លោកទ្រាំឈឺចាប់លែងបានហើយ សូមលោកទៅកាន់សុខគតិភព
ខេត្តព្រះសីហនុ ៖ តាមការឲ្យដឹងពីក្រុមគ្រួសារសាច់ញាតិ ជនរងគ្រោះលោក បូរ វេហាឬបូរ វណ្ណៈ ហៅសីហា អាយុ៣២ឆ្នាំ មានស្រុកកំណើតនៅក្រុងតាខ្មៅ…
ខេត្តព្រះសីហនុ ៖ តាមការឲ្យដឹងពីក្រុមគ្រួសារសាច់ញាតិ ជនរងគ្រោះលោក បូរ វេហាឬបូរ វណ្ណៈ ហៅសីហា អាយុ៣២ឆ្នាំ មានស្រុកកំណើតនៅក្រុងតាខ្មៅ ខេត្តកណ្តាល បច្ចុប្បន្នជាអ្នកចម្រៀង និងជាប្រធានក្រុមភ្លេងប្រចាំនៅក្លិបអិលវី តាំងពីអំឡុងឆ្នាំ២០០៨ បានស្លាប់ទៅហើយ ក្នុងគ្រោះអកុសលឆេះខ្លួនក្នុងហេតុការណ៍ឆ្លងចរន្តអគ្គិសនី (ទុស្សេខ្សែភ្លើង) ឆេះក្លិបLV កាលពីវេលាម៉ោង១០ និង៤៥នាទីយប់ថ្ងៃទី២១ កុម្ភៈ នៅក្រុងព្រះសីហនុ ។
នៅក្នុងហេតុការណ៍ស្មានមិនដល់នេះ បានកើតឡើងខណៈមានអគ្គិភ័យបានចាប់ផ្តើមឆេះនៅពិតាន ហើយជនរងគ្រោះជាអ្នកចម្រៀងរូបនេះ កំពុងបត់ជើងនៅក្នុងបន្ទប់ទឹក ។ បន្ទាប់ពីមានការភ្ញាក់ផ្អើលនៅខាងក្រៅជនរងគ្រោះ ក៏បានរត់ចេញពីបន្ទប់ទឹកមក ក៏ត្រូវពិតានក្លិបដែលឆេះបានបាក់មកទាំងផ្ទាំង សុទ្ធតែអណ្តាតភ្លើងសង្កត់លើជនរងគ្រោះ ។
ពេលឃើញទិដ្ឋភាពនេះ មិត្តភក្តិរួមការងារបានចូលទៅជួយសង្គ្រោះ យកចេញពីក្រោមគំនររងើកភ្លើងហើយក្រុមគ្រួសារសាច់ញាតិបានបញ្ជូនទៅសង្គ្រោះនៅមន្ទីរពេទ្យរហូតដល់ប្រទេសវៀតណាម ។ ប៉ុន្តែជាអកុសលដោយសារតែការរលាករលេះរលួយពេញខ្លួនសូម្បីតែគ្រឿងក្នុងស្ទើរតែឆ្អិនអស់ទៅហើយនោះ មច្ចុរាជបានមកផ្តាច់យកសង្ខារជនរងគ្រោះខាងលើកាលពីវេលាម៉ោង៣រំលងអធ្រាត្រឈានចូលថ្ងៃទី២៣ កុម្ភៈ ហើយសពជនរងគ្រោះក៏ត្រូវបានបញ្ជូនមកវិញដើម្បីចាត់ចែងធ្វើបុណ្យទៅតាមប្រពៃណី ។
តាមការបង្ហើបឲ្យដឹងពីបុគ្គលិកបម្រើការនៅក្លិបក្នុងលក្ខខណ្ឌសុំមិនបញ្ចេញឈ្មោះបានឲ្យដឹងថា នៅក្នុងក្លិបខាងលើមានអ្នកចម្រៀងចំនួន៩នាក់ និងក្រុមភ្លេងចំនួន៤នាក់ ស្ថិតនៅក្រោមការគ្រប់គ្រងរបស់លោក បូរ វេហា (មុននេះស្គាល់ត្រឹម បូរ សីហា) ។ ក្នុងចំណោមអ្នកចម្រៀងទាំង៩នាក់ ក្នុងនោះប្រុស៣នាក់ គឺលោក បូរ វេហា មានទឹកដមសំឡេងពីរោះនិងរូបសម្រស់ស្អាតជាងគេធ្វើឲ្យនារីជាច្រើននាក់បានលួចសរសើរ និងលង់សម្រស់ដ៏សង្ហារបស់លោក ដែលរះនៅក្នុងក្លិបអស់រយៈកាល១០ឆ្នាំកន្លងទៅ ។តាមការបង្ហើបឲ្យដឹងបែបស្ងាត់ៗពីក្រុមអ្នកចម្រៀងប្រចាំក្លិបរូបនេះ(ជនរងគ្រោះ) មានប្រពន្ធចំនួន៣នាក់ ។ ប្រពន្ធទី១បានកូនស្រីម្នាក់ ប្រពន្ធទី២បានកូនស្រីម្នាក់ និងប្រពន្ធទី៣ បានកូនប្រុសម្នាក់ ។ បច្ចុប្បន្នលោក បូរ វេហា រួមរស់ជាមួយប្រពន្ធទី៣ដែលនាងមានមុខរបរបើកហាងលក់ដូរនៅឆ្នេរអូរត្រេះ ក្រុងព្រះសីហនុ។
បន្ទាប់ពីមរណភាពក្នុងហេតុការណ៍ដ៏រន្ធត់ខាងលើនេះក្រុមគ្រួសារសាច់ញាតិ និងមិត្តអ្នករួមអាជីពបានសម្តែងទុក្ខសោកវិយោគជាពន់ពេកលាយឡំដោយក្តីសោកស្តាយចំពោះរូបសម្បត្តិដ៏ស្រស់សោភាប្រកបដោយបុគ្គលិកលក្ខណៈសុភាពរាបសា គួរជាទីរាប់អាននៅក្នុងសង្គម ។ មិត្តរួមអាជីពក៏ដូចជាអតិថិជនដែលនិយមគាំទ្រនូវទឹកដមសំឡេងរបស់លោកនាពេលកន្លងមក បានផ្ញើសារតាមប្រព័ន្ធព័ត៌មានសង្គមហ្វេសប៊ុកសម្តែងការសោកស្តាយ និងបានជូនពរសូមឲ្យវិញ្ញាណក្ខន្ធរបស់លោកបានទៅកាន់សុខគតិភព កុំបីឃ្លៀងឃ្លាតឡើយ ។
គួរបញ្ជាក់ឲ្យដឹងផងដែរថា រហូតមកដល់ពេលនេះ នៅមិនទាន់បានដឹងថា ម្ចាស់ក្លិបខាងលើនិងជួយបរិច្ចាគជាថវិកាសម្រាប់គ្រួសារសពជនរងគ្រោះដើម្បីជាការចូលរួមក្នុងការរំលែកទុក្ខដ៏មហាក្រៀមក្រំនៃគ្រួសារសព ដែលបានកើតឡើងនៅក្នុងហេតុការណ៍ខាងលើនោះឬយ៉ាងណាទេ ៕
ចែករំលែកព័តមាននេះ