ខេត្តសៀមរាប ៖ អតីតយោធានៅប៉ៃលិនជំនាន់វ៉ៃនៅអន្លង់វែងត្រូវបានចូលនិវត្តន៍ ហើយមករស់នៅជាមួយក្រុមគ្រួសារនៅក្នុងខេត្តសៀមរាប ខណៈដែលស្រវឹងស្រាទើបមកពីចូលរោងការនៅជិតផ្ទះ រួចចូលមកដេកនៅខាងមុខផ្ទះ ត្រូវបានគេលួចគប់គ្រាប់បែកចូលក្នុងមុងសំណាងល្អរបួសស្រាល បង្កឱ្យមានការភ្ញាក់ផ្អើលពេញក្រុងសៀមរាប ។
ហេតុការណ៍ផ្ទុះគ្រាប់បែកនេះ បានកើតឡើងនៅវេលាម៉ោង០១រំលងអធ្រាត្រ ឈានចូលថ្ងៃទី២៤ កុម្ភៈ ស្ថិតនៅចំណុចមុខចូលសាលារៀនខ្វៀន ក្នុងភូមិខ្វៀន សង្កាត់គោកចក ក្រងសៀមរាប ។ បើតាមប្រភពពីមន្ត្រីនគរបាលសង្កាត់គោកចក បានប្រាប់នៅរសៀលថ្ងៃទី២៤កុម្ភៈ នេះថា ករណីផ្ទុះគ្រាប់បែកគ្រាប់ នៅក្នុងសង្កាត់គោកចកនោះពិតជាមានមែន ប៉ុន្តែជនរងគ្រោះពុំមានរងរបួសធ្ងន់ធ្ងរនោះ គ្រាន់តែត្រូវដៃ ជើង និងក្បាលបន្តិចបន្តួច និងខូចខាតខ្នើយកើយ១, ខ្នើយអោប១, អាវប៉ារ៉ា១, មុងធ្លាយឆេះខាងលើក្បាលដំណេកទាំងស្រុង ។ ប្រភពបន្តថា ជនរងគ្រោះវិញមានឈ្មោះ ឈីន ជា ភេទប្រុស អាយុ៤២ឆ្នាំ ជាអតីតយោធាកងពលលេខ៤២ប៉ៃលិន ក្នុងភូមិខ្វៀន សង្កាត់គោកចក ក្រងសៀមរាប ។
យោងតាមព័ត៌មាននៅជុំវិញកន្លែងកើតហេតុបានបញ្ជាក់ថា ជនរងគ្រោះបានផឹកស៊ីរាំលេងនៅកន្លែងរោងការពិតមែន ហើយពុំមានរឿងរ៉ាវជាមួយនរណាទេ ។ ដោយឡែក កូនប្រុសបង្កើតដែលតែងតែ មានទំនាស់ (អំពើហិង្សាជាមួយឪពុកនិងកូន) រាល់យប់នោះ។ ដល់ពេលកើតហេតុ កូនប្រុសរបស់គាត់ កំពុងអង្គុយបៀរ រហូតដល់ពេលឮសំលេងផ្ទុះគ្រាប់ កូនជនរងគ្រោះ ក៏បានរត់ទៅមើល ព្រមទាំងបានប្រាប់អ្នកជិតខាងឱ្យមកជួយមើលឪពុករបស់ខ្លួនផង។
បច្ចុប្បន្ន ជនរងគ្រោះត្រូវបានកម្លាំងអធិការនគរបាលក្រុងសៀមរាបបានហៅទៅសួរនាំ នៅអធិការដ្ឋាន នគរបាលក្រុងសៀមរាប ដើម្បីធ្វើការសួរនាំពីមូលហេតុខាងលើ។
ចែករំលែកព័តមាននេះ