រាជធានីភ្នំពេញ៖ លោក ឌុច សុន សមាជិកគណៈកម្មារធិការជាតិរៀបចំការបោះឆ្នោតប្រាប់កោះសន្តិភាពពេលសន្និសីទសារព័ត៌មាន នៅទីស្តីការ គ.ជ.ប រសៀលថ្ងៃទី២៥ ខែកុម្ភៈ២០១៨ថា ការរាប់សន្លឹកបាន៧០% គិតត្រឹមម៉ោង៤រសៀលថ្ងៃទី២៥ ខែកុម្ភៈ និងនៅសល់៣០% និងរាប់បន្តបន្ទាប់ទៀត ។
លោកបានអះអាងថា ៖ «គណបក្សប្រជាជនកម្ពុជាមានសម្លេងនាំមុខគេ ព្រោះគណបក្សនេះមានអង្គបោះឆ្នោតច្រើនជាងគេ»។ លោកបានអះអាងថា តាមការគ្រោងទុក គជប នឹងប្រកាសលទ្ធផលបណ្តោះអាសន្ននៅយប់ថ្ងៃទី២៥ ខែកុម្ភៈ ឆ្នាំ២០១៨ តាមទូរទស្សន៍ជាតិកម្ពុជា ។ ចំពោះការមិនទាន់ប្រកាសនៅពេលសន្និសីទសារព័ត៌មាន ព្រោះគ.ជ.ប មិនទាន់បានទទួលរបាយការណ៍សរុបទាន់ពេលវេលា ។ លោកបានលើកឡើងថា មានអង្គបោះឆ្នោតចំនួន២៥នាក់ បានបោះបង់សិទ្ធិរបស់ខ្លួនក្នុងការទៅបោះឆ្នោតដែលក្នុងនោះគ.ជ.ប ទទួលព័ត៌មានថាមាន២នាក់នៅខេត្តតាកែវ អវត្តមានដោយសារតែមានជំងឺធ្ងន់ធ្ងរ ។ លោកថា ចំពោះការបោះឆ្នោតនេះមានអង្គបោះឆ្នោតជាង៩៩% បានទៅកាន់ការិយាល័យបោះឆ្នោតនៅទាំង៣៣ ការិយាល័យ ។
គួរកត់សម្គាល់ថា ព្រឹកព្រលឹមនៅថ្ងៃអាទិត្យ ទី២៥ ខែកុម្ភៈនេះ ក្រុមប្រឹក្សាឃុំ-សង្កាត់ និងអ្នកតំណាងរាស្ត្រដែលបានចុះឈ្មោះ និងមានសិទ្ធិបោះឆ្នោតនៅភ្នំពេញចំនួន៤៥២នាក់ នៅព្រឹកថ្ងៃទី២៥ ខែកុម្ភៈ ឆ្នាំ២០១៨នេះ បានទៅកាន់មណ្ឌលបោះឆ្នោតភូមិភាគទី១ នៅក្នុងវិទ្យាល័យប៊ុនរ៉ានីហ៊ុនសែនវត្តភ្នំ ដើម្បីបោះឆ្នោតជ្រើសតាំងសមាជិកព្រឹទ្ធសភាអាណត្តិទី៤ ។ នៅក្នុងមណ្ឌលនេះមានការិយាល័យបោះឆ្នោតចំនួនពីរ គឺការិយាល័យលេខ១០០១ និងការិយាល័យលេខ១០០២ ។ អង្គបោះឆ្នោតជាសមាជិកក្រុមប្រឹក្សាសង្កាត់មកពីខណ្ឌទាំង១២ ក្នុងរាជធានីភ្នំពេញ និងអ្នកតំណាងរាស្ត្រមណ្ឌលភ្នំពេញដែលស្ថិតក្នុងតំណែង ឬតួនាទី ។
គេមានការកត់សម្គាល់ថា សមាជិកក្រុមប្រឹក្សាឃុំ-សង្កាត់ទាំង១២ខណ្ឌ ក្នុងរាជធានីភ្នំពេញភាគច្រើនមកពីគណបក្សកាន់អំណាច (CPP) ។ បើទោះបីជាមានគណបក្សចូលរួមការប្រកួតការបោះឆ្នោតនេះមានចំនួន៤បក្សក៏ដោយ ។ គណៈកម្មាធិការជាតិរៀបចំការបោះឆ្នោត(គជប)បានបញ្ជាក់ថា គណបក្សប្រជាជនកម្ពុជា គណហ្វុនស៊ិនប៉ិច គណបក្សយុវជនកម្ពុជា និងគណបក្សខ្មែររួបរួមជាតិ ។
មណ្ឌលបោះឆ្នោតនៅតាមភូមិភាគចំនួន៨នៅទូទាំងរាជធានីខេត្ត ។ គជបបានបញ្ជាក់ថាសម្រាប់ការបោះឆ្នោតព្រឹទ្ធសភាអាណត្តិទី៤នេះ មានការិយាល័យចំនួន៣៣ ត្រូវបានរៀបចំឡើងសម្រាប់បម្រើឲ្យអ្នកបោះឆ្នោត និងអង្គបោះឆ្នោតចំនួន១១.៦៩៥នាក់ នៅថ្ងៃទី២៥ ខែកុម្ភៈ ឆ្នាំ២០១៨ នៅក្នុងភូមិភាគទាំង៨ទូទាំង២៥រាជធានីខេត្តទូទាំងប្រទេសកម្ពុជា ។
អាសនៈមានចំនួន៥៨ក្នុងចំណោម៦២អាសនៈ ដែលត្រូវបានបោះឆ្នោតជ្រើសតាំងដោយអង្គបោះឆ្នោតជាង១ម៉ឺននាក់ រួមមានក្រុមប្រឹក្សាឃុំ-សង្កាត់ និងតំណាងរាស្ត្រក្នុងតួនាទី ។ អាសនៈចំនួន(២រូប)ត្រូវបានបោះឆ្នោតជ្រើសតាំងដោយរដ្ឋសភា និងអាសនៈ(២រូប)ទៀតតាំងដោយព្រះមហាក្សត្រ ។ គជបធ្វើការប្រកាសលទ្ធផលបណ្តោះអាសន្ននៃការបោះឆ្នោតនេះ នៅវេលាម៉ោង៣រសៀល បន្ទាប់ពីការិយាល័យបោះឆ្នោតត្រូវបានបិទ និងបញ្ជូនលទ្ធផលបណ្តោះអាសន្នមកកាន់ទីស្តីការគជប ។
លោក ស៊ិក ប៊ុនហុក ប្រធាន (គជប) បានថ្លែងប្រាប់អ្នកសារព័ត៌មាននៅពេលចុះទៅពិនិត្យមណ្ឌលបោះឆ្នោតភូមិភាគទី១ថា ការរៀបចំការបោះឆ្នោតជ្រើសតាំងសមាជិកព្រឹទ្ធសភាអាណតិ្តទី៤នេះ មាន៨ភូមិភាគ និង៣៣ការិយាល័យបោះឆ្នោតទូទាំងប្រទេសកម្ពុជា ។ លោកថា៖«គ្រប់ការិយាល័យដំណើរការបានល្អ នេះបើតាមការរាយការណ៍ជូនខ្ញុំមកពីការិយាល័យទាំង៣៣រួមទាំងសន្តិសុខ» ៕
ចែករំលែកព័តមាននេះ