រាជធានីភ្នំពេញ ៖ អគ្គីភ័យមួយបានឆាបឆេះ និងមានផ្សែងខ្មៅហុយទ្រលោមហុយចេញពីជាន់ទី១ របស់សណ្ឋាគារ ខារ៉ា ដោយបានបង្កឱ្យមានការភ្ញាក់ផ្អើលយ៉ាងខ្លាំងទៅដល់កម្លាំងមានសមត្ថកិច្ចមូលដ្ឋាន និង រថយន្តពន្លត់អគ្គីភ័យរហូតទៅដល់ចំនួន៨គ្រឿង បានចុះមកធ្វើអន្តរាគមន៍ជួយបាញ់ទឹកពន្លត់ ដោយសារតែការឆ្លងចរន្តអគ្គិសនីមូទ័របឺតចំហាយ ។
ករណីអគ្គីភ័យនេះដែរបានកើតឡើងកាលពីវេលាម៉ោង១០និង៤៥នាទីព្រឹក ថ្ងៃទី២៤ ខែកុម្ភៈ ឆ្នាំ២០១៨ នៅក្នុងសណ្ឋាគារ ខារ៉ា ជាន់ទី១ ដែលមានទីតាំងផ្ទះលេខ១៨ ផ្លូវលេខ៤៧កែងនឹងផ្លូវលេខ៨៨ ក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា មុនពេលកើតហេតុគេបានឃើញមានអណ្តាតភ្លើង និង ផ្សែងខ្មៅហុយទ្រលោមចេញពីក្នុងបន្ទប់ផ្ទះបាយរបស់សណ្ឋាគា ខារ៉ា ដែលនៅជាន់ទី១ ខាងលើ ភ្លាមនោះក្រុមបុគ្គលិកដែលបម្រើការងារនៅក្នុងសណ្ឋាគារនោះក៏បាននាំគ្នាស្រវ៉េស្រវ៉ាយកបំពង់ពន្លត់អគ្គីភ័យជាច្រើនបំពង់ទៅធ្វើការបាញ់ពន្លត់តែមិនបានធ្វើឱ្យភ្លើងថមថយ ឬក៏រលត់ឡើយ ។
ពេលនោះក៏មានការភ្ញាក់ផ្អើលកើតឡើងទៅដល់កម្លាំងមានសមត្ថកិច្ចមូលដ្ឋានដែលដឹកនាំដោយលោក សុខ ពេញវុធ អភិបាលខណ្ឌដូនពេញ ដឹកនាំកម្លាំង និងមានទាំងរ៉ឺម៉កដែលភ្ជាប់ឧបករណ៍ពន្លត់អគ្គីភ័យមក ធ្វើការជួយបាញ់ទឹកពន្លត់ជាបឋមផងដែរ តែនៅតែមិនអាចពន្លត់បាន ។
តាមប្រភពដដែលបានប្រាប់បន្តទៀតថា ដោយសារតែភ្លើងឆេះកាន់តែខ្លាំងឡើងៗ និងផ្សែងខ្មៅហុយខ្មួញខ្មាញ់កាន់តែខ្លាំងនោះកម្លាំងមានសមត្ថកិច្ចក៏បានហៅរថយន្តពន្លត់អគ្គីភ័យរបស់ស្នងការនគរបាលរាជធានីភ្នំពេញចំនួន៧គ្រឿងចុះមកធ្វើការបាញ់ទឹកពន្លត់ទើបអាចធ្វើឱ្យភ្លើងរលត់ទៅបាន និងមិនឆេះរាលដាលតទៅទៀតបានទាន់ពេលវេលា ។
ពាក់ព័ន្ធទៅនឹងករណីអគ្គីភ័យនៅផ្ទះបាយជាន់ទី១ របស់សណ្ឋាគារ ខារ៉ា នេះដែរគឺកើតឡើងដោយសារតែការឆ្លងចរន្តអគ្គិសនីម៉ូទ័របឺតចំហាយទើបបង្កជាអគ្គីភ័យឆាបឆេះឡើង និង បង្កឱ្យមានការភ្ញាក់ផ្អើលទាំងព្រឹកនេះកើតឡើង ។ អគ្គីភ័យនេះដែរបានបំផ្លាញអស់នូវសម្ភារផ្ទះបាយ និងទ្រព្យសម្បត្តិមួយចំនួនធំ តែមិនបង្កឱ្យមានមនុស្សណាម្នាក់រងគ្រោះថ្នាក់ឡើយ ៕
ចែករំលែកព័តមាននេះ