ស្ត្រីមានផ្ទៃពោះប្រមាណ៩នាក់ ក្នុងចំណោម១០០នាក់ នឹងកើតជាជំងឺទឹកនោមផ្អែមក្នុងពេលមានផ្ទៃពោះ ។ វាអាចធ្វើឲ្យអ្នកប្រឈមនឹងបញ្ហាជាច្រើន ក្នុងពេលមានផ្ទៃពោះ និងសម្រាលកូន ។ នៅពេលអ្នកមានផ្ទៃពោះ កោសិការបស់អ្នកនឹងមិនសូវស៊ាំនឹងអាំងស៊ុយលីនទេ…
ស្ត្រីមានផ្ទៃពោះប្រមាណ៩នាក់ ក្នុងចំណោម១០០នាក់ នឹងកើតជាជំងឺទឹកនោមផ្អែមក្នុងពេលមានផ្ទៃពោះ ។ វាអាចធ្វើឲ្យអ្នកប្រឈមនឹងបញ្ហាជាច្រើន ក្នុងពេលមានផ្ទៃពោះ និងសម្រាលកូន ។
នៅពេលអ្នកមានផ្ទៃពោះ កោសិការបស់អ្នកនឹងមិនសូវស៊ាំនឹងអាំងស៊ុយលីនទេ ។ រឿងនេះធ្វើឲ្យជាតិស្ករក្នុងឈាមកើនឡើងបាន ។ កាលណាមានជាតិស្ករច្រើន អាចជួយបង្កើតនូវជីវជាតិកាន់តែច្រើនដល់ទារកបាន ។ ប៉ុន្តែបើសិនជាកោសិកាអ្នកមិនអាចទទួលយកអាំងស៊ុយលីនបាន នោះជាតិស្ករក៏មិនអាចប្រើប្រាស់បានដែរ ហើយជាតិស្ករក្នុងឈាមនឹងឡើងខ្ពស់ ។ វាអាចធ្វើឲ្យមានបញ្ហាច្រើនទាំងអ្នក និងកូនក្នុងផ្ទៃ ។
តើនរណាអាចកើតមានជំងឺនេះខ្លះ?
គ្មាននរណាម្នាក់អាចនិយាយឲ្យច្បាស់ថា តើនរណានឹងកើតជំងឺទឹកនោមផ្អែមក្នុងពេលមានផ្ទៃពោះឡើយ ប៉ុន្តែឱកាសអ្នកអាចនឹងឡើងខ្ពស់បើសិនជាអ្នកជា៖
•ធាត់ជ្រុលមុនពេលមានផ្ទៃពោះ
•មានសមាជិកគ្រួសារកើតជំងឺទឹកនោមផ្អែមស្រាប់
•អាយុចាប់ពី២៥ឆ្នាំឡើងទៅ
•ធ្លាប់មានជំងឺទឹកនោមផ្អែមក្នុងពេលមានផ្ទៃពោះកាលពីពេលមុន
•ពពោះកូនដែលធំពេក ឬកូនស្លាប់ក្នុងផ្ទៃ
•មានភាពមិនធម្មតាទៅលើតេស្តជាតិស្ករក្នុងឈាមពីមុនមក
របបអាហារ
គ្រូពេទ្យ ឬអ្នកជំនាញខាងអាហារូបត្ថម្ភ អាចជួយអ្នកជ្រើសរើសអាហារដែលអាចថែរក្សាជាតិស្ករក្នុងឈាមជាមួយនឹងការមានសុខភាពល្អបាន ។ ពួកគេក៏អាចបង្រៀនអ្នកលើការជ្រើសរើសពេលវេលាញ៉ាំអាហារដែលត្រឹមត្រូវទៀតដែរ ។ ជាទូទៅ អ្នកគួរតែកាត់បន្ថយការញ៉ាំអាហារមានជាតិផ្អែម និងអាហារសម្បូរជាតិកាបូអ៊ីដ្រាត ។
ចូរបញ្ចូលអាហារមានជាតិសរសៃញ៉ាំឲ្យបានច្រើនដូចជា បន្លែ ផ្លែឈើ គ្រាប់ធញ្ញជាតិជាដើម ។ ការសិក្សាដ៏ធំមួយបានពិនិត្យទៅលើរបបអាហាររបស់ស្ត្រីមុនពេលពួកគេមានផ្ទៃពោះ ។ ជារៀងរាល់ថ្ងៃ ពួកគេបានបង្កើនការញ៉ាំជាតិសរសៃ១០ក្រាម ហើយឃើញថាមានការថយចុះការប្រឈមនឹងជំងឺទឹកនោមផ្អែមក្នុងពេលមានផ្ទៃពោះរហូតដល់២៦ភាគរយ ។ លើសពីនេះទៅទៀត ការញ៉ាំថ្នាំបំប៉នជាតិសរសៃប្រហែលជាមានប្រយោជន៍ក្នុងការជួយឲ្យដល់តម្រូវការញ៉ាំជាតិសរសៃផងដែរ ។
សកម្មភាព
ការហាត់ប្រាណទៀងទាត់ អាចជួយរក្សាជាតិស្ករក្នុងឈាមនៅកម្រិតមានសុខភាពល្អបាន។ ការដើរ និងហែលទឹក គឺជាជម្រើសដ៏ល្អ។ ការសិក្សាមួយបានរកឃើញថា ស្ត្រីដែលមានភាពសកម្មខាងរាងកាយមុនពេល និងក្នុងពេលមានផ្ទៃពោះប្រហែល៤ម៉ោងក្នុងមួយសប្តាហ៍ អាចបន្ថយការប្រឈមនឹងជំងឺទឹកនោមផ្អែមក្នុងពេលមានផ្ទៃពោះបានប្រហែល៧០ភាគរយ ឬច្រើនជាងនេះទៅទៀត ។
ក្រោយពីសម្រាលកូនរួច
កត្តាប្រឈមមុខដូចគ្នាមួយចំនួន ដែលធ្វើឲ្យអ្នករងគ្រោះថ្នាក់ក្នុងការកើតជំងឺទឹកនោមផ្អែមក្នុងពេលមានផ្ទៃពោះនោះ ក៏ធ្វើឲ្យអ្នកងាយនឹងកើតជំងឺទឹកនោមផ្អែមប្រភេទទី២នៅថ្ងៃក្រោយដែរ ។ បើសិនជាអ្នកមានជំងឺទឹកនោមផ្អែមក្នុងពេលមានផ្ទៃពោះ ការប្រឈមនឹងជំងឺទឹក នោមផ្អែមក្រោយពីមានផ្ទៃពោះរួច នឹងកើនឡើងជាមិនខាន ។
ក្រោយពីសម្រាលកូនរួច យកល្អគួរតែមានរបបអាហារផ្តល់សុខភាព និងរៀបគម្រោងហាត់ប្រាណផង ។ ការដែលមានទម្ងន់ប្រកបដោយសុខភាពល្អ នឹងជួយបន្ថយការប្រឈមមុខរបស់អ្នកបាន ។ ប៉ុន្តែអ្នកមិនគួរណាបារម្ភអំពីការចុះស្គម ភ្លាមៗពេកឡើយ ។ នៅពេលអ្នកធាត់ ការស្រកទម្ងន់ត្រឹម៥ទៅ៧ភាគរយ នៃទម្ងន់ខ្លួន គឺគ្រប់គ្រាន់នឹងបង្កើតភាពខុសគ្នាដល់សុខភាពហើយ ៕
ចែករំលែកព័តមាននេះ