រាជធានីភ្នំពេញ ៖ ព្រឹត្តិការណ៍ប្រណាំងម៉ូតូលើវាលរាប(KARA) ដែលគ្រោងរៀបចំធ្វើ រយៈពេល២ថ្ងៃពីថ្ងៃទី១៧ដល់១៨ មីនា នៅលើទីលានពហុកីឡដ្ឋានមរតកតេជោឆ្នាំនេះ ត្រូវបានអ្នករៀបចំអះអាងថា នឹងកាន់តែល្អ ប្លែកជាងឆ្នាំមុនៗទាំងកម្រិតបច្ចេកទេស…
រាជធានីភ្នំពេញ ៖ ព្រឹត្តិការណ៍ប្រណាំងម៉ូតូលើវាលរាប(KARA) ដែលគ្រោងរៀបចំធ្វើ
រយៈពេល២ថ្ងៃពីថ្ងៃទី១៧ដល់១៨ មីនា នៅលើទីលានពហុកីឡដ្ឋានមរតកតេជោឆ្នាំនេះ ត្រូវបានអ្នករៀបចំអះអាងថា នឹងកាន់តែល្អ ប្លែកជាងឆ្នាំមុនៗទាំងកម្រិតបច្ចេកទេស និងការគាំទ្រពីមហាជន ។ កាលពីឆ្នាំមុនរៀបចំធ្វើនៅខេត្តបាត់ដំបង មានអ្នកចូលរួមទស្សនាយ៉ាងច្រើនកុះករ ចំណែកឆ្នាំនេះតាមការវាយតម្លៃពីអ្នកឯកទេសខាងរៀបចំព្រឹត្តិការណ៍ KARAអាចនឹងមានអ្នកចូលរួមទស្សនាមិនតិចជាង៦ពាន់នោះទេ ដោយផ្អែកទៅលើភូមិសាស្ត្រល្អនិងទីធ្លាធំទូលាយ។
លោក ពៅ តិចឡេង អ្នករៀបចំព្រឹត្តិការណ៍KARAបានឱ្យដឹងថា ព្រឹត្តិការណ៍ប្រណាំងម៉ូតូលើវាលរាបដែលហៅកាត់ថាKARAត្រូវបានរៀបចំធ្វើឡើងជារៀងរាល់ឆ្នាំហើយលើកនេះគឺជាឆ្នាំទី៣ក្រោមការរៀបចំដោយសហព័ន្ធកីឡាយានយន្តកម្ពុជា និងទទួលបានការគាំទ្រពីគណៈកម្មាធិការជាតិអូឡាំពិកកម្ពុជា ។ លោកថា ការប្រកួតឆ្នាំនេះមានការខុសប្លែកជាងឆ្នាំមុន ដូចជាមានការប្រែប្រួលបទបញ្ជាប្រកួតខ្លះៗ។
ចំណែកវិញ្ញាសាប្រកួតក៏កើនឡើងជាងមុនដែរ ដោយគណៈកម្មការប្រកួតសម្រេចដាក់ចំនួន៥វិញ្ញាសាដូចជា៖
១-កម្រិតAប្រភេទម៉ូតូកែឆ្នាំ ដែលមានកម្លាំង១៥០CC។
២-កម្រិតBម៉ូតូអំប្រ៊ីយ៉ា ដែលមានកម្លាំង
ចាប់ពី១៣៥CCដល់១៥០CC។
៣-កម្រិតCម៉ូតូអំប្រ៊ីយ៉ាដូចគ្នា មានកម្លាំង១២៥CC។
៤-កម្រិតDម៉ូតូប្រភេទលេខអូតូ មានកម្លាំង១១០CCដល់១២៥CC និង
៥-ការប្រណាំងម៉ូតូប្រភេទEndurance ជាក្រុមដែលមានកម្លាំងចាប់ពី១៣៥CCដល់២១០CCប្រើថិរវេលា២ម៉ោង៣០នាទី ដែលវិញ្ញាសាមួយនេះមិនធ្លាប់មានពីមុនមកឡើយ។
លោកបានឱ្យដឹងទៀតថា ម៉ូតូប្រណាំងប្រភេទនេះត្រូវមានគ្នាយ៉ាងតិច២នាក់ឡើងទៅ អ្នកជិះម្នាក់មិនឱ្យលើសពី៣០នាទីនោះទេត្រូវតែប្ដូរអ្នកផ្សេងវិញ ។ ការប្រណាំងត្រូវ
កំណត់ជុំសម្រាប់ការចាញ់ឈ្នះ បានន័យថា ក្នុងរយៈពេល២ម៉ោង៣០នាទីនេះ អ្នកណាជិះបានច្រើនជុំជាងគឺជាអ្នកឈ្នះ ។ រីឯតម្លៃចុះឈ្មោះប្រកួតវិញចាប់ពីកម្រិតAដល់Dក្នុង១នាក់៥០ដុល្លារ និងប្រភេទEnduranceត្រូវបង់១០០ដុល្លារ ។ សម្រាប់អ្នកចូលរួមប្រកួតអាយុចាប់ពី១២ឆ្នាំដល់១៨ឆ្នាំត្រូវសុំការអនុញ្ញាតពីឪពុកម្ដាយនិងអាណាព្យាបាលជាមុនសិន និងអាយុចាប់ពី១៨ឆ្នាំឡើងអាចមកចុះឈ្មោះប្រកួតដោយខ្លួនឯងបាន។
លោក ពៅ តិចឡេង បានឱ្យដឹងទៀតថាព្រិត្តការណ៍ប្រណាំងម៉ូតូលើវាលរាបបែបនេះនៅស្រុកគេមានជាយូរឆ្នាំមកហើយ ហើយក៏ជាកីឡាដ៏ពេញនិយមទៀតផងដែលក្នុងមួយឆ្នាំគេរៀបចំយ៉ាងតិចក៏២ដងដែរ ឯនៅស្រុកខ្មែរទើបតែរៀបចំបាន៣ដងប៉ុណ្ណោះ ។
សម្រាប់ការប្រកួតឆ្នាំមុនមានកីឡាករថៃនិងវៀតណាមចូលរួម ដោយឡែកឆ្នាំនេះយើងទើបតែប្រកាសចុះឈ្មោះប្រកួតដោយមិនទាន់ដឹងថាមានកីឡាករប៉ុន្មាននាក់និងមកពីប្រទេសណាខ្លះនោះទេ។ទោះបីយ៉ាងណាគណៈកម្មការរៀបចំការប្រកួតបានកំណត់ចំនួនអ្នកចូលរួមប្រកួតជាមុនរួចហើយ ដែលក្នុង១កម្រិតកំណត់យកកីឡាករចាប់ពី១២នាក់ដល់១៥នាក់ ចំណែកកម្រិតEduranceអាចលើសពីនេះគឺពី១៥នាក់ដល់២០នាក់។
ជាចុងក្រោយលោក ពៅ តិចឡេង បានបញ្ជាក់ថា គោលបំណងដែលយើងរៀបចំឱ្យមានព្រឹត្តិការណ៍ប្រកួតប្រណាំងម៉ូតូKARAនេះឡើងជារៀងរាល់ឆ្នាំគឺដើម្បីបំផុសឱ្យអ្នកបើកបរទាំងអស់មានការយល់ដឹងពីច្បាប់ចរាចរណ៍ នាំគ្នាគោរពច្បាប់ចរាចរណ៍ និងចង់ឱ្យយុវជននាំគ្នាលេងកីឡាឱ្យបានច្រើន ជាពិសេសកីឡាមួយនេះធ្វើយ៉ាងណាឱ្យមានការរីកចម្រើនឱ្យបានឆាប់រហ័ស៕
ចែករំលែកព័តមាននេះ