ខេត្តឧត្តរមានជ័យ ៖ តើហេតុអ្វីក៏មានករណីបែបនេះ កើតឡើងទៅហ្ន៎ ? ពិតជាស្មានមិនដល់មែន… ដោយសារតែកូនកំលោះ បែរជាខ្យល់.គរស្លាប់នៅយប់ថ្ងៃចូលរោងមង្គលការរបស់ខ្លួនថ្ងៃទី២៣ កុម្ភៈ ពេលដឹកទៅដល់គ្លីនិក ឯកជនមួយកាលពីវេលាម៉ោង១១និង៣០នាទីយប់ ។ ការស្លាប់របស់កូនកំលោះនេះបានបង្កការភ្ញាក់ផ្អើលពេញរោងការដែលកំណត់ថាជាថ្ងៃមង្គល ។ ហេតុការណ៍នេះឡើងនៅភូមិពោធិ ឃុំបេង ស្រុកបន្ទាយអម្ពឹល ។
ជនរងគ្រោះជាកូនកំលោះដែលបានស្លាប់នៅថ្ងៃចូលរោងការនេះឈ្មោះ ស ចាន់ឌី អាយុ៣០ឆ្នាំ នៅភូមិក្បាលក្របី ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ដែលត្រូវរៀបការជាមួយកូនក្រមុំឈ្មោះ វុធ សាមុត រស់នៅភូមិពោធិ ឃុំបេង ស្រុកបន្ទាយអម្ពឹលបានក្លាយជាស្ត្រីមេម៉ាយខាន់ស្លា ។ លោកវរសេនីយ៍ឯកហម ភិរម្យអធិការស្រុកបន្ទាយអម្ពឹលបានឱ្យដឹងថា នៅក្នុងពិធីមង្គលការនោះគេបានរៀបចំពិធីចូលរោង នៅថ្ងៃទី២៣ កុម្ភៈ ខណៈនេះមានសាច់ញាតិមកពីទីជិតទីឆ្ងាយបានអញ្ជើញចូលរួម ជាច្រើននាក់ផងដែរទៅតាមប្រពៃណី ។ លុះដល់វេលាយប់ថ្ងៃដដែល ស្រាប់តែកូនកំលោះបានប្រាប់បងប្អូនថា រូបគេមិនស្រួលខ្លួនទេ ។ បន្តិចក្រោយមកក៏ស្រាប់តែដួលសន្លប់ ហើយសាច់ញាតិបាននាំទៅធ្វើការសង្គ្រោះនៅក្នុងមន្ទីរពេទ្យឯកជនមួយកន្លែង ទើបដឹងថាគាត់បានស្លាប់បាត់បង់ជីវិតទៅហើយ ។
លោកវរសេនីយ៍ឯកហម ភិរម្យបានបន្តថា ក្រោយពីហេតុការណ៍នេះកើតឡើងកម្លាំងជំនាញប៉ូលិសស្រុកថ្មពួកបានចុះមកសហការជាមួយកម្លាំងប៉ូលិសស្រុកបន្ទាយអម្ពឹលព្រមទាំងគ្រូពេទ្យចូលរួមធ្វើការពិនិត្យនឹងធ្វើកោសល្យវិច័យឃើញថា ជនរងគ្រោះកូនកំលោះពិតជាបានស្លាប់ដោយសារតែកើតខ្យល់គរពិតប្រាកដមែន ។ សមត្ថកិច្ចបានប្រគល់សពនេះទៅឱ្យក្រុមគ្រួសារយកធ្វើបុណ្យតាមប្រពៃណីនៅឯខេត្តបន្ទាយមានជ័យ ។ ចំពោះភ្ញៀវការដែលត្រូវមកចូលរួមថ្ងៃអាពាហ៍ពិពាហ៍នោះ ក៏បានក្លាយជាការមកចូលបុណ្យសពទៅវិញ ។ ចំណែករោងមង្គលការក៏បានប្រែក្លាយទៅជារោងបុណ្យសពប្រកបទៅដោយទុក្ខក្រៀមក្រំក្រៃលែង ។រីឯកូនក្រមុំដែលកំពុងត្រៀមខ្លួនស្រស់ស្អាតដូចផ្ការីក ពេលនេះក៏ក្លាយជាអ្នកកាន់ទុក្ខស្រពាប់ស្រពោនរកវាចាថ្លែងស្ទើរពុំបាន ៕
ចែករំលែកព័តមាននេះ