ខេត្តសៀមរាប៖ នាថ្ងៃទី២៥ ខែកុម្ភៈ ឆ្នាំ២០១៨ នៅវិទ្យាល័យ អង្គរ ក្រុងសៀមរាប ក្នុងពេលដែលការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ នៅខេត្តសៀមរាប កំពុងដំណើរការមន្ត្រីនាំពាក្យរបស់គណៈកម្មាធិការជាតិរៀបចំការបោះឆ្នោតដែលហៅកាត់ថា គ.ជ.ប អះអាងថា អនុវត្តលើកត្តាសំខាន់ៗចំនួន៣នឹងត្រូវបានធានាលើលទ្ធផលនៃការបោះឆ្នោត ដែលក្នុងនោះ រួមមានការផ្សព្វផ្សាយដ៏ទូលំទូលាយការបំពេញការងារប្រកបដោយវិជ្ជាជីវៈ និងតម្លាភាព ។
មន្ត្រីក្នុងមុខតំណែងទាំងសមាជិករដ្ឋសភា និងសមាសភាពនៅក្នុងជួរក្រុមប្រឹក្សាឃុំ-សង្កាត់ ដែលជាអង្គបោះឆ្នោតជ្រើសតាំងសមាជិកព្រឺទ្ធសភា នីតិកាលទី៤ បានបង្ហាញវត្តមានរបស់ខ្លួន នៅក្នុងវិទ្យាល័យ អង្គរ ក្រុងសៀមរាប ដែលជាទីតាំងនៃការរៀបចំឲ្យមានការិយាល័យបោះឆ្នោតចំនួន២កន្លែងនៅទីនោះ ។
ចំពោះខេត្តសៀមរាបត្រូវបានចាត់បញ្ជូលនៅក្នុងភូមិភាគទី៤ ជាមួយខេត្តបាត់ដំបង បន្ទាយមានជ័យ ឧត្តរមានជ័យ និង បៃលិន តាមការបែងចែក របស់គណៈកម្មាធិការជាតិរៀបចំការបោះឆ្នោត ដែលសរុបទូទាំងប្រទេសការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ ត្រូវបានបែងចែកឲ្យមានចំនួន៨ភូមិភាគផងដែរ ។
ក្នុងនោះដែរលោក នឹម វ៉ាន់សំ ប្រធានគណកម្មការរៀបចំការបោះឆ្នោតខេត្តសៀមរាបបានឲ្យដឹងយ៉ាងដូច្នេះនាថ្ងៃទី២៥ ខែកុម្ភៈ ឆ្នាំ២០១៨ នៅវិទ្យាល័យ អង្គរ ក្រុងសៀមរាប ក្នុងពេលដែលការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ កំពុងដំណើរការ ។
លោកបញ្ជាក់ឲ្យដឹងថា សម្រាប់ភូមិភាគទី៤ ដែលមានខេត្តចំណុះចំនួន៥នោះបេក្ខជនឈរឈ្មោះសរុបមានចំនួន៦០រូបក្នុងនោះបេក្ខជនពេញសិទ្ធិមានចំនួន៣០រូប (ស្ត្រី៤រូប) បេក្ខជនបម្រុងមានចំនួន៣០រូប (ស្រី២រូប) សម្រាប់ការដណ្តើមយកអាសនៈសមាជិកព្រឹទ្ធសភានីតិកាលទី៤ ដែលត្រូវបានបែងចែកឲ្យមានចំនួន១០អាសនៈ សម្រាប់ភូមិភាគទី៤ ។ នៅខេត្តសៀមរាបមានគណបក្សនយោបាយចំនួន៣ដែលមានបេក្ខជនឈរឈ្មោះ រួមមានគណបក្សប្រជាជនកម្ពុជា គណបក្សហ្វ៊ុនស៊ិនប៊ិច និងគណបក្សខ្មែររួបរួមជាតិ ៕
ចែករំលែកព័តមាននេះ