ខេត្តកំពង់ចាម ៖ លំនៅឋានរបស់ប្រជាពលរដ្ឋធ្វើអំពីឈើលើក្រោមថ្ម១ខ្នង នៅភូមិថ្មគោល ឃុំរអាងស្រុកកំពង់សៀម ត្រូវបានអគ្គីភ័យលេបត្របាក់ទាំងស្រុង ដោយមិនអាចជញ្ជូនរបស់ទ្រព្យចេញបាន ។ ហេតុការណ៏ការណ៏កើតឡើងនៅវេលាម៉ោង៧នឹង៣០នាទីព្រឹក ថ្ងៃទី២៥ ខែកុម្ភៈ ឆ្នាំ២០១៨ ។
នគរបាលស្រុកកំពង់សៀមប្រាប់ឲ្យដឹងថា បុរសម្ចាស់ផ្ទះឈ្មោះ សឿង ចិន្តា មានប្រពន្ធឈ្មោះ វ៉ាន់ សុភា ពុំបាននៅផ្ទះនោះទេដោយបាននាំគ្នាចេញមកក្រៅបាត់ ដោយទុកតែកូនតូចៗនៅចាំផ្ទះ ។ តែចៃដន្យកូនបានយកដែកកេះមកគូសអុជលេង ដែលជាហេតុជ័រផ្លាស្ទឹកជ្រុះធ្លាក់មកលើពូកបណ្តាលឲ្យឆេះរាលដល់ផ្ទះកាន់តែខ្លាំងឡើងៗ និងបង្កឲ្យមានការភ្ញាក់ផ្អើលដល់អ្នកជិតខាងនាំគ្នាដងទឹកពាងមកជះពន្លត់ភ្លើងតែភ្លើងមិនបានថមថយនោះទេ ។
នគរបាលស្រុកកំពង់សៀមប្រាប់បន្តថា ក្នុងពេលដែលភ្លើងកំពុងតែឆេះនោះត្រូវបានពលរដ្ឋរាយការណ៏មកលោកស្នងការនគរបាលខេត្ត និងបានចាត់ឲ្យរថយន្តពន្លត់អគ្គីភ័យរបស់អធិការដ្ឋាននគរបាលស្រុកកំពង់សៀម១គ្រឿងចេញទៅអន្តរាគមន៏បាញ់ទឹករួមនឹងរថយន្តរបស់ខេត្ត១គ្រឿងទៀត បានចេញទៅអន្តរាគមន៏បាញ់ទឹកពន្លត់ ។ ផ្ទះដែលឆេះនោះមានទំហំ៦ម៉ែត្រគុណ១០ម៉ែត្រប្រក់ស័ង្កសី ត្រូវបានឆេះអស់រលីងដោយទ្រព្យនៅលើផ្ទះយកមិនបានទេ ហើយបាត់បង់មានក្នុងនោះដូចជា ប្រាក់ដុល្លារចំនួន២០០ដុល្លារ មាស១តម្លឹង ផ្លាកទីន១តម្លឹង ព្រមទាំងសម្ភារមួយចំនួនទៀតផងដែរ ។
នគរបាលបានបញ្ជាក់ថា ក្នុងរដូវប្រាំងងាយនឹងមានគ្រោះអគ្គីភ័យកើតឡើងណាស់ ប្រសិនណាបើមានការធ្វើប្រហែសដូចជាភ្លើងធូប ទៀន មិនបានពន្លត់ អាចនឹងបង្កឲ្យមានគ្រោះអគ្គីភ័យរួមនឹងពេលចេញទៅណាមកណាត្រូវតែកាច់បារ៉ែតភ្លើងដើម្បីចៀសវាងការពារមិនឲ្យមានអគ្គីភ័យកើតឡើង ៕
ចែករំលែកព័តមាននេះ