ខេត្តបន្ទាយមានជ័យ ៖ ជម្លោះរវាងស្ត្រីម្នាក់ និងស្ត្រីម្នាក់ទៀត នៅគ្លីនិកមួយបានកើតឡើងឈានដល់ការប្រវាយប្រតប់គ្នា បង្កការភ្ញាក់ផ្អើលកាលពីវេលាម៉ោងជាង០៤រសៀល ថ្ងៃទី២៣ ខែកុម្ភៈ ឆ្នាំ២០១៨ ក្នុងភូមិក្បាលស្ពាន១…
ខេត្តបន្ទាយមានជ័យ ៖ ជម្លោះរវាងស្ត្រីម្នាក់ និងស្ត្រីម្នាក់ទៀត នៅគ្លីនិកមួយបានកើតឡើងឈានដល់ការប្រវាយប្រតប់គ្នា បង្កការភ្ញាក់ផ្អើលកាលពីវេលាម៉ោងជាង០៤រសៀល ថ្ងៃទី២៣ ខែកុម្ភៈ ឆ្នាំ២០១៨ ក្នុងភូមិក្បាលស្ពាន១ សង្កាត់ និងក្រុងប៉ោយប៉ែត អ្នកឃើញហេតុការណ៍សង្ស័យថា ជារឿងស្នេហាត្រីកោណ ។
ប្រភពពីកន្លែងកើតហេតុនិយាយថា ដំបូងនៅម៉ោងប្រហែល០៤រសៀល ថ្ងៃកើតហេតុ មានបុរសម្នាក់បានចូលទៅគ្លីនិក ដោយឲ្យគ្រូពេទ្យនៅទីនោះបណ្តោងសារ៉ូមកម្លាំងឲ្យស្ត្រីម្នាក់ លុះបានមួយសន្ទុះស្រាប់តែលេចមុខស្ត្រីម្នាក់ទៀត គេសង្ស័យថា ជាប្រពន្ធចូលទៅតាមក្រោយ ខណៈបុរសខាងលើកំពុងអង្គុយនិយាយសាសងជាមួយនាង ដែលគ្រូពេទ្យដាក់សារ៉ូមឲ្យ ក៏ផ្ទុះជាជម្លោះប្រតាយប្រតប់គ្នា ខណៈភាគីម្ខាងដៃកំពុងជាប់សារ៉ូម និងឈានដល់គប់ខ្នើយដាក់គ្នា តែត្រូវបុរសនោះ ក៏ដូចជាក្រុមគ្រូពេទ្យឃាត់ទាន់ពេល ហើយបុរសនោះព្យាយាមឃាត់នាងប្រពន្ធអូសចេញទៅក្រៅដឹកតាមម៉ូតូចេញទៅបាត់ ។
ប្រភពថា បុរសនោះជានគរបាលអន្តោប្រវេស្តន៍ច្រកទ្វារអន្តរជាតិប៉ោយប៉ែត ឈ្មោះ ហួង ។ ប្រភពបន្តថា ក្រោយពីបុរសខាងលើដឹកប្រពន្ធទៅបាត់មួយសន្ទុះ ស្រាប់តែនាងជាប្រពន្ធជិះរថយន្តមកជាមួយឪពុកម្តាយទៅកាន់គ្លីនិកខាងលើម្តងទៀត សង្ស័យចង់ជួបប្រកួតដណ្តើមឈ្នះចាញ់គ្នា ដើម្បីទាមទារអ្វីមួយ ប៉ុន្តែស្ត្រីម្នាក់ដែលចូលទៅគ្លីនិកឲ្យគ្រូពេទ្យដាក់សារ៉ូមនោះ បានចេញទៅបាត់មុនបន្តិច ធ្វើឲ្យ៣នាក់ឪពុកកូនខឹងសម្បាររករឿងម្ចាស់គ្លីនិក និងផ្ទុះជម្លោះជាថ្មីជាមួយក្រុមគ្រូពេទ្យ ។
តាមវីដេអូគ្លីបក្នុងគ្លីនិក បានឲ្យដឹងថា ៣នាក់ឪពុកម្តាយ និងកូនខាងលើបានចូលទៅក្នុងគ្លីនិករករឿងគ្រូពេទ្យដោយសុំឆែកផ្ទះ ដើម្បីរកស្ត្រីដែលគ្រូពេទ្យបណ្តោងសារ៉ូមឲ្យហើយព្យាយាមចោទថា គ្លីនិកនេះលាក់មនុស្សធ្វើឲ្យម្ចាស់គ្លីននិកខឹងសម្បារយ៉ាងខ្លាំង ដោយសារការចូលទៅគ្លីនិកនោះគ្មានការអនុញ្ញាត ម្យ៉ាងករណីសុំឆែកឆេរនោះ គ្មានដីការបស់តុលាការ ។
ម្ចាស់គ្លីនិកបន្តថា ដោយសារទ្រាំមិនបាននឹងសម្ដីគ្រួសារមួយនេះ គាត់ក៏ទាក់ទងហៅអាវុធហត្ថឲ្យទៅកន្លែងកើតហេតុ ដើម្បីជួយអន្តរាគមន៍ ទើបគ្រួសារមួយនេះព្រមចាកចេញទៅវិញ ខណៈឃើញកម្លាំងអាវុធហត្ថទៅដល់ ។ បុរសម្នាក់ក្នុងគ្រួសារខាងលើ ត្រូវគេស្គាល់ថា ជានាយរងប៉ុស្តិ៍នគរបាលអន្តោប្រវេស្តន៍ច្រកទ្វារអន្តរជាតិប៉ោយប៉ែត និងជាឪពុកក្មេកបុរសម្នាក់ដែលប្រពន្ធតាមទៅរករឿងក្នុងគ្លីនិកខាងលើ ។ ជុំវិញករណីខាងលើ ភាគីពាក់ព័ន្ធទាំងអស់ មិនអាចទាក់ទងសុំការបំភ្លឺបានទេ ព្រោះបានចាកចេញទៅអស់ ម្យ៉ាងមិនស្គាល់លេខទូរស័ព្ទ ៕
ចែករំលែកព័តមាននេះ