រាជធានីភ្នំពេញ ៖ ក្រោយពេលវិនិយោគិនចិនបានសម្រុកទៅវិនិយោគនៅតំបន់មាត់សមុទ្រ និងតំបន់គោលដៅទេសចរណ៍សំខាន់ៗក្នុងខេត្តព្រះសីហនុ បានធ្វើឲ្យតំបន់នោះក្លាយជាគោលដៅអភិវឌ្ឍន៍សម្រាប់វិនិយោគិនបរទេសនិងក្នុងស្រុក ។ ចំណែកខេត្តកំពតវិញ ខណៈដែលវិនិយោគិនចិនសម្រុកទៅវិនិយោគនៅខេត្តព្រះសីហនុនោះ ពេលនេះ វិនិយោគិនមកពីអឺរ៉ុប ក៏បានងាកមកវិនិយោគនៅក្នុងខេត្តកំពតនិងកែបវិញ ដោយភាគច្រើនវិនិយោគទៅលើវិស័យទេសចរណ៍ និងសេវាកម្មនានា ហើយបច្ចុប្បន្នកំពុងមានសកម្មភាពទិញដី រៀបចំសង់ជាផ្ទះស្នាក់លំហែកាយ និងរមណីយដ្ឋាននានា។
លោក សុខ គែន អ្នកវាយតម្លៃ និងភ្នាក់ងារអចលនទ្រព្យប្រចាំខេត្តកំពត-កែប បានឲ្យដឹងថា បើទោះបីជាបច្ចុប្បន្ននេះ តម្លៃដីធ្លីក្នុងខេត្តកំពត និងកែប មិនអាចប្រៀបនឹងរាជធានីភ្នំពេញ ឬខេត្តព្រះសីហនុបាន តែបើធៀបនឹងប៉ុន្មានឆ្នាំមុន ខេត្តកំពត គឺមានកំណើនខ្ពស់ខ្លាំងទាំងសកម្មភាពទិញ-លក់ និងតម្លៃ ជាពិសេស តំបន់នៅជាប់មាត់សមុទ្រ ឬតំបន់ដែលមានសក្ដានុពលខ្ពស់ក្នុងវិស័យទេសចរណ៍ ។
លោកថា ៖« ពេលនេះ ទាំងឈ្មួញ និងវិនិយោគិន កំពុងជ្រួលជ្រើមរកទិញដីធ្លីនៅក្នុងខេត្តកំពត ជាពិសេសដីនៅតំបន់មាត់សមុទ្រ ដែលអាចសង់ជារមណីយដ្ឋាន និងតំបន់លំហែកាយបាន » ។
លោកបន្តថា មួយរយៈពេលចុងក្រោយនេះ លោកមើលឃើញថា ជនជាតិអឺរ៉ុប និងអាមេរិកជាដើម ដែលកាលពីមុន គេស្នាក់នៅនិងរកស៊ីនៅខេត្តព្រះសីហនុ បានផ្លាស់មកកាន់ខេត្តកំពត និងកែបវិញ ស្របពេលកំណើនជនបរទេសនៅខេត្តព្រះសីហនុកាន់តែច្រើនឡើងៗ ។ កត្តាទាំងនេះអាចជាមូលហេតុមួយធ្វើឲ្យសកម្មភាពវិនិយោគលើវិស័យដីធ្លីនៅក្នុងខេត្តកំពត និងកែប កាន់តែមានសន្ទុះ។ សម្រាប់ថ្ងៃអនាគត ខេត្តទាំងពីរនេះអាចជាគោលដៅសំខាន់មួយ ហើយតម្លៃដីធ្លីមិនអាចនៅត្រឹមនេះបានដែរ ពោលគឺវានឹងបន្តឡើងខ្ពស់ទៀត ទៅតាមតម្រូវការរបស់ឈ្មួញដែលស្វែងរកការវិនិយោគ ។
អ្នកវាយតម្លៃ និងភ្នាក់ងាររូបនេះបានបន្ថែមថា តម្លៃដីនៅខេត្តកំពត បានកើនឡើងពីរបីដង នៅក្នុងរយៈពេលមិនដល់១ឆ្នាំផង ។ ជាក់ស្ដែងកាលពីឆ្នាំមុន គេអាចរកទិញបានតម្លៃត្រឹមតែ៤០ដុល្លារ ទៅ៨០ដុល្លារអាមេរិកក្នុង១ម៉ែត្រការ៉េ ក៏ប៉ុន្តែរហូតមកដល់ពេលនេះ វាបានឡើងរហូតដល់១៥០ដុល្លារអាមេរិកក្នុង១ម៉ែត្រការ៉េសម្រាប់ដីនៅជាប់មាត់សមុទ្រ ។ ដោយឡែក សម្រាប់ដីនៅជាប់មាត់ព្រែកកំពត ឬអាចជាតំបន់ដែលត្រូវប៉ាន់វិញ វាមានតម្លៃរហូតដល់៣៥០ដុល្លារអាមេរិកក្នុង១ម៉ែត្រការ៉េ ខណៈកាលពីមុន វាមានតម្លៃត្រឹមតែ១៥០ដុល្លារទៅ២០០ដុល្លារអាមេរិកប៉ុណ្ណោះ ។
បើតាមលោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ KFA ក៏បានផ្ដល់ជាមតិមួយចំនួនដល់អ្នកស្វែងរកទិញដីធ្លីនានានៅក្នុងរាជធានីភ្នំពេញ ក៏ដូចជាតំបន់តាមបណ្ដាខេត្តផងដែរ ដោយបានស្នើឲ្យមានប្រុងប្រយ័ត្នខ្ពស់ចំពោះអ្នកស្វែងរកទិញដីធ្លី ។
ជាក់ស្ដែង អ្នកលក់ដីខ្លះក៏មិនបានគោរពទៅតាមក្រមវិជ្ជាជីវៈរបស់ខ្លួន ដោយបំប៉ោងព័ត៌មានពីការអភិវឌ្ឍរបស់រាជរដ្ឋាភិបាល ។ ទាំងនេះហើយដែលធ្វើឲ្យតម្លៃដីធ្លីឡើងថ្លៃខ្ពស់ ប៉ុន្តែអាចនឹងមានវិបត្តិណាមួយកើតឡើងនៅពេលអនាគត ៕
ចែករំលែកព័តមាននេះ