ខេត្តកំពត ៖ ដូនចាស់ម្នាក់នេះរស់នៅគ្មានកូនគ្មានចៅប្តីស្លាប់ចោលតាំងពីសម័យសង្គមរាស្ត្រនិយមហើយរូបគាត់ពិកាដៃម្ខាងទៀត បងប្អូនស្លាប់ចោលអស់សព្វថ្ងៃរស់នៅជាមួយក្មួយស្រីបង្កើតជាស្ត្រីមេម៉ាយដោយសុំដីអ្នកស្រុកសង់ខ្ទមតូចល្មមមួយរស់នៅជាមួយក្មួយស្រីយ៉ាងវេទនាបានហូបដោយអ្នកភូមិផ្តល់ឲ្យមួយថ្ងៃរួចមួយថ្ងៃ ។ ដូនចាស់ខាងលើមានឈ្មោះ ម៉ម ច្រេច រស់នៅបច្ចុប្បន្នភូមិព្រែកអំពិល ឃុំកោះតូច ស្រុកទឹកឈូ ខេត្តកំពត ។
បើតាមប្រភពក្មួយស្រីដែលរស់នៅជាមួយបានឲ្យដឹងថា កាលពីប៉ុន្មានខែមុននេះគាត់នៅមានកម្លាំងគាត់បានទៅស៊ីឈ្នូលលាងចានឲ្យគេនៅពេលអ្នកស្រុកមានរវល់ដូចជាធ្វើបុណ្យ ឬពិធីអ្វីផ្សេងៗនៅតាមផ្ទះដើម្បីបានថវិកាបន្តិចបន្តួចគ្រាន់ទិញបាយហូបតែមកដល់ពេលនេះគាត់កាន់តែចាស់ជរាខ្លាំងពុំសូវមានកម្លាំងដូចពីប៉ុន្មានខែមុននោះទេ ។ ដូច្នេះត្រូវរស់នៅពឹងកម្លាំងក្មួយស្រីដែលរស់នៅជាមួយ ។ សព្វថ្ងៃបានក្មួយចេះតែដើររកបេះបន្លែបង្កាដែលដុះក្នុងព្រៃដូចជាស្លឹកល្ងៀង និងបន្លែផ្សេងៗទៀតយកទៅលក់ដើម្បីបានលុយបន្តិចបន្តួចទិញម្ហូប និងអង្កដោះស្រាយរួចមួយពេលៗ ។
ដោយក្តាប់បានព័ត៌មានខាងលើលោក ឯក ឆេងហ៊ួត ព្រះរាជអាជ្ញាអមសាលាដំបូងខេត្ត រួមនឹងសហការីអង្គភាពតុលាការ ព្រមទាំងសប្បុរសជនដែលមានឈ្មោះ មាន លាប និងភរិយារបស់លោកឈ្មោះ អ៊ុក អាន រស់នៅភូមិថ្កូវ ឃុំឬស្សី ស្រុកខាងលិច ស្រុកកំពង់ត្រាច ក៏បានសហការចូលរួមបរិច្ចាគនូវសម្ភារប្រើប្រាស់ និងគ្រឿងឧបភោគបរិភោគជាមួយព្រះរាជអាជ្ញាអមសាលាដំបូងខេត្តនារសៀលថ្ងៃទី២២ ខែកុម្ភៈ ឆ្នាំ២០១៨ ដើម្បីចុះសួរសុខទុក្ខដល់ដូនចាស់ និងជូនអំណោយដល់ដូនចាស់គ្មានទីពឹងខាងលើ ៕
ចែករំលែកព័តមាននេះ