រាជធានីភ្នំពេញ ៖ មជ្ឈដ្ឋាននានាមានការភ្ញាក់ផ្អើលខណៈមិនមានអ្នកណានឹកឃើញថាយកឈ្មោះលោកបណ្ឌិត កែម ឡី ដាក់ជាឈ្មោះគណបក្សឡើយ តែពេលនេះប្អូនប្រុសសពលោកបណ្ឌិតកែម ឡី គឺលោកកែម រិទ្ធិសិត…
រាជធានីភ្នំពេញ ៖ មជ្ឈដ្ឋាននានាមានការភ្ញាក់ផ្អើលខណៈមិនមានអ្នកណានឹកឃើញថាយកឈ្មោះលោកបណ្ឌិត កែម ឡី ដាក់ជាឈ្មោះគណបក្សឡើយ តែពេលនេះប្អូនប្រុសសពលោកបណ្ឌិតកែម ឡី គឺលោកកែម រិទ្ធិសិត កាលពីថ្ងៃ២៤កុម្ភៈ បានប្រកាសបង្កើតគណបក្សនយោបាយថ្មីមួយ ដើម្បីចូលរួមបោះឆ្នោតជ្រើសតាំងតំណាង រាស្ត្រនៅខែកក្កដា ខាងមុខនេះ ។ គណបក្សថ្មីរបស់លោកកែម រិទ្ធិសិត ដែលប្រកាសបង្កើតនោះគឺយកឈ្មោះលោកបណ្ឌិត កែម ឡី ធ្វើជាឈ្មោះរបស់គណបក្សតែម្តង ។ ក្រោយការប្រកាសបង្កើតនេះភា្លម អ្នកនាំពាក្យគណបក្សកាន់អំណាចក៏បានប្រកាសស្វាគមន៍ភា្លមដែរ ។
លោកកែម រិទ្ធិសិត បានអះអាងប្រាប់វិទ្យុបារាំងអន្តរជាតិថា ការបង្កើតគណបក្សថ្មីនេះ គឺមានគោលបំណងយកទស្សនាទានល្អៗរបស់លោកបណ្ឌិតកែម ឡី ទៅបន្តចូលរួមចំណែកអភិវឌ្ឍប្រទេសជាតិហើយក៏ដើម្បីទប់ស្កាត់ដល់ក្រុមជ្រុលនិយមមួយចំនួនដែលតែងតែយកឈ្មោះលោកបណ្ឌិត កែម ឡី ទៅធ្វើជាឧបករណ៍កេងចំណេញនយោបាយ ដើម្បីបម្រើមហិច្ឆតារបស់ពួកគេជារៀងរាល់ថ្ងៃ ។ ចំណែកការយកឈ្មោះសពលោកបណ្ឌិតកែម ឡី មកដាក់ជាឈ្មោះគណបក្សថ្មីនេះវិញ លោកកែម រិទ្ធិសិត បានលើកហេតុផលថា ដើម្បីចង់រក្សានូវកិត្តិនាមរបស់បងប្រុសឱ្យបានគង់វង្ស និងស្ថិតក្នុងការចងចាំរបស់ប្រជាពលរដ្ឋខ្មែរ ។
យ៉ាងណាក៏ដោយ ការបង្កើតគណបក្សថ្មីនេះ គឺស្តែងចេញតែតាមរយៈសេចក្តីប្រកាសព័ត៌មានមួយរបស់លោកកែម រិទ្ធិសិត ប៉ុណ្ណោះ ព្រោះថានៅពេលនេះក្រៅពីការប្រកាសឱ្យសាធារណជនបានដឹង អ្វីៗផ្សេងទៀតមិនទាន់បានរៀបចំនៅឡើយទេ ។ សម្រាប់លោកកែម រិទ្ធិសិត លោកត្រូវការពេលវេលាប្រមាណជាមួយខែ ដើម្បីរៀបចំឯកសារនានា ហើយអាចនឹងដាក់ទៅកាន់ក្រសួងមហាផ្ទៃនៅក្នុងអំឡុងខែក្រោយ ។
ទាក់ទិននឹងច្បាប់ស្តីពីគណបក្សនយោបាយថ្មី មិនអនុញ្ញាតឱ្យគណបក្សណាមួយយកឈ្មោះរូបវន្តបុគ្គលមកធ្វើជាឈ្មោះគណបក្សឡើយ ។ឆ្លើយតបនឹងបញ្ហានេះ លោកកែម រិទ្ធិសិត លោកបញ្ជាក់ថា លោកនឹងកែសម្រួលទាំងអស់ប្រសិនបើមានការណែនាំពីក្រសួងមហាផ្ទៃនោះ ។លោកក៏បញ្ជាក់ឱ្យដឹងដែរថា នឹងព្យាយាមរៀបចំបង្កើតបក្សថ្មីនេះឱ្យទាន់បានចូលរួមការបោះឆ្នោតជាតិនៅក្នុងខែកក្កដាខាងមុខ ។
បើទោះបីគណបក្សថ្មីរបស់លោកកែម រិទ្ធិសិត មិនទាន់ចេញអ្វីជាដុំកំភួននៅឡើយក៏ដោយ ក៏ប៉ុន្តែវាត្រូវបានប្រកាសស្វាគមន៍ដោយអ្នកនាំពាក្យគណបក្សកាន់អំណាចរួចទៅហើយដែរ ។ លោក សុខ ឥសាន ចាត់ទុកការបង្កើតបក្សថ្មីនេះថា គឺសបញ្ជាក់ពីសិទ្ធិសេរីភាពខាងនយោបាយរបស់ប្រជាពលរដ្ឋត្រូវបានបើកទូលាយ និងថាលទ្ធិប្រជាធិបតេយ្យនៅកម្ពុជាបាននិងកំពុងរឹងមាំនិងរស់រវើកថែមទៀត ។ សម្រាប់លោក សុខ ឥសាន តាមរយៈទិដ្ឋភាពនេះការបោះឆ្នោតជាតិខាងមុខនឹងកាន់តែមានអត្ថន័យនៅកម្ពុជា ។
លោកកែម រិទ្ធិសិត ប្អូនប្រុសលោកកែម ឡី បានចេញសេចក្តីប្រកាសព័ត៌មាន ជាផ្លូវការមួយពីការបង្កើតគណបក្សនយោបាយឈ្មោះកែម ឡី ។ លោកបញ្ជាក់ខ្លឹមសារក្នុងសេចក្តីប្រកាសព័ត៌មានដែលបានចុះហត្ថលេខាផ្ទាល់ និងបានចេញផ្សាយនៅថ្ងៃទី២៤ ខែកុម្ភៈ យ៉ាងដូច្នេះថា៖ «ខ្ញុំបាទកែម រិទ្ធិសិត ប្អូនប្រុសបង្កើតសពលោកបណ្ឌិត កែម ឡី សូមប្រកាសជម្រាបជូនជនរួមជាតិ បងប្អូនដែលស្រឡាញ់រាប់អានលោកបណ្ឌិត កែម ឡី សារព័ត៌មានជាតិនិងអន្តរជាតិឱ្យបានជ្រាបថា ខ្ញុំនឹងបង្កើតគណបក្សនយោបាយថ្មីមួយដែលមានឈ្មោះថា«គណបក្សកែម ឡី» ដើម្បីចូលរួមបោះឆ្នោតនីតិកាលទី៦នៃរដ្ឋសភានៅខែកក្កដា ឆ្នាំ២០១៨ ខាងមុខនេះ» ។
លោកក៏បានស្នើដល់ជនរួមជាតិ ដែលជាអ្នកស្រឡាញ់រាប់អានលោកបណ្ឌិតកែម ឡី ចូលរួមជាមួយគណបក្សកែម ឡី ដើម្បីរក្សាកិត្តិយសលោកបណ្ឌិត និងបន្តបេសកកម្មឱ្យសម្រេចបំណងប្រាថ្នារបស់លោកនៅថ្ងៃខាងមុខ។ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឱ្យដឹងនៅថ្ងៃទី២៥ កុម្ភៈថា នៅថ្ងៃទី២៤ កុម្ភៈ ២០១៨នេះ លោក កែម រិទ្ធិសិត ប្អូនបង្កេីតលោកបណ្ឌិត កែម ឡី បានប្រកាសបង្កេីត
គណបក្សនយោបាយថ្មីមួយដោយដាក់ឈ្មោះថាគណបក្ស កែម ឡី ដេីម្បីប្រកួតប្រជែងក្នុងការ
បោះឆ្នោតជ្រេីសតាំងតំណាងរាស្ត្រ នីតិកាលទី៦នាថ្ងៃទី២៩ ខែកក្កដា ២០១៨នេះ ។
លោកបញ្ជាក់ថា៖ «ទោះបីដាក់ឈ្មោះគណបក្សជាអ្វីក៏ដោយយេីងសូមស្វាគមន៍ ការបង្កេីតគណបក្សនយោបាយថ្មីនេះ ។ នេះសបញ្ជាក់ថា សិទ្ធិសេរីភាពខាងនយោបាយរបស់ប្រជាពលរដ្ឋ ត្រូវបានបេីកទូលាយដូចមានបញ្ជាក់ក្នុងរដ្ឋធម្មនុញ្ញនៃព្រះរាជាណាចក្រកម្ពុជា ហេីយក៏បញ្ជាក់ថាលទ្ធិប្រជាធិបតេយ្យនៅកម្ពុជាបាននិងកំពុងរឹងមាំនិងរស់រវេីក ។ យេីងរង់ចាំមេីលការប្រកួតប្រជែងនៅក្នុងការបោះឆ្នោតជាតិខាងមុខនឹងកាន់តែមានអត្ថន័យនៅកម្ពុជាស្របតាមគោលការណ៍លទ្ធិប្រជាធិបតេយ្យសេរីពហុបក្ស» ។
ទោះបីជាបែបណាគណបក្សដែលគ្រោងបង្កើតឡើងមានឈ្មោះ កែម ឡី នោះមិនត្រូវបានស្វាគមន៍ដោយភរិយាលោកកែម ឡី ដែលពេលនេះបានទទួលសិទ្ធិជ្រកកោននៅប្រទេសអូស្ត្រាលីនោះទេ ។ អ្នកស្រី ប៊ូ រចនា បានសម្តែងនូវការមិនពេញចិត្តចំពោះការយកឈ្មោះសពប្តីរបស់អ្នកស្រីមកធ្វើនយោបាយនេះ ។ រីឯអ្នកបញ្ចេញមតិជាច្រើនទៀតក៏ហាក់មិនគាំទ្រដល់ប្អូនប្រុសលោកបណ្ឌិតកែម ឡី រូបនេះដែរ ។ ទោះបីជាបែបណាអ្នកវិភាគនិយាយថា សម្លមិនទន់ភ្លក្សផងហេតុអ្វីថាមិនឆ្ងាញ់ ៕
ចែករំលែកព័តមាននេះ