកណ្តាលឡើងទៅ ។ បើទោះបី វាមិនមែនជាជំងឺដែលអាចគម្រាមកំហែងដល់ជីវិតក្តី ប៉ុន្តែការដេកមិនលក់ ឬទទួលទានដំណេកមិនគ្រប់គ្រាន់ពិតជាប៉ះពាល់ខានពុំបានទៅលើមុខងារយល់ដឹង និងមុខងារចងចាំរបស់ខួរក្បាល ។ បើជាអ្នកសិក្សានឹងធ្វើឱ្យប៉ះពាល់ដល់ការគិតខណៈអ្នកធ្វើការងារនឹងនាំឱ្យមានកំហុសដោយមិនដឹងខ្លួន ។ ធ្ងន់ជាងនេះ បញ្ហាដំណេកអាចនឹងនាំឱ្យយើងប្រឈមការឡើងឈាម ឡើងទម្ងន់ មានបញ្ហាបេះដូង… ។ មានដំណោះស្រាយ៥ចំណុចរបស់ក្រុមជំនាញដែលយើងសូមបង្ហាញជូនលោកអ្នកសាកល្បង៖
១- ត្រូវជៀសវាងមើលទូរទស្សន៍មុនពេលចូលដេក ឬមើលទូរទស្សន៍ពេលចូលដេក ៖
កន្លែងដេកគួរតែរៀបចំសម្រាប់តែរឿង២ប៉ុណ្ណោះ ទី១សម្រាប់ដេក និងទី២សម្រាប់ការរួមមេត្រីរវាងបុរសនិងស្ត្រី ។ តាមការសិក្សាស្រាវជ្រាវបានបង្ហាញថា អ្នកដែលច្រើនជួបបញ្ហាដេកមិនលក់ក៏ព្រោះគេមើលទូរទស្សន៍ក្នុងបន្ទប់ដេក ឬក៏ប្រើទូរទស្សន៍ជាថ្នាំឱ្យខ្លួនឆាប់ដេកលក់ ។
២-សូមផ្លាស់ប្តូរខ្នើយ ឬពូក ៖
វាពិតជាគួរឱ្យខ្លាច និងមិនហា៊នគិតដល់ដែលមនុស្សភាគច្រើនចូលចិត្តប្រើខ្នើយនិងពូកតែមួយរាប់ឆ្នាំ ។ តើពូកនោះពិតជាផ្តល់ឱ្យនូវអ្វីដែលអ្នកត្រូវការមែនទេ? តើអ្នកធ្លាប់ភ្ញាក់ពីដំណេកហើយចុកខ្នងដែរឬទេ ? តើអ្នកទទួលទានដំណេកបានស្កប់ស្កល់ ឬយ៉ាងណាពេលដែលផ្លាស់ប្តូរកន្លែងដេក ? ទាំងអស់នេះជាសំណួរដែលអ្នកសួរខ្លួនឯង ថាតើពូក-ខ្នើយប្រើអស់ជាច្រើនឆ្នាំរបស់អ្នកជាអ្នកបំផ្លាញដំណេកមែនទេ ។ ចូរចាំថា បរិស្ថានគ្រែដេកគឺជាជំនួយមួយក្នុងការទទួលទានដំណេកបានស្កប់ស្កល់ ។
៣- ជៀសវាងទទួលទានសារធាតុកាហ្វេអុីនពេលល្ងាច ៖
តើអ្នកមានដឹងទេថា សូម្បីចំនួនសារធាតុកាហ្វេអុីនដ៏តិចតួចដែលអ្នកទទួលទាន១០-១២ម៉ោងមុនពេលចូលដេកក៏អាចធ្វើឱ្យប៉ះពាល់ដល់ការទទួលទានដំណេករបស់អ្នកដែរ ។ ដូច្នេះសូមសាកល្បងកុំផឹកតែ កាហ្វេ សូដាឬទទួលទានសូកូឡាដើម្បីពិសោធន៍ថាតើ បញ្ហាដំណេករបស់អ្នកបានល្អប្រសើរដែរឬទេ ។
៤- ស្តាប់តន្ត្រីបន្ធូរអារម្មណ៍ ៖
ការបង្កើតទម្លាប់បន្ធូរអារម្មណ៍ពេលចូលដេកតួយ៉ាងដូចជាការស្តាប់តន្ត្រីគួបផ្សំនឹងការប្រើអំពូលភ្លើងស្រទំអាចជារឿងមួយដែលអ្នកត្រូវធ្វើដើម្បីផ្តល់ជាសញ្ញាដល់រាងកាយរបស់ខ្លួនថា«ដល់ពេលចូលដេកហើយ» ។
៥- ចូរសាកល្បងប្រើបច្ចេកទេសចិត្ត-រាងកាយ ៖
បន្ទាប់ពីបានបញ្ចប់ថ្ងៃដ៏រីករាយ ខួរក្បាលនិងរាងកាយរបស់អ្នកត្រូវការសម្រាកមុនពេលដំណេកអាចកើតមាន ។ បង្កើតសកម្មភាពជាទម្លាប់មុនពេលចូលដេកដូចជា ងូតទឹក ភាវនាចិត្ត ឬក៏ហាត់យោគៈ ។ សូមព្យាយាមធ្វើសកម្មភាពដដែលៗទាំងនេះនៅកន្លែងតែមួយ ពេលតែមួយរៀងរាល់យប់ ។ ការធ្វើដដែលៗនឹងបង្ហាញដល់ចិត្ត និងរាងកាយរបស់អ្នកឱ្យដឹងថា ដល់ពេលសម្រាក និងចូលដេក ៕
ចែករំលែកព័តមាននេះ