រាជធានីភ្នំពេញ ៖ បុរសជាកម្មករសំណង់ម្នាក់ បានសម្រេចចិត្ដធ្វើអត្ដឃាតដោយចង.កសម្លាប់ខ្លួន ហើយត្រូវបានក្រុមគ្រួសារអះអាងថា គាត់មានជំងឺប្រចាំកាយច្រើនឆ្នាំមកហើយ ព្យាបាលមិនជាសោះ ហើយកន្លងមកធ្លាប់ធ្វើអត្តឃាតម្ដង ប៉ុន្តែមិនបានសម្រេច លុះពេលនេះជាលើកទី២ ។ ហេតុការណ៍នោះ បានបង្កឲ្យមានការភ្ញាក់ផ្អើលកាលពីវេលាម៉ោង១០និង២០នាទីព្រឹក ថ្ងៃទី២៤ ខែកុម្ភៈ ឆ្នាំ២០១៨ នៅចំណុចក្នុងបន្ទប់ផ្ទះជួល ស្ថិតនៅក្នុងភូមិខ្វា សង្កាត់ដង្កោ ខណ្ឌដង្កោ ។
តាមប្រភពព័ត៌មានបានឲ្យដឹងថា បុរសខាងលើនោះឈ្មោះ ហែម វិទូ អាយុ២៧ឆ្នាំ ស្នាក់នៅចំណុចផ្ទះជួលក្នុងភូមិកើតហេតុខាងលើ និងមានស្រុកកំណើតភូមិបាក្រុង ឃុំស្វាយចេក ស្រុករំដួល ខេត្ដស្វាយរៀង ។ បុរសនេះបានយកក្រមាចង.កជាប់ជាមួយចម្រឹងបង្អួចក្នុងបន្ទប់ជួល បណ្ដាលឲ្យស្លាប់ ហើយសាកសពត្រូវបានក្រុមគ្រួសារស្រាយទម្លាក់ចុះ រួចទើបរាយការណ៍ជូននគរបាលចុះទៅពិនិត្យ និងធ្វើកោសល្យវិច័យ ។
ស្ត្រីឈ្មោះ សូ ស៊ីនួន អាយុ៣០ឆ្នាំ ត្រូវជាម្ដាយមីង បាននិយាយថា ក្មួយប្រុសរបស់គាត់ម្នាក់នេះបានព្យាយាមធ្វើអត្តឃាតដោយចង.កសម្លាប់ខ្លួនឯងបែបនេះជាបន្តបន្ទាប់ ។ ដោយលើកទី១ នៅក្នុងថ្ងៃទី២៣ ខែកុម្ភៈ ឆ្នាំ២០១៨ ចង.កម្ដង ប៉ុន្តែមិនបានសម្រេចនោះទេ ដោយសារពេលនោះបានដាច់ខ្សែធ្លាក់ចុះមកទើបមិនបានស្លាប់ ។ ដោយសារតូចចិត្តនឹងខ្លួនមានជំងឺប្រចាំកាយព្យាបាលមិនជា ខណៈនោះបានបង្កឲ្យមានការភ្ញាក់ផ្អើលម្ដង លុះដល់ថ្ងៃទី២៤ ខែកុម្ភៈ ខណៈពេលដែលក្រុមគ្រួសារភ្លេចខ្លួនស្រាប់តែចង.កម្ដងទៀត បណ្ដាលឲ្យស្លាប់តាមបំណងបែបនេះតែម្ដង ៕
https://youtu.be/fD1_ktVN0iQ
ចែករំលែកព័តមាននេះ