ខេត្តព្រៃវែង ៖ យុវជនម្នាក់ត្រូវបានគេជួយសង្គ្រោះឲ្យរួចជីវិតផុតពីសេចក្តីស្លាប់ ឯយុវជន និងយុវនារី២នាក់ទៀត បានបាត់បង់ជីវិតដោយសារ តែនាំគ្នាទៅមុជទឹកលេងនៅក្នុងរមណីយដ្ឋានដីដុះ ហើយបានលង់ទឹក ។ ហេតុការណ៍នេះបានកើតឡើងកាលពីវេលាម៉ោង១២…
ខេត្តព្រៃវែង ៖ យុវជនម្នាក់ត្រូវបានគេជួយសង្គ្រោះឲ្យរួចជីវិតផុតពីសេចក្តីស្លាប់ ឯយុវជន និងយុវនារី២នាក់ទៀត បានបាត់បង់ជីវិតដោយសារ តែនាំគ្នាទៅមុជទឹកលេងនៅក្នុងរមណីយដ្ឋានដីដុះ ហើយបានលង់ទឹក ។ ហេតុការណ៍នេះបានកើតឡើងកាលពីវេលាម៉ោង១២ និង១៥នាទីថ្ងៃត្រង់ ថ្ងៃទី២៥ ខែកុម្ភៈនេះ នៅតាមបណ្តោយដងទន្លេមេគង្គ ក្នុងរមណីយដ្ឋានដីដុះ ដែលស្ថិតក្នុងភូមិសាមគ្គី ឃុំស្វាយភ្លោះ ស្រុកពាមជរ ខេត្តព្រៃវែង ។
ជនរងគ្រោះដែលស្លាប់បាត់បង់ជីវិតឈ្មោះ និល សុផានុត ភេទប្រុស អាយុ១៨ឆ្នាំ និងម្នាក់ទៀតឈ្មោះ យស់ ចាន់រស្មី ភេទស្រី អាយុ១៨ឆ្នាំ ចំណែកជនរងគ្រោះម្នាក់ទៀត ដែលត្រូវបានអ្នកស្រុកជួយសង្គ្រោះទាន់នោះ ឈ្មោះ លន់ វិចិត្រ ភេទប្រុស អាយុ១៨ឆ្នាំដូចគ្នា អ្នកទាំង៣មានទីលំនៅក្នុងភូមិតាអុក ឃុំវាលស្បូវ ខណ្ឌច្បារអំពៅ រាជធានីភ្នំពេញ ។
លោកវរសេនីយ៍ឯក ជា ហេង អធិការនគរបាលស្រុកពាមជរបានឲ្យដឹងថា មុនពេលកើតហេតុនោះ ជនរងគ្រោះបានចុះទៅមុជទឹកលេងទាំង៣នាក់ ប៉ុន្តែយុវជនលន់ វិចិត្រ នៅមុជទឹកម្នាក់ឯង កន្លែងទឹករាក់ ។ ចំណែកឯជនរងគ្រោះ និល សុផានុត និងជនរងគ្រោះ យស់ ចាន់រស្មី ដែលជាសង្សានឹងគ្នា បានចុះទៅលេងកន្លែងទឹកជ្រៅនៅឆ្ងាយបន្តិច តាមរបៀបចង់នៅរ៉ូមែនទិកតែ២នាក់ ប៉ុន្តែដល់លេងទឹកបានមួយសន្ទុះ ក៏ធ្លាក់ចូលដល់កន្លែងអន្លង់ទឹកជ្រៅ ហើយដោយអ្នកទាំង២មិនចេះហែលទឹកផង ទើបធ្វើឲ្យលង់ទឹកទាំង២នាក់តែម្តង ។
លោកអធិការបានបញ្ជាក់ទៀតថា ពេលដែលលង់ទឹកភ្លាមៗនោះ ជនរងគ្រោះទាំង២នាក់ក៏បានស្រែកហៅឲ្យគេជួយដែរ ទើបយុវជន លន់ វិចិត្រ ដែលមុជទឹកលេងម្នាក់ឯងក្បែរនោះ រត់ទៅជួយ ហើយក៏លង់ថែមម្នាក់ទៀត ប៉ុន្តែសំណាងល្អត្រូវបានអ្នកស្រុកនៅក្បែរនោះ រត់ទៅជួយស្រង់បានម្នាក់ ចំណែក២នាក់ដែលលង់មុននោះបានលិចបាត់ក្នុងទឹក ហើយទម្រាំអ្នកស្រុកមុជទឹករាវរកឃើញស្រង់ឡើងមកដល់លើគោក ពួកគេទាំង២នាក់បានដាច់ខ្យល់ស្លាប់បាត់ទៅហើយ ។
បច្ចុប្បន្ននេះ ជនរងគ្រោះ លន់ វិចិត្រ កំពុងសម្រាកព្យាបាលនៅមន្ទីរពេទ្យបង្អែកស្រុកពាមជរ ចំណែកសពជនរងគ្រោះទាំង២ ត្រូវបានប្រគល់ទៅឲ្យក្រុមគ្រួសារ យកទៅធ្វើបុណ្យតាមប្រពៃណីហើយ ។
គួរបញ្ជាក់ផងដែរថា តំបន់រមណីយដ្ឋានដីដុះនេះ គឺជាកន្លែងមុជទឹកលេងកំសាន្តមួយ ដែលទើបត្រូវបានបង្កើតថ្មីនាពេលប៉ុន្មានឆ្នាំមកនេះ ហើយក៏កំពុងតែពេញនិយមជាខ្លាំងផងដែរ សម្រាប់ប្រជាពលរដ្ឋខ្មែរជិតឆ្ងាយ ជាពិសេសនៅក្នុងរដូវបុណ្យទានផ្សេងៗ ។ ទោះជាយ៉ាងនេះក្តីក៏គេសង្កេតឃើញថា ចាប់តាំងពីគេបង្កើតរមណីដ្ឋានដីដុះនេះមក គឺតែងតែមានអ្នកលង់ទឹកស្លាប់ជាបន្តបន្ទាប់ ១ឆ្នាំ២ទៅ៣នាក់ជារៀងរាល់ឆ្នាំ រហូតដល់អ្នកស្រុកនាំគ្នានិយាយថា ទីតាំងនោះគឺមានជើងកបទៅហើយ ៕
ចែករំលែកព័តមាននេះ