ខេត្តបន្ទាយមានជ័យ ៖ ដើម្បីគាំទ្រការកែលម្អបរិយាកាសវិនិយោគឲ្យកាន់តែប្រសើរ អគ្គនាយកដ្ឋានពន្ធដារបានសហការជាមួយសាខាពន្ធដារខេត្ត ចាប់ផ្ដើមធ្វើការចុះអនុវត្តការងារអង្កេតសហគ្រាសនៅខេត្តបន្ទាយមានជ័យ នៅក្នុងកិច្ចប្រជុំស្ដីពីការចុះអង្កេតនេះ កាលពីរសៀលថ្ងៃទី១៩ កុម្ភៈ នៅសាលប្រជុំសាលាខេត្ត លោក សួន បវរ អភិបាលខេត្ត បានមានប្រសាសន៍ថា ការចុះអនុវត្តការងារអង្កេតសហគ្រាសនៅខេត្តបន្ទាយមានជ័យ គឺដើម្បីស្រង់ស្ថិតិសហគ្រាស ក្នុងគោលបំណងគាំទ្រការកែលម្អបរិយាកាសវិនិយោគនៅកម្ពុជា ។
លោកបញ្ជាក់ថា ការធ្វើអង្កេតសហគ្រាសនេះ គឺការរៀបចំគោលនយោបាយលើកទឹកចិត្តពន្ធ និងការផ្សព្វផ្សាយពីបទប្បញ្ញត្តិស្តីពីពន្ធដារ, ការផ្តល់សេវាចុះបញ្ជី និងសេវាពន្ធដារផ្សេងៗទៀតជូនដល់ម្ចាស់សហគ្រាស និងអាជីវកម្មគ្រប់កម្រិតឲ្យបានកាន់តែប្រសើរឡើង ។
លោក កែន សម្បត្តិ អគ្គនាយករងនៃអគ្គនាយកដ្ឋានពន្ធដារ បានមានប្រសាសន៍ថា ការចុះអនុវត្តការងារអង្កេតសហគ្រាសនៅខេត្តនេះ គឺមន្ត្រីនៃអគ្គនាយកដ្ឋានពន្ធដារ រួមជាមួយមន្ត្រីសាខាពន្ធដារខេត្ត បានចុះអនុវត្តការងារជ្រើសរើសសហគ្រាសសម្រាប់អង្កេត ការបែងចែកភូមិសាស្ត្រ និងសមាសភាពការងារបែងចែកភារកិច្ច ព្រមទាំងដោះស្រាយបញ្ហាក្នុងការងារអង្កេត ។
លោកបញ្ជាក់ថា ៖« ការងារអង្កេតសហគ្រាស គឺជាការចុះស្រង់ស្ថិតិសហគ្រាសដោយមានរូបថតទីតាំង និងសាកសួរព័ត៌មានរបស់សហគ្រាស ដូចជា អត្តសញ្ញាណសកម្មភាពអាជីវកម្ម និងព័ត៌មានចាំបាច់មួយចំនួនទៀត » ។
គួរបញ្ជាក់ថា យោងតាមរបាយការណ៍របស់មន្ទីរឧស្សាហកម្ម និងសិប្បកម្មខេត្ត នៅឆ្នាំ២០១៨នេះ ខេត្តបន្ទាយមានជ័យមានឧស្សាហកម្មរោងចក្រ សហគ្រាសធុនតូចនិងមធ្យម និងសិប្បកម្មសរុបចំនួន១.០០៣មូលដ្ឋាន ក្នុងនោះឧស្សាហកម្មរោងចក្រមាន១៨មូលដ្ឋាន និងសហគ្រាសធុនតូចនិងមធ្យម និងសិប្បកម្មមាន៩៨៥មូលដ្ឋាន ៕
ចែករំលែកព័តមាននេះ