ខេត្តបន្ទាយមានជ័យ ៖ ម្ចាស់មន្ទីរសម្រាកព្យាបាល និងសម្ភពនគររាជបានអះអាង តាមទូរស័ព្ទថា បានទៅកាន់មូលដ្ឋានអាវុធហត្ថក្រុងប៉ោយប៉ែតដាក់ពាក្យបណ្តឹងរួចហើយ ពីគ្រួសារមួយត្រូវជាឱពុកម្តាយនាងប្រពន្ធដើម របស់លោកអនុសេនីយ៍ឯក មួន សេងហួង…
ខេត្តបន្ទាយមានជ័យ ៖ ម្ចាស់មន្ទីរសម្រាកព្យាបាល និងសម្ភពនគររាជបានអះអាង តាមទូរស័ព្ទថា បានទៅកាន់មូលដ្ឋានអាវុធហត្ថក្រុងប៉ោយប៉ែតដាក់ពាក្យបណ្តឹងរួចហើយ ពីគ្រួសារមួយត្រូវជាឱពុកម្តាយនាងប្រពន្ធដើម របស់លោកអនុសេនីយ៍ឯក មួន សេងហួង នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត បន្ទាប់ពីជេរប្រមាថក្រុមគ្រូពេទ្យនៅទីនោះ ដោយសារជម្លោះនាងប្រពន្ធដើម វាយនាងប្រពន្ធចុង ខណៈប្តីកំហូចលួចលាក់កំពុងមើលថែដាក់សារ៉ូម ក្រោយនាងវះកាត់យកកូនក្រៅស្បូនអាយុ២ខែកន្លះចេញ ។
លោកជាត ហួន ម្ចាស់គ្លីនិកខាងលើប្រាប់តាមទូរស័ព្ទនៅព្រឹកថ្ងៃទី២៦ ខែកុម្ភៈថា មូលហេតុដែលគ្រួសារលោកសម្រេចដាក់ពាក្យបណ្តឹងនាយរងប៉ុស្តិ៍នគរបាលអន្តោប្រវេសន៍ លោកវរសេនីយ៍ទោនួន ច័ន្ទសុភ័ក្រ និងប្រពន្ធឈ្មោះ នី ដោយសារថ្ងៃកើតហេតុគ្រួសារខាងលើ បានទៅរករឿង និងជេរប្រមាថដល់ក្រុមគ្រូពេទ្យរបស់លោក ក្នុងគ្លីនិក ។ ម្ចាស់គ្លីនិកបញ្ជាក់ថា បណ្តឹងនេះ គឺក្នុងគោលបំណងឲ្យគ្រួសារខាងលើសុំទោសក្រុមគ្រូពេទ្យជាសាធារណៈ និងមានលិខិតស្នាម ហើយមិនទាមទារសំណងសូម្បីតែ១រយរៀល ។
គួរបញ្ជាក់ថា ដើមចមឈានដល់ម្ចាស់គ្លីនិកខាងលើ ដាក់ពាក្យបណ្តឹង គឺកាលពីរសៀលថ្ងៃទី២៣ ខែកុម្ភៈនេះ លោកអនុសេនីយ៍ឯកមួន សេងហួង បាននាំស្រីក្មេងសាច់សខ្ចីវ័យជាង២០ឆ្នាំម្នាក់ ដែលគេសង្ស័យថា ជាប្រពន្ធចុងទៅកាន់គ្លីនិកខាងលើ ឲ្យគ្រូពេទ្យនៅទីនោះដាក់សារ៉ូមឲ្យ ព្រោះនាងទើបវះកាត់យកកូនក្រៅស្បូនអាយុ២ខែកន្លះចេញ កាលពីជាងកន្លះខែមុន នៅគ្លីនិកដដែលនេះ ។
ប្រភពថា ខណៈលោកមួន សេងហួង កំពុងអង្គុយសាសងមើលស្រីស្នេហ៍ ដាក់សារ៉ូមស្រាប់តែ នាងប្រពន្ធដើមឈ្មោះលីន មិនស្គាល់ត្រកូលជាខ្មែរអ៊ីស្លាម បានចូលទៅដល់ផ្ទុះ ជាជម្លោះឡើងវាយគ្នាផ្អើលគ្លីនិកតែម្តង ។ ប្រភពបន្តថាក្រោយពីបុរសជិះទូក២អូសទាញនាងដើម ទៅបាត់មួយសន្ទុះក្រោយមក នាងបានត្រឡប់មកកន្លែងកើតហេតុវិញម្តងទៀត ជាមួយឱពុកឈ្មោះនួន ច័ន្ទសុភ័ក្រ ជានាយរងប៉ុស្តិនគរបាលអន្តោប្រវេសន៍ ច្រកទ្វារអន្តរជាតិប៉ោយប៉ែត និងម្តាយឈ្មោះ នី សង្ស័យចង់បើកឆាកប្រយុទ្ធផ្តាច់ព្រាត់ ប៉ុន្តែនាងប្រពន្ធចុងរបស់ប្តី ឈ្មោះដា អាយុជាង២០ឆ្នាំ បានគេចទៅបាត់ ។
ដោយសារការវិលត្រឡប់ទៅជាលើកទី២ មិនជួបនាងប្រពន្ធចុង ឪពុកម្តាយនាងដើម បានខឹងសម្បា និងក្រុមគ្រូពេទ្យដោយប្រើពាក្យជេរប្រមាថ និងសុំឆែកឆេររកនាងប្រពន្ធចុងនោះ ហើយចោទថា ម្ចាស់គ្លីនិក និងក្រុមគ្រូពេទ្យលាក់មនុស្ស ដរាបណាម្ចាស់គ្លីនិកទាក់ទងហៅកម្លាំងអាវុធហត្ថ ចុះដល់កន្លែងកើតហេតុ ទើបគ្រួសារមួយនេះចាកចេញពីកន្លែងកើតហេតុ ។ ប្រភពថា លោកមួន សេងហួង បានព្យាយាមលាក់បាំងគេឯងរឿង ករណីខាងលើដោយថា នាងនោះទៅដាក់សារ៉ូម ព្រោះកើតជំងឺដុះខ្នែងពោះវៀន តែប្រភពពីគ្រូពេទ្យនៅទីនោះនិយាយថា នាងនោះកាលពីមុនកើតហេតុកន្លះខែ បានចូលទៅគ្លីនិកដដែលដោយឲ្យគ្រូពេទ្យវះយកកូនក្រៅស្បូនអាយុ២ខែកន្លះចេញ លុះដល់ថ្ងៃកើតហេតុនាងមិនស្រួលខ្លួនក៏ឃើញឈ្មោះមួន សេងហួង នាំទៅដាក់សារ៉ូមម្តងទៀត ទើបក្លាយជាជម្លោះដោយសារនាងដើមតាមទាន់តែម្តង ៕
ចែករំលែកព័តមាននេះ