ខេត្តបន្ទាយមានជ័យ ៖ បញ្ជូនស្ត្រីម្នាក់ទៅសាលាដំបូងខេត្តបន្ទាយមានជ័យជាប់ចោទពីបទលួចឆក់ខ្សែ.ក ដែលស្ត្រីម្នាក់ក្នុងចំណោមបក្សពួកគេ២នាក់ ត្រូវបានកម្លាំងនគរបាលជំនាញព្រហ្មទណ្ឌកម្រិតធ្ងន់ រៀបចំសំណុំរឿងបញ្ជូនខ្លួនទៅសាលាដំបូងខេត្តបន្ទាយមានជ័យ នៅថ្ងៃទី២៤ ខែកុម្ភៈ ឆ្នាំ២០១៨ ដោយជាប់ចោទពីបទឆក់ខ្សែ.ក ក្នុងវត្តបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ទោ ភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកំរិតធ្ងន់ បានឲ្យដឹងថា ជនសង្ស័យម្នាក់ ក្នុងចំណោម២នាក់ ដែលសមត្ថកិច្ចនគរបាលចាប់ឃាត់ខ្លួនបានឈ្មោះ ស្រីអូន ភេទស្រី អាយុ៣៣ឆ្នាំ ស្នាក់នៅ រាជធានីភ្នំពេញ ។ នៅវេលាម៉ោង៩និង៥០នាទីយប់ថ្ងៃ ទី២២ ខែកុម្ភៈ ឆ្នាំ២០១៨ ស្ត្រីជាជនសង្ស័យរូបនេះ ត្រូវបានឈ្មោះ ឡាង ស្រីនិច្ច ភេទស្រី អាយុ២០ឆ្នាំ នៅភូមិត្រពាំងធ្លក និងឈ្មោះឈាន ឆាន់ ភេទស្រី អាយុ៣៦ឆ្នាំ នៅភូមិថ្មដែកកេះ ឃុំបន្ទាយឆ្មារ ស្រុកថ្មពួក ត្រូវជាម្តាយក្មេងស្រីរងគ្រោះ បានចោទប្តឹងថា « ស្ត្រីរូបនេះ បានធ្វើសកម្មភាពឆក់យកខ្សែ.កប្លាទីន កូនស្រីរបស់ខ្លួនឈ្មោះ ម៉េង ហួសូណា អាយុ១ឆ្នាំ ដែលមានទម្ងន់២៨១លី ។ ខណៈពេលដែលគាត់នាំមកដើរលេងក្នុងពិធីបុណ្យបញ្ចុះសីម៉ា នៅក្នុងវត្តបន្ទាយឆ្មារ ហើយបានប្តឹងសមត្ថកិច្ចនគរបាលស្រុកថ្មពួក ការពារសន្តិសុខនៅទីនោះធ្វើការចាប់ឃាត់ខ្លួន ដោយអនុវត្តតាមបទបញ្ជារបស់លោកឧត្តមសេនីយ៍ទោអាត់ ខែម ស្នងការនគរបាលខេត្ត និងមានការសម្របសម្រួលដោយលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ នាំយកមកធ្វើការសាកសួចម្លើយ ។
លោកនាយការិយាល័យនគរបាលព្រហ្មទណ្ឌកម្រិតធ្ងន់បានបញ្ជាក់ឲ្យដឹងទៀតថា នៅពេលសាកសួរចម្លើយជនសង្ស័យបានបដិសេធ ខ្លួនមិនបានប្រព្រឹត្តដូចពាក្យដែលចោទប្រកាន់នោះទេ តែរូបគេមកដើរលេងក្នុងកម្មវិធីបុណ្យបញ្ចុះសីម៉ានោះមែន ហើយរូបគេមកដើរលេងតែម្នាក់ឯងទេ គ្មានបក្សពួកឯណានោះឡើយ ។ ដោយផ្អែកលើបណ្តឹង និងចម្លើយបំភ្លឺ របស់អ្នកបានឃើញហេតុការណ៍នោះបាននិយាយថា ជនសង្ស័យមានគ្នីគ្នាគេ២នាក់ ម្នាក់គេចខ្លួន ។ ទោះបីជាស្ត្រីជាប់ចោទឈ្មោះ ស្រីអូន នេះមិនសារភាពការពិតក៏សមត្ថកិច្ចអះអាងលើបណ្តឹង និងការបំភ្លឺរបស់សាក្សី កម្លាំងនគរបាលជំនាញព្រហ្មទណ្ឌកម្រិតស្រាល បានបញ្ជូនជនសង្ស័យទៅសាលាដំបូងខេត្ត ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ