រដ្ឋធានីវ៉ាស៊ីនតោន ៖ លោកប្រធានាធិបតីអាមេរិក ដូណាល់ ត្រាំ បាននិយាយកាលពីថ្ងៃសុក្រកន្លងមកថា ទំនាក់ទំនងរបស់អាមេរិកជាមួយប្រទេសចិនស្ថិតក្នុងស្ថានភាពល្អបំផុត ប៉ុន្តែការធ្វើពាណិជ្ជកម្ម គឺជាបញ្ហាដ៏ធំមួយ ។
លោកនិយាយថា ៖« ខ្ញុំមិនគិតថា ពួកយើងធ្លាប់មានទំនាក់ទំនងល្អជាមួយប្រទេសចិនដូចពេលនេះទេ ។ ពួកគេបានធ្វើបាបយើងក្នុងផ្នែកពាណិជ្ជកម្មអស់រយៈពេលជាយូរមកហើយ » ។
គួរបញ្ជាក់ថា លោកត្រាំ តែងតែអះអាងថា ការដឹកនាំរបស់លោក គឺនាំឲ្យសហរដ្ឋអាមេរិកមានទំនាក់ទំនងល្អបំផុតជាមួយប្រទេសមួយចំនួនដូចជា អូស្ត្រាលី អង់គ្លេស និងចិន។
លោកបន្តថា ៖« កត្តាតែមួយគត់ដែលអាចជាឧបសគ្គនោះ គឺការធ្វើពាណិជ្ជកម្ម ។ យើងមិនគួរអនុញ្ញាតឲ្យបញ្ហានេះកើតមានឡើយ ។ វាពិតជាអយុត្តិធម៌ណាស់សម្រាប់សហរដ្ឋអាមេរិក » ។
ជាមួយគ្នានេះ លោកត្រាំ ក៏បានអួតអាងពីទំនាក់ទំនងរបស់លោកជាមួយលោកប្រធានាធិបតីចិន ស៊ី ជិនពីង ថែមទៀត ។
លោកបន្ថែមថា ៖« ទំនាក់ទំនងផ្ទាល់ខ្លួនរបស់ខ្ញុំជាមួយលោកប្រធានាធិបតី ស៊ី ពិតជាអស្ចារ្យណាស់ ។ លោកជាមនុស្សដែលខ្ញុំចូលចិត្ត ខ្ញុំគិតថា លោកក៏ចូលចិត្តខ្ញុំដែរ ។ ទោះជាយ៉ាងណា លោកស៊ី ចូលចិត្តប្រទេសចិន ហើយខ្ញុំចូលចិត្តសហរដ្ឋអាមេរិក បើទោះជាខ្ញុំចង់គោរពលោកស៊ីពិតមែន ប៉ុន្តែពួកយើងត្រូវតែដោះស្រាយបញ្ហាវិសមភាពពាណិជ្ជកម្មនេះ » ។
នាពេលថ្មីៗនេះ ក្រសួងពាណិជ្ជកម្មសហរដ្ឋអាមេរិកបានផ្តល់យោបល់ឲ្យដាក់ពន្ធយ៉ាងធ្ងន់ធ្ងរលើចិន និងប្រទេសដទៃទៀត ដើម្បីដោះស្រាយបញ្ហាការផ្គត់ផ្គង់ដែកថែប និងអាលុយមីញ៉ូមលើសលប់ ។ ប្រទេសចិនបានព្រមានថា ពួកគេអាចនឹងចេញសកម្មភាពសងសឹកវិញ ប្រសិនបើវាចាំបាច់ ៕
ចែករំលែកព័តមាននេះ