ខេត្តស្ទឹងត្រែង ៖ តំបន់ព្រៃរុំាសារ និងរូងជួរថ្មតាមដងទន្លេទាំងបួនគេបានសន្និដ្ឋានថា អាចជាជម្រកនៃពពួកត្រីប៉ាសេអុីដ៏កម្រនៅខេត្តស្ទឹងត្រែង ។ ពួកវាត្រូវគេប្រទះឃើញធំធាត់ស្ថិតនៅរដូវទឹកឡើងចាប់ពីដើមខែឧសភារហូតដល់ចុងខែកក្កដា និងរដូវរំហើយចាប់ពីដើមខែវិច្ឆិកា រហូតដល់ចុងខែមករា ចន្លោះរយៈពេលពីររដូវនេះអ្នកនេសាទប្រមូលផ្តុំដាក់មងនៅទន្លេសេកុង…
ខេត្តស្ទឹងត្រែង ៖ តំបន់ព្រៃរុំាសារ និងរូងជួរថ្មតាមដងទន្លេទាំងបួនគេបានសន្និដ្ឋានថា អាចជាជម្រកនៃពពួកត្រីប៉ាសេអុីដ៏កម្រនៅខេត្តស្ទឹងត្រែង ។ ពួកវាត្រូវគេប្រទះឃើញធំធាត់ស្ថិតនៅរដូវទឹកឡើងចាប់ពីដើមខែឧសភារហូតដល់ចុងខែកក្កដា និងរដូវរំហើយចាប់ពីដើមខែវិច្ឆិកា រហូតដល់ចុងខែមករា ចន្លោះរយៈពេលពីររដូវនេះអ្នកនេសាទប្រមូលផ្តុំដាក់មងនៅទន្លេសេកុង និងទន្លេមេគង្គ ។
តាមរយៈនៃការតាមដានរបស់ក្រុមអ្នកជំនាញខណ្ឌរដ្ឋបាលជលផលខេត្តស្ទឹងត្រែងថា គោលដៅរបស់ពពួកត្រីប៉ាសេអុីមានវត្តមានចាប់ពីព្រំប្រទល់ខេត្តក្រចេះទៅដល់កោះបួនពាន់ តំបន់ព្រៃរុំាសារ និង ជួររូងថ្ម រហូតដល់ព្រំប្រទល់ឡាវនៃទន្លេម្ខាងម្នាក់ទៅដល់ស្រុកមឿងខូងឯណោះ ។ អ្នកជំនាញបានតាមដាន ហើយអះអាងថា ត្រីប៉ាសេអុីដែលមានវត្តមានចាប់ពីព្រំប្រទល់ប្រទេសឡាវត្រឡប់មកដល់ព្រំប្រទល់ខេត្តក្រចេះវិញមានទំហំ និងទម្ងន់ចាប់ពីជាង៤គីឡូក្រាមក្នុងមួយក្បាលចុះមកតាមលំដាប់លំដោយរហូតដល់ទំហំ និងទម្ងន់ត្រីខ្នាតតូច ។ ចំណែកលក្ខណៈដែលគេចាប់អារម្មណ៍ គឺត្រីប៉ាសេអុីដែលមានវត្តមានចាប់ពីព្រំប្រទល់ប្រទេសឡាវចូលទៅដល់ស្រុកមឿងខូងប្រទេសឡាវឯណោះវិញ គេប្រទះឃើញអស់ធំបំផុតត្រឹមទម្ងន់ប្រាំបីខាំចុះក្រោមក្នុងមួយក្បាល ហើយពុំសូវប្រទះឃើញផង ។
ដោយឡែក សម្រាប់ទីតាំងសំខាន់រយៈពេលពីរដូវនៃការប្រមូលផ្តុំចេញពីជម្រករបស់ពួកវាបានទៅជួបជុំក្នុងទន្លេទល់មុខអតីតសាលាខេត្តចាស់ជាទន្លេសេកុងចន្លោះក្បាលកោះស្រឡាយ ទៅដល់ភូមិថ្មី ជាទន្លេមេគង្គ ។រហូតមកទល់បច្ចុប្បន្នការពងកូនបន្តពូជស្ថិតក្នុងការស្រាវជ្រាវរបស់ក្រុមអ្នកជំនាញនៅឡើយដោយសារត្រីប៉ាសេអុីមិនត្រូវបានគេប្រទះឃើញពងរបស់វានៅក្នុងពោះទេ ទាំងអ្នកនេសាទបាន ទាំងអ្នកទិញទៅបរិភោគ ។តាមការអះអាងរបស់ក្រុមអ្នកជំនាញនៃខណ្ឌរដ្ឋបាលជលផលខេត្តស្ទឹងត្រែងថា នៅរដូវទាំងពីរក្នុងឆ្នាំ២០១៧មកទល់ដើមឆ្នាំ២០១៨ដែលជារដូវចុងក្រោយ ពពួកត្រីប៉ាសេអុីវិលទៅរកជម្រករបស់ខ្លួនវិញនោះ នៅតាមជួរដងទន្លេបីមានវត្តមានត្រីប៉ាសេអុី គឺទន្លេមេគង្គ ទន្លេសេកុង និងទន្លេស្រែពក ។ ដោយឡែកទន្លេសេសានមិនមានវត្តមានត្រីប៉ាសេអុីទេដោយសារទន្លេមួយនេះបានបិទទំនប់វារីអគ្គិសនី តែអ្នកបច្ចេកទេសសាងសង់ទំនប់វារីអគ្គិសនីកំពុងសិក្សាដើម្បីសាងសង់ជណ្តើរត្រី សម្រាប់ឲ្យពួកវាបានឆ្លងកាត់។
នាយខណ្ឌរដ្ឋបាលជលផលខេត្តស្ទឹងត្រែង លោកទុំ នីរ៉ូ បានផ្តល់បទសម្ភាសន៍ជាមួយកោះសន្តិភាព កាលពីពេល ថ្មីៗកន្លងមកថាខេត្តស្ទឹងត្រែងនឹងមានស្ថានីយបង្កាត់ពូជត្រីមួយដែលត្រូវចំណាយប្រាក់ចំនួន៥សែនដុល្លារអាមេរិក ជាកម្ចីពីធនាគារពិភពលោកតាមរយៈគម្រោងមេគង្គរដ្ឋបាលជលផល ដោយប្រាក់ទាំងនោះបានទម្លាក់មកដល់ហើយ ។ បច្ចុប្បន្នកំពុងសិក្សាប្លង់លម្អិតពីអ្នកជំនាញជាតិ និងអន្តរជាតិ ដែលមានទីតាំងស្ថិតនៅអូរខ្លុង ឃុំសាមឃួយ ស្រុកសេសាន ។ ស្ថានីយបង្កាត់ពូជត្រីនោះមិនមែនបង្កាត់តែពូជត្រីប៉ាសេអុីមួយប្រភេទទេ ពោលគឺបង្កាត់ពូជត្រីជាច្រើនទៀត ៕
ចែករំលែកព័តមាននេះ