ខេត្តព្រៃវែង ៖ សេចក្តីរាយការណ៍ឱ្យដឹងថា ប្រធានការិយាល័យអប់រំក្រុងក្រចេះ លោកទូច ថុន បានស្លាប់ និងប្រពន្ធ-កូនចំនួន៤នាក់ក៏បានរងរបួសធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍មួយ ក្រោយរថយន្តគាត់បុកជាមួយរថយន្តយីឌុបក្នុងទិសដៅបញ្ច្រាសគ្នា ហេតុការណ៍ដ៏រន្ធត់នេះ កើតឡើងកាលពីវេលាម៉ោង១១និង១០នាទីព្រឹកថ្ងៃទី២៣ កុម្ភៈ ស្ថិតនៅលើកំណាត់ផ្លូវជាតិលេខ៨អា ខាងមុខសាលាឃុំស្មោងជើង ក្នុងស្រុកកំចាយមារ ខេត្តព្រៃវែង ។
យោងតាមប្រភពពីកន្លែងកើតហេតុថា នៅមុនពេលកើតហេតុ គេឃើញរថយន្ដម៉ាកកូរ៉ូឡា ពណ៌ទឹកប្រាក់ ពាក់ស្លាកលេខភ្នំពេញ2Q-3698 បើកបរដោយលោកទូច ថុន និងមានអ្នករួមដំណើរចំនួន៤នាក់នៅក្នុងរថយន្ត បានធ្វើដំណើរក្នុងទិសដៅពីកើតទៅលិច ក្នុងល្បឿនលឿនគួរសម ។ លុះមកដល់ចំណុចកើតហេតុ រថយន្តលោកទូច ថុន បានបើកវ៉ារថយន្តមួយគ្រឿងផ្សេងទៀត ដែលនៅខាងមុខ ដោយបើកវ៉ាឆ្លងទ្រូងថ្នល់ គាប់ជួនពេលនោះក៏មានរថយន្តមួយគ្រឿងផ្សេងទៀត ម៉ាកហ៊ីយ៉ាន់ដាយ ពណ៌.ស ពាក់ស្លាកលេខក្រចេះ3A.0531 បើកមកដល់ដែរក្នុងទិសដៅបញ្ច្រាសគ្នា ទើបធ្វើឱ្យរថយន្តទាំង២ បុកគ្នាចំពីមុខពេញទំហឹងគាបរួញចូលគ្នាតែម្តង។
ក្រោយកើតហេតុ លោកទូច ថុន ត្រូវបានគាបជាប់ និងស្លាប់បាត់បង់ជីវិតភ្លាមៗ នៅក្នុងកាប៊ីនរថយន្ត ចំណែកប្រពន្ធនិងកូនស្រី២នាក់ ប្រុសម្នាក់ បានរងរបួសធ្ងន់ ហើយត្រូវបានអ្នកស្រុកជួយគាស់ទ្វារថយន្តយកចេញមកក្រៅ និងទាក់ទងហៅរថយន្តសង្គ្រោះមន្ទីរពេទ្យបង្អែកស្រុកកំចាយមារ ដឹកយកទៅសង្គ្រោះភ្លាមៗផងដែរ។ រីឯអ្នកបើកបរថយន្តហ៊ីយ៉ាន់ដាយ បានរត់គេចខ្លួនបាត់ក្រោយកើតហេតុ។
ចែករំលែកព័តមាននេះ