ព្រឹទ្ធសភាអនុម័តកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណ
- ភ្នំពេញ
រាជធានីភ្នំពេញ ៖ ក្នុងសម័យប្រជុំព្រឹទ្ធសភាលើកទី១១ នីតិកាលទី៣ នៅព្រឹកថ្ងៃទី២១ កុម្ភៈ លោក ប៉ាន សូរស័ក្តិ តំណាងរាជរដ្ឋាភិបាល…
រាជធានីភ្នំពេញ ៖ ក្នុងសម័យប្រជុំព្រឹទ្ធសភាលើកទី១១ នីតិកាលទី៣ នៅព្រឹកថ្ងៃទី២១ កុម្ភៈ លោក ប៉ាន សូរស័ក្តិ តំណាងរាជរដ្ឋាភិបាល…
រាជធានីភ្នំពេញ ៖ ក្នុងសម័យប្រជុំព្រឹទ្ធសភាលើកទី១១ នីតិកាលទី៣ នៅព្រឹកថ្ងៃទី២១ កុម្ភៈ លោក ប៉ាន សូរស័ក្តិ តំណាងរាជរដ្ឋាភិបាល និងសហការី ទទួលបានជោគជ័យលើការការពារសេចក្តីព្រាងការអនុម័តយល់ព្រមលើកិច្ចព្រមព្រៀង ស្តីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ។
ជាលទ្ធផល សេចក្ដីព្រាងនេះ ត្រូវបានព្រឹទ្ធសភាធ្វើការអនុម័តយល់ព្រមដោយឥតកែប្រែ និងចាត់ទុកជាការប្រញាប់ ក្នុងសំឡេងគាំទ្រចំនួន៤៥សំឡេងនៃចំនួនសមាជិកព្រឹទ្ធសភាទាំងមូល ក្រោមអធិបតីភាពដ៏ខ្ពង់ខ្ពស់របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា ។
កិច្ចព្រមព្រៀងនេះ គឺជាសមិទ្ធផលនៃកិច្ចខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សំដៅឆ្ពោះទៅរកការអភិវឌ្ឍក្នុងតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ប្រកបដោយនិរន្តរភាព និងគ្រប់វិស័យ កាត់បន្ថយភាពក្រីក្រ និងគម្លាតផ្នែកសេដ្ឋកិច្ច សង្គម និងធ្វើឲ្យជីវភាពរស់នៅរបស់ប្រជាពលរដ្ឋនៅក្នុងតំបន់ត្រីកោណអភិវឌ្ឍន៍ប្រសើរឡើង ព្រមទាំងកិច្ចសហប្រតិបត្តិការទូលំទូលាយក្នុងចំណោមប្រទេសទាំងបី ដែលត្រូវបង្កើតឡើងដោយផ្អែកលើចំណងមិត្តភាពជាប្រពៃណី សាមគ្គីភាព ដែលមានផលប្រយោជន៍ទៅវិញទៅមក និងភាពជាអ្នកជិតខាងល្អ ។
អត្ថប្រយោជន៍សំខាន់ៗនៃកិច្ចព្រមព្រៀងនេះរួមមាន ៖
១-បង្កើនសកម្មភាពជំរុញពាណិជ្ជកម្ម
២-បង្កើតបរិយាសធុរកិច្ចល្អប្រសើរ
៣-សម្រួលបម្លាស់ទីរបស់ប្រជាជន, យានយន្ត និងទំនិញនៃប្រទេសទាំងបីក្នុងតំបន់ត្រីកោណ
៤-បង្កើនលក្ខខណ្ឌអនុគ្រោះដើម្បីសម្រួលដល់លំហូរពាណិជ្ជកម្ម និងវិនិយោគ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានគូសបញ្ជាក់ថា កិច្ចព្រមព្រៀងស្តីពី
ការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាមនេះ មានគោលបំណងសម្រួលដល់សកម្មភាពពាណិជ្ជកម្ម និងវិនិយោគនៅក្នុងតំបន់ត្រីកោណអភិវឌ្ឍន៍ ក្នុងនោះប្រទេសកម្ពុជាមាន៤ខេត្ត គឺខេត្តស្ទឹងត្រែង រតនគិរី មណ្ឌលគិរី និងក្រចេះ ។ ចំណែកប្រទេសឡាវមាន៤ខេត្ត និងវៀតណាមមាន៥ខេត្ត ដែលជាមធ្យោបាយមួយក្នុងការបង្រួមគម្លាតអភិវឌ្ឍន៍រវាងតំបន់ត្រីកោណ និងតំបន់ដទៃទៀត ។
គួររំឭកដែរថា កិច្ចព្រមព្រៀងស្តីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាមនេះ ត្រូវបានរដ្ឋសភានៃព្រះរាជាណាចក្រកម្ពុជាអនុម័តយល់ព្រមចំនួន១២១សំឡេង នៃចំនួនសមាជិករដ្ឋសភាទាំងមូល នាសម័យប្រជុំរដ្ឋសភាជាវិសាមញ្ញ នីតិកាលទី៥ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា ៕
ចែករំលែកព័តមាននេះ