រាជធានីភ្នំពេញ ៖ រដ្ឋមន្ត្រីក្រសួងពាណិជ្ជកម្មបានឱ្យដឹងថា កម្ពុជាចង់ជំរុញការនាំចេញពោតទៅប្រទេសថៃឱ្យបានកាន់តែច្រើននាពេលខាងមុខ តាមរយៈការស្នើភាគីថៃពិចារណាបន្ថែមលើរយៈពេលដែលមាននាពេលកន្លងមក ។
ថ្លែងក្នុងកិច្ចប្រជុំលើកទី៦ នៃគណៈកម្មការចម្រុះផ្នែកពាណិជ្ជកម្មរវាងកម្ពុជា និងថៃ កាលពីថ្ងៃទី២២ កុម្ភៈ នៅសណ្ឋាគារសូហ្វីតែល ភ្នំពេញ ភូគីត្រា លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា ៖« យើងចង់ជំរុញការនាំចេញពោតឱ្យបានច្រើនបំផុត ដែលនៅពេលកន្លងមក យើងមានបញ្ហាប្រកួតប្រជែងជាមួយពោតថៃ ។ ឥឡូវនេះ យើងចង់ឱ្យថៃពិចារណាលើរយៈពេលបន្ថែម២ខែទៀត ចាប់ពីខែមីនា ដល់តុលា លើរយៈពេលកន្លងមកចាប់ពីខែមីនា ដល់សីហា » ។
លោករដ្ឋមន្ត្រីបន្តថា ៖« ធ្វើយ៉ាងម៉េច ឱ្យការនាំចេញពោតកម្ពុជាឱ្យអស់ ។ មួយចំនួនទៀត យើងបានរៀបចំគណៈកម្មការ និងក្រុមការងារដើម្បីដោះស្រាយបញ្ហាប្រឈមដែលអាចកើតមានឡើងជាយថាហេតុ ហើយក្រុមការងារនេះនឹងបង្កើតឡើងក្នុងរយៈពេល៣ខែ ឱ្យមានក្រុមការងារមួយជាក់លាក់ដើម្បីធ្វើការប្រជុំ សម្រាប់សម្រួលពាណិជ្ជកម្មទូទៅ » ។
លោក សោម យ៉ិន ប្រធានសមាគមដំឡូងមី ស្រុកម៉ាឡៃ បានឱ្យដឹងថា កាលពី៣ឆ្នាំកន្លងទៅនេះ កសិករដាំដំឡូងមីច្រើន ប៉ុន្តែដោយសារតម្លៃដំឡូងចេះតែធ្លាក់ចុះ ធ្វើឱ្យកសិករខាតបង់។ នៅពេលចូលដល់ឆ្នាំ២០១៧កន្លងទៅនេះ កសិករបានងាកមកដាំពោតមានប្រហែល៤០%ទៅ៥០% ហើយតម្លៃពោត គឺប្រជាកសិករអាចទទួលយកបាន។
លោកលើកឡើងថា ការដាំដុះពោតនៅក្នុងឆ្នាំ២០១៨នេះ កសិករនៅតែបន្តការដាំដុះក្នុងចំនួនច្រើនដូចឆ្នាំ២០១៧ដែរ ពោលគឺពី៤០%ទៅ៥០% ក្នុងចំណោមទំហំផ្ទៃដីពី៧ពាន់ហិកតា ទៅ១,២ម៉ឺនហិកតានៅក្នុងតំបន់ ។
លោក ឡោ រស្មី មន្ត្រីអ្នកនាំពាក្យក្រសួងកសិកម្ម មានប្រសាសន៍ថា ៖« ក្នុងឆ្នាំ២០១៧កន្លងទៅ កម្ពុជានាំចេញពោតទៅបរទេសមានចំនួនសរុបប្រមាណ១៦,៨ម៉ឺនតោន ពោលគឺមានការកើនឡើងខ្ពស់ បើប្រៀបធៀបនឹងឆ្នាំ២០១៦ មានប្រមាណតែ៧,៤ម៉ឺនតោន ហើយធ្វើការនាំចេញទៅតៃវ៉ាន់, ថៃ, វៀតណាម, ឥណ្ឌូណេស៊ី, ឡាវ, ម៉ាឡេស៊ី និងហ្វ៊ីលីពីន ជាដើម » ។
លោកលើកឡើងថា កាលពីឆ្នាំ២០១៣ កម្ពុជាបាននាំចេញពោតក្រហមសរុបប្រមាណ ១៨,៥ម៉ឺនតោន, ២០១៤ មាន១០,៧ម៉ឺនតោន, ២០១៥ មាន៥,៦ម៉ឺនតោន, ២០១៦ មានប្រមាណ៧ម៉ឺនតោន និង២០១៧ មានប្រមាណ១៦,៨ម៉ឺនតោន ។
បើតាមន្ត្រីអ្នកនាំពាក្យក្រសួងកសិកម្ម កាលដើមឡើយ ខេត្តដែលដាំពោតច្រើនជាងគេ រួមមាន ខេត្តព្រៃវែង, កណ្តាល, កំពង់ចាម និងក្រចេះ ។ ប៉ុន្តែមកដល់សព្វថ្ងៃនេះ មានដូចជា ខេត្តក្រចេះ, ត្បូងឃ្មុំ, កណ្តាល, ព្រៃវែង, កំពង់ចាម និងបាត់ដំបង ៕
ចែករំលែកព័តមាននេះ